O Tala e Tele o le Uluai Faaaliga

O le sailia o tali i a tatou fesili e mafai ona tatou latalata atili ai ia Iesu Keriso pe afai tatou te faaaogaina mataupu faavae lelei. O le aoao e iloilo le tulaga lelei o a tatou punavai o faamatalaga o se tasi lea o na mataupu faavae.

Tagai i le autu “Faafesootai Punavai Faatuatuaina” mo nisi motugaafa i le iloiloina o faamatalaga.

Vaaiga Aoao

Na molimau mai Iosefa Samita e faapea na faaali mai le Atua le Tama ma Iesu Keriso ia te ia i se togavao e lata ane i le fale o ona matua pe tusa o le 14 ona tausaga. O lenei aafiaga na ta’ua mulimuli ane o le Uluai Faaaliga. Sa faamaumauina e Iosefa ma isi ni tala o le Uluai Faaaliga i le taimi o le soifuaga o le Perofeta.

Na lolomi e Iosefa ni tala se lua o le Uluai Faaaliga. O le mea e sili ona lauiloa sa faamaonia ma e mafai ona maua i le Penina Tau Tele. E lua ni tala e lei lolomiina, na faamaumauina i le uluai talaaga o le soifuaga o Iosefa Samita ma i lana api talaaga, sa le iloa e le lauteleseia oo ina lolomiina e le Ekalesia i le vaitau o le 1960.

O tala eseese o loo faamatala ai se tala tutusa, e ui lava e masani ona eseese mea o loo faamamafaina ma auiliiliina mai. O nisi ua finau sese e faapea, soo se eseesega lava i le toe faamatalaina o le Uluai Faaaliga o se faamaoniga o se tala fatu. I se isi itu, ua manatu le au tusitala o talafaasolopito faapea afai e toe faamatalaina e se tasi se aafiaga i ni tulaga se tele i ni aofia eseese i le aluga o le tele o tausaga, o le a faamamafa e tala taitasi ni manatu eseese o le aafiaga ma o loo i ai ni auiliiliga tulaga ese.

O eseesega tetele i tala o le Uluai Faaaliga a Iosefa Samita o loo maua i le tala muamua, lea na tusia i le 1832. E esemai isi tala i ni nai manatu:

I le tala i le 1832, sa tuu ai e se tasi o tusiupu a Iosefa le fuaitau “i le tausaga lona 16 o lo’u matua.” O isi tala o loo lipotia mai ai sa 14 ona tausaga. E foliga mai o le māfuaaga lea o se mea sesē a le tusitala.
I le uluai tala, sa tatalo Iosefa e saili le faamagaloga mo ana agasala. I tala mulimuli ane, sa ia fia iloa po o le fea se lotu e auai ai. O nei fesili e lua atonu sa matuā fesoota’i lelei lava i le mafaufau o Iosefa, ma na atagia mai ai lona mana’o ia faaolaina.
O loo ta’ua i le tala muamua, “Na tatala mai e le Alii le lagi i o’u luga ma sa ou vaai i le Alii ma fetalai mai o ia ia te a’u.” I le tala faatusipaia, na faamalamalama mai ai e Iosefa na faailoa atu e le Tama le Alo, o le na faaauau loa ona talanoa ma Iosefa. E ui lava e le o aofia ai i le tala i le 1832 lenei faamatalaga, ae o tala uma lava ua faamamafaina ai le matafaioi totonugalemu a Iesu Keriso i le faaaliga vaaia. O ia lea na taliina fesili a Iosefa.

O tala e tele a Iosefa o le Uluai Faaaliga e mafai ai ona tatou aoao atili e uiga i lenei mea ofoofogia na tupu, nai lo le mea semanu tatou te aoaoina pe ana faapea e laiti faamatalaga na faamauina. O le Au Paia o Aso e Gata Ai o e faitauina e mafai ona maua se talisapaia o le molimau faamaoni a le Perofeta e faapea, na tali mai le Atua i lana tatalo i se faaaliga vaaia ofoofogia.

Taiala e faatatau i le suesueina o le talalelei:

“Uluai Faaaliga”
“Iosefa Samita”
“Faaaliga”

Suesueina o Au Fesili

Aisea e i ai eseesega i le va o tala o le Uluai Faaaliga a Iosefa Samita?

Na tuu e Iosefa Samita tala e fa o le Uluai Faaaliga. E faaopoopo atu i nei tala, e toalima tagata na soifua i lena taimi na tusia ni tala ina ua uma ona faalogo ia Iosefa o talanoa e uiga i lona aafiaga. O tala e tele ma o latou faamamafa eseese ma faamatalaga auiliili ua tatou maua ai se ata atoatoa o lenei aafiaga faavavega.

E masani ona faamamafa e tagata ni vaega eseese o se aafiaga e faalagolago i a latou aofia po o latou mafuaaga e faasoa atu ai. O tala a Iosefa o ni faataitaiga sili ia o lenei mea. E ui e eseese lava le faamamafa ma faamatalaga auiliili, ae o loo latou faamatala mai ai se tala e tutusa. O se faataitaiga faaletusi paia o lenei mea e mafai ona maua i tala e tele o le liua o Paulo i le Feagaiga Fou.

O tala o le Uluai Faaaliga na gaosia i lalo o tulaga eseese: tusia o se talafaasolopito patino, toe faamatala atu lona aafiaga i se tagata asiasi i lona fale, faalauina atu o le tala o lona soifuaga mo se talafaasolopito aloaia, po o le tali atu i se fesili mai se tagata failipoti. I tulaga taitasi, e foliga mai na tosina atu Iosefa i mea na ia lagonaina sa sili ona talafeagai mo le aofia. O le eseesega i le va o tala o tusitalafaasolopito agalelei ma tagata atamamai o e suesueina manatuaga ua faamoemoe e maua i pepa o faamatalaga e maua i ni matalalaga eseese.

O eseesega i le va o tala ua faaalia ai foi le auala na faalauteleina ai le malamalama ma le vaaiga a Iosefa i le taimi, aafiaga, ma isi faaaliga. Ina ua faalau atu e Iosefa lana tala muamua i le 1832, sa i ai pea i le amataga o lona faiva. O le tala e tele lava ina patino ma e taulai atu i le uiga o le faaaliga mo Iosefa. Ina ua ia faalauina atu mulimuli ane le tala ua maua nei i le Penina Tau Tele, sa ia toe mafaufau i le uiga o le faaaliga e le gata ia te ia ae i le Ekalesia ma le lalolagi.

E toafia ni tagata faalelagi na vaaia e Iosefa Samita i le Uluai Faaaliga?

O le tolu o tala e fa a Iosefa o loo faamatala manino mai ai ni “tagata” se lua: o le Atua le Tama ma Iesu Keriso. I se tasi o tala, na ia ta’ua ai na ia vaaia fo’i agelu. O le uluai tala a Iosefa e le o auiliiliina tele. Na tusia i le 1832, o loo faamatala mai ai “le Alii” na tatalaina le lagi ona vaai lea o Iosefa i “le Alii.”

E tele auala e mafaufau ai i lenei tala. Atonu na fai mai Iosefa Samita “o le Alii” e faatatau uma i le Atua le Tama ma le Alo, e talitutusa ma le auala na faasino atu ai nisi i aso o Iosefa ia i La’ua. Pe atonu foi sa na ona ia taulai atu lava ia Iesu Keriso, le Tagata paia o lē na faamagaloina o ia i ana agasala ma tuuina atu le savali o le faaaliga.

Na tatalo Iosefa Samita mo se faamagaloga pe na tatalo e iloa po o le fea le ekalesia e auai ai?

O le uluai tala a Iosefa i le Uluai Faaaliga, na tusia a o talavou o ia, o loo ta’ua ai sa ia tatalo e saili se faamagaloga mo ana agasala. O ana tala mulimuli ane, na tusia ina ua mavae le tele o tausaga o auauna atu o se taitai o se ekalesia ua faatupulaia, na faamamafaina ai lana sailiga po o le fea o ekalesia e auai ai. O le mea moni, o nei fesili e lua sa vavalalata le fesoota’iga mo Iosefa. O nei mea uma e lua e atagia mai ai lona manao ia faaolaina.

Aisea e ese ai tala o le Uluai Faaaliga a Iosefa Samita i le auala na ia faamatalaina ai lona matua?

Na tusia e Iosefa Samita lana uluai tala o le Uluai Faaaliga i lana lava tusilima i le 1832. I se taimi ina ua maea ona tusitusi Iosefa, sa faaopoopo ai e se tusiupu le matua o Iosefa i le va o laina, e faailoa mai ai ua i ai o ia i lona “sefuluono tausaga” (po o le 15 tausaga) i le taimi o le faaaliga. Tatou te le iloa pe na feutagai le tusiupu ma Iosefa e uiga i lenei faaopoopoga. I ana tala taitasi na sosoo ai, na fai mai ai Iosefa sa 14 ona tausaga.

Na tusia uma tala a Iosefa i le silia ma le sefulu tausaga talu ona tupu le faaaliga vaaia. E tusa lava pe na ia faatonuina lana tusiupu e tusi e faapea ua 15 ona tausaga, e foliga mai ina ua uma ona ia toe mafaufau lelei i ai, sa ia faapea mai na 14 ona tausaga i le taimi o le faaaliga. Ua faamoemoe tusitalafaasolopito e maua ni eseesega faapenei pe a toe faamatalaina e tagata o latou olaga mai mea e manatua. Po o le ā lava le mea na tupu, o le mea moni e faapea na tupu le faaaliga e sili atu ona tāua na i lo le aso tonu na tupu ai.

Pe o i ai ni faamaoniga faasolopito o le fiafia faalelotu e latalata i Palamaira, Niu Ioka, i le 1820?

Ioe. I lana talafaasolopito o le 1838, na saunoa ai Iosefa Samita o lana Uluai Faaaliga na tupu i le tautotogo o le 1820. Sa mafaufau Iosefa i fesili na taitai atu ai o ia e tatalo mo sina taimi a o lei oo i le faaaliga vaaia. I lana tala i le 1832, na tusia ai e Iosefa na amata ona ia mafaufau loloto “i popolega taua uma mo le manuia o lo’u agaga faavavau” ina ua 12 ona tausaga, pe tusa o le 1818. Ua manino lava faamaumauga o talafaasolopito, o se naunautaiga lautele mo tapuaiga sa vevesi ai le Iunaite Setete i le taimi lea, aemaise lava Niu Ioka i sisifo, lea sa nofo ai Iosefa.

O nisi taimi o lenei naunautaiga na faia i fonotaga o le toefaafouina, e pei o le fonotaga na faia e tagata Metotisi i fafo atu o Palamaira i le 1818. Sa faapotopoto foi le au Metotisi i le lotoifale i le tausaga na sosoo ai i Vienna (lea ua avea nei ma Phelps), Niu Ioka, e 15 maila mai le faatoaga a le aiga o Samita. O tusi o tala faamaumau a se faifeau Metotosi femālagaa’i o loo ta’ua ai le tele o faaosofiaga faalelotu i le eria a Iosefa i le 1819 ma le 1820. Sa latou lipotiina faapea o le Faifeau o Siaosi Lene, o se faifeau Metotisi toe faaola, sa i ai i lena itulagi i tausaga uma e lua ma sa tautala atu i “le metotia a le Atua e aumaia ai le Toefaatulagaina.” Sa faia se fonotaga o le tolauapiga a Metotisi mo aso e tolu i Palamaira i le faaiuga o le tautotogo o le 1820, ma sa tele ni toefaafouina na tutupu i ni nai tausaga mulimuli ane i le 1824. E ui e lei ta’ua patino e Iosefa ni toefaafouina, ae o ni faamaoniga e le mafaaseseina o le “fiafia e le masani ai” na ia faamatalaina.

Aisea na faatalitali umi ai Iosefa e tusi se tala o le Uluai Faaaliga?

E lei faia e Iosefa Samita ni faamaumauga o le talaaga o lona soifuaga i le 24 tausaga muamua o lona soifuaga. Sa ola a’e o ia i se aiga sa iloa faitautusi, ae sa itiiti lava sona aoaoina aloaia. Ua tatou iloa sa faigata ia te ia ona faailoa atu o ia lava i le tusitusi.

E lei leva ona faatulagaina le Ekalesia, ae poloaiina e le Alii ia Iosefa e tausia se talafaasolopito. E taua le faapea na maua loa e Iosefa lenei poloaiga, o se tasi o mea muamua na ia tusi faamaumauina o se tala o le Uluai Faaaliga.

Aisea na le ta’ua ai e nisi o uluai tagata o le Ekalesia le Uluai Faaaliga i a latou tala o le Toefuataiga?

O nisi taimi e faamatala ai e uluai tagata o le Ekalesia le Toefuataiga e aunoa ma le faasino atu i le Uluai Faaaliga. Mo se faataitaiga, o le tina o Iosefa Samita, o Lusi, ma lona uso o Viliamu na tuua uma tala na amata i le asiasiga a le agelu o Moronae i le 1823 ma e lei faasino i le faaali mai o le Tama ma le Alo. E faapena foi, o le uluai tala na lolomiina e Oliva Kaotui o le Toefuataiga e amata i le faaali mai o Moronae.

E le’i faamamafaina pe tautala soo Iosefa lava ia e uiga i le faaaliga i nofoaga faitele mo le tele o tausaga. O se tasi o ana tala ua fautua mai ai e faapea, i le taimi muamua sa ia faatuai ona faasoa atu faamatalaga auiliili i lona aiga, atonu ona o le musu e faasoa atu se aafiaga paia tulaga ese. I le isi itu, sa molimau soo Iosefa i le asiasiga a Moronae ma le faaliliuga o le Tusi a Mamona. O nei mea na tutupu na vaaia e le toatele o uluai tagata o le Ekalesia o se faamaoniga autu lea o le valaauga paia o Iosefa. O tala na tuuina mai e nei tagata o le Ekalesia e le faavaivaia ai le molimau vaaitino a Iosefa, ae o loo atagia mai ai le fiafia o le uluai Au Paia o Aso e Gata Ai ma le molimau i le Tusi a Mamona.

Pe o i ai ni mea e tutusa ai le tala o le Uluai Faaaliga a Iosefa Samita i le 1832 ma tala o le liua o isi Kerisiano i ona aso?

O le Uluai Faaaliga a Iosefa Samita o se taimi silisili lea i le talafaasolopito o tagata. A o tusia e isi tagata i ona aso e uiga i faaaliga faaleagaga, o a latou tala uma lava sa tumau pea o ni tala o le liua faaletagata lava ia. O le aafiaga e le mafaatusalia a Iosefa na faailogaina ai le amataga o se faasologa o vavega na taitai atu ai i le Toefuataiga o le atoatoaga o le talalelei a Iesu Keriso.

O le tala i le 1832 o le Uluai Faaaliga ua faasoa mai ai foi nisi o gagana o loo maua foi i tala o le liua o isi Kerisiano i ona aso. E lē o se mea e faate’ia ai le faaaogā e Iosefa o le gagana e masani ai o ia e faamatala ai le faaaliga. I se tulaga talitutusa, e tuuina atu e tagata o le Ekalesia i aso nei a latou molimau e faaaoga ai fuaitau na latou aoaoina mai isi. Ae e ui o le gagana tatou te faaaogaina e faasoa atu ai a tatou molimau e masani ona mulimuli i se mamanu, ae o o tatou aafiaga faaleagaga taitoatasi e tulaga ese ma patino.

Aoao Atili

Tala o Autu o le Talalelei: “Tala o le Uluai Faaaliga”