Suesuega Faaleaoaoga Faavae
Molimau
Vaaiga Aoao
O se molimau o se faamatalaga po o se isi faamaoniga e moni se mea. E mafai ona faasino atu i se tagata e tuuina atu se faamatalaga e faavae i se iloa patino. I le Ekalesia a Iesu Keriso o le Au Paia o Aso e Gata Ai, o se molimau e masani ona faasino i se tasi e tuuina atu se tautinoga, po o se molimau, e uiga i se mea ua i ai sona aafiaga ma iloa e moni.
Na aoao mai e le Alii i taitai i le popofou o le Ekalesia e faapea, “o fofoga o molimau e toalua pe toatolu e faamautu ai upu uma” (Mataupu Faavae ma Feagaiga 6:28; tagai foi Mataio 18:16). O le tele o mea aupito taua na tutupu i le Toefuataiga o le Ekalesia na mulimuli i le mamanu o le i ai o molimau e toalua ma sili atu e molimau e uiga i lo latou moni. Na molimau mai Molimau e Toatolu o le Tusi a Mamona, sa faaali atu e se agelu ia i latou ia papatusi auro ma o famaumauga sa “faaliliuina i le meaalofa ma le mana o le Atua” ua avea ai ma Tusi a Mamona (“O Le Mau a Molimau e Toatolu,” Tusi a Mamona). Na molimau mai Molimau e Toavalu, o Iosefa Samita sa na faaali atu ia i latou ia papatusi auro ma na mafai ona latou fetagofi i ai ma iloilo ona tusitusiga na vane ai. Sa i ai Iosefa Samita ma Oliva Kaotui ma molimau mai i le toefuataiga o le perisitua ma ki o le perisitua (tagai Mataupu Faavae ma Feagaiga 13; 110; Iosefa Samita—Talafaasolopito 1:68–72).
O le mamanu o molimau o loo mulimulitaia i le Ekalesia i aso nei. A papatisoina se tagata, e toalua molimau, e faamaonia e le taitai pulefaamalumalu, e mata’ituina le papatisoga ina ia faamautinoa o loo faatinoina lelei. O tagata o le Ekalesia ua papatisoina, e aofia ai tamaiti ma le autalavou, e mafai ona avea ma molimau. O alii, tamaitai, ma le autalavou ua i ai ni pepa faataga o aoga o le malumalu, e mafai ona avea o ni molimau mo papatisoga sui mo e ua maliliu. O alii ma tamaitai ua maua faaeega paia o loo i ai ni pepa faataga aoga o le malumalu, e mafai ona avea o ni molimau mo sauniga o le malumalu, e aofia ai faamauga i le malumalu.
Ao latou aai ma feinu i le faamanatuga, o tagata o le Ekalesia “molimau atu [i le] … Atua” ua latou loto e tauave i o latou luga le suafa o Keriso, manatua pea o Ia, ma tausi Ana poloaiga (tagai Mataupu Faavae ma Feagaiga 20:77,79).
O Aposetolo o le Ekalesia ua valaauina ia avea o ni “molimau faapitoa o le suafa o Keriso i le lalolagi atoa” (Mataupu Faavae ma Feagaiga 107:23; tagai foi Galuega 1:21–22; 4:33). O le agaga lava lea, latou te molimau atu i tagata uma i le moni o Iesu Keriso, le moni o Lana talalelei, ma le taua o Lana Togiola i tagata uma. E faapena foi, a tatou maua se molimau o le talalelei ma faasoa atu mea ua tatou talitonu i ai e ala atu i a tatou upu ma amioga, ua tatou “tutu o ni molimau a le Atua i taimi uma ma i mea uma, ma i nofoaga uma” (Mosaea 18:9).