Tauagafau

Vaaiga Aoao

O le tauagafau o se uiga faaalia o le talafeagai ma le faaaloalo e ala i laei, teuga, gagana, ma amioga. Afai tatou te tauagafau, tatou te le tā’ina mai ni taulaiga e le talafeagai ia i tatou lava. Nai lo o lena, tatou te saili e “vivii atu i le Atua i o [tatou] tino, ma o [tatou] agaga” (1 Korinito 6:20; tagai foi 1 Korinito 6:19).

Tusifaamaumau Ou Lagona Uunai

Laei ma Foliga Tausia Lelei

Afai tatou te le o mautinoa pe o tauagafau o tatou laei ma teuga, e tatau ona tatou fesili ifo ia i tatou lava, ‘Faamata ou te maua le lagona toafimalie lelei i o’u foliga vaaia pe a na fai o loo ou i ai i le afioaga o le Alii?” Atonu tatou te fesili ifo ia i tatou lava i se fesili faapena e uiga i a tatou gagana ma amioga. “Faamata ou te faia nei upu pe auai i nei gaoioiga pe ana i ai le Alii?” O a tatou tali faamaoni i nei fesili e ono taitai atu ai i tatou i le faia o suiga taua i o tatou olaga. Ua le aunoa ona fautuaina i tatou e perofeta ia tauagafau o tatou laei. O lenei fautuaga ua faavae lea i luga o le upumoni o le tino o le foafoaga paia a le Atua. E ao ona tatou faaaloalo i o tatou tino o se meaalofa mai le Atua. E ala atu i o tatou laei ma foliga vaaia, e mafai ona tatou faaali atu ai i le Alii ua tatou iloa le taua tele o o tatou tino.

O o tatou lavalava e faaalia ai pe o ai i tatou. E auina atu ai savali e uiga ia i tatou, ma e faatosinaina ai le ala tatou te amio a’i ma amio’ai ai isi. A fai faalelei a tatou teuga tumama, ma tauagafau le faiga o laei, e mafai ona tatou valaaulia le mafuta mai o le Agaga, ma faia ai ma se faatosinaga lelei i isi o loo siomia i tatou.

E totonugalemu i le poloaiga ina ia tauagafau, ia se malamalamaaga e uiga i le mana paia o le foafoaga, o le mafai lea ona aumai fanau i lenei lalolagi. O lenei mana e tatau ona faaaogaina i le na’o le va o le tane ma le avā. O laei e aliali ai itutino ma faatosina ai lagona feusuai, lea e aofia ai ofuvae pupuu ma lausakete pupuu tele, lavalava fufusi, ma ofu aluga e le ufiufia ai le manava, e mafai ona faaosofia ai lagona tuinanau ma faatinoga ia e solia ai le tulafono a le Alii o le ola mama.

E faaopoopo atu i le aloese mai le faia o lavalava e aliali ai itutino, e tatau ona tatou aloese mai ituaiga lavalava, foliga vaaia, ma teuga o lauao e matuai papanu lava. I laei, teuga ma amioga, e tatau ona tatou tumama ma mama i taimi uma, ia aua ne’i fa’inaelo pe soona faasamasamanoa le talafaegai. E le tatau ona tatou faaleagaina o tatou tino i le taina ai o pe’a po o le faapūpūina. O tamaitai o e mananao e tatui o latou taliga, e tatau ona fai na o se pea tautaliga tauagafau se tasi.

Gagana ma Amioga

E pei o o tatou laei ma foliga vaaia, o la tatou gagana ma amioga o ni faaaliaga lea o o tatou tagata. O a tatou upu ma amioga e mafai ona i ai se faatosinaga loloto ia i tatou faapea ma isi. E tatau ona tatou faaailoa atu i tatou lava e ala i gagana mama, lelei, ma faagaeetia ma i amioga e aumai ai le fiafia ia i latou e siomia i tatou. O a tatou taumafaiga ina ia tauagafau i upu ma le amio e taitai atu ai i le faateleina o le taitaiga ma le faamafanafanaga mai le Agaga Paia.

E tatau ona tatou aloese mai gagana faatufanua ma le faaaoga faasamasamanoa ma le faaletatau o le suafa o le Alii, lea ua matuai taatele i le lalolagi, ma e tatau ona tatou tetee atu i soo se faaosoosoga ia auai i amioga faataumaoia pe le talafeagai. O le natura le migao o gagana ma amioga faapena e faaleagaina ai lo tatou gafatia e maua ai uunaiga filemu a le Agaga Paia.