Fono i le Lagi

Vaaiga Lautele

I le muai olaga, na talo ai e lo tatou Tama Faalelagi se Fono Tele e faailoa mai ai Lana fuafuaga mo lo tatou alualu i luma (tagai i le Aoaoga a Peresitene o le Ekalesia: Iosefa Samita [2007], 209, 511). Sa tatou iloa ai, afai tatou te mulimuli i Lana fuafuaga, o le a avea i tatou e pei o Ia. O le a tatou toetutu; o le a tatou maua le mana uma i le lagi ma le lalolagi; o le a avea i tatou ma ni matua faalelagi, ma maua ni fanau agaga e pei o Ia (tagai i le Mataupu Faavae ma Feagaiga 132:19–20).

Sa tatou iloa ai, o le a Ia faia se lalolagi mo i tatou lea o le a tofotofoina ai i tatou (tagai i le Aperaamo 3:24–26). O le a pupuni o tatou mafaufau i se veli, ma o le a galo ai ia i tatou lo tatou aiga faalelagi. E tatau ona faia lena mea, ina ia mafai ai ona tatou filifili le lelei po o le leaga, e aunoa ma le faatosinaina o i tatou i lo tatou manatuaina o le taimi na tatou mau faatasi ai ma lo tatou Tama Faalelagi. … O le a Ia fesoasoani mai ia i tatou ia tatou iloa le upu moni pe a tatou toe faalogo ai i le lalolagi (tagai i le Ioane 18:37).

Sa tatou iloa ai foi i le Fono Tele le faamoemoega mo lo tatou alualu i luma: ina ia maua le atoatoa o le olioli. E ui i lea, sa tatou iloaina ai foi, o nisi o le a faaseseina, filifilia isi ala, ma leiloa lo latou ala. Sa tatou iloa ai, o i tatou uma o le a i ai tofotofoga i o tatou olaga: o ma’i, lē fiafia, tiga, faanoanoa, ma le oti. Ae sa tatou malamalama o le a tuuina mai ia i tatou ia mea ina ia tatou maua ai le poto masani ma mo lo tatou lelei (tagai i le Mataupu Faavae ma Feagaiga 122:7). Afai tatou te onosaia nei mea, o le a avea ia tofotofoga ma mea e faamamaina ai i tatou, a e le faatoilaloina ai i tatou (tagai i le Aoaoga a Peresitene o le Ekalesia: Spencer W. Kimball [2006], 15–16).

Sa tatou iloa ai foi i lenei fono, ona o lo tatou vaivai, o le a tatou agasala uma ai, sei vagana ai tamaiti laiti (tagai i le Mataupu Faavae ma Feagaiga 29:46–47). Sa tatou iloa ai, o le a saunia se Faaola mo i tatou ina ia mafai ona tatou manumalo ia tatou agasala, ma manumalo i le oti e ala i le toetu. Sa tatou iloa ai, afai tatou te faatuatua ia te Ia, usiusitai i Ana afioga ma mulimuli i Lana faataitaiga, o le a faaeaina i tatou ma avea e pei o lo tatou Tama Faalelagi. O le a tatou maua le atoatoa o le olioli.

Tusifaamaumau Ou Lagona Uunai