Oti, Faaletino

O le oti faaletino o le tuueseeseina lea o le agaga mai le tino faaletino. O le Pā’u o Atamu na aumaia ai le oti faaletino i le lalolagi (tagai i le Mose 6:48). Ona o le Togiola ma le Toetu o Iesu Keriso, o le a toetutu ai tagata uma ma laveaiina mai le oti faaletino.

Vaaiga Lautele

O le maliu o se vaega taua o le fuafuaga a le Tama Faalelagi mo le faaolataga (tagai i le 2 Nifae 9:6). Ina ia mafai ona avea faapei o lo tatou Tama Faalelagi, e tatau ona tatou oo i le oti ma mulimuli ane maua ni tino toetutu, atoatoa.

“Pe a oti le tino faaletino, e faaauau pea ona ola le agaga. I le lalolagi o agaga, o agaga o e amiotonu “e talia i se nofoaga o le fiafia, lea ua taua o le parataiso, o se nofoaga e malolo ai, o se nofoaga o le filemu o le a latou malolo ai mai i o latou faalavelave uma ma mai le popole uma, ma le faanoanoa” (Alema 40:12). O se nofoaga e ta’ua o le falepuipui o agaga ua faaavanoa mo “i latou o e [ua] oti ia latou agasala, e aunoa ma se malamalama e uiga i le upumoni, po o le solitulafono, ona ua latou teena perofeta” (Mataupu Faavae ma Feagaiga 138:32). O agaga i le falepuipui e “aoao le faatuatua i le Atua, le salamo mai agasala, le sui papatisoga mo le faamagaloina o agasala, le meaalofa o le Agaga Paia e ala i le faaee o lima, ma isi mataupu autu uma o le talalelei [e] tatau ia te i latou ona iloa” (Mataupu Faavae ma Feagaiga 138:33–34). Afai latou te taliaina mataupu faavae o le talalelei, salamo i a latou agasala, ma talia sauniga na faia mo i latou i malumalu, o le a taliaina i latou i le parataiso.

Ona o le Togiola ma le Toetu o Iesu Keriso, o le oti faaletino ua na o se mea e le tumau: “Aua faapei ona oti uma ia Atamu, e faapea foi ona faaolaina uma ia Keriso” (1 Korinito 15:22). O le a toetutu tagata uma, o lona uiga o agaga o tagata uma o le a toefaatasia ma lona tino—“toefuataia mea uma i o latou autino tatau ai ma atoatoa” ma e le toe oo i ai le oti (Alema 40:23; tagai foi i le Alema 11:44–45).

Tusifaamaumau Ou Lagona Uunai