Mataupu 19
I le Lalolagi ae Le Ni ō o le Lalolagi
“Ao tatou i ai i le lalolagi, e le o tatou o ni ō o le lalolagi. Ua tatou faamoemoe e faatoilalo le lalolagi ma ola ai ina ia avea ma ni au paia.”
Mai le Soifuaga o Iosefa F. Samita
Ia Tesema 29, 1944, na maliu ai le atalii o Peresitene Iosefa Filitia Samita o Lewis a o tautua i le Vaegaau a le Iunaite Setete o Amerika. E ui i le faanoanoa sa lagonaina e Peresitene Samita, ae sa mafanafana o ia i le tala e manatua ai le olaga matagofie o Lewis. “Afai na fai e Lewis pe tautala i se mea e faaleaga ai se isi, ou te lei faalogo lava i ai,” sa tusia e Peresitene Samita i lana api talaaga. “O ona manatu e mama e faapei o ana gaoioiga. … E ui ina faigata lenei mea, ae ua tatou maua le filemu ma le fiafia i le iloa sa mama o ia ma saoloto mai i le amioleaga e masani ai le lalolagi ma o lo o maua i le vaegaau. Sa faamaoni o ia i lona talitonuga ma e agavaa mo le toetu paia, pe a matou toe faatasi.”1
E tusa ua 11 tausaga ua tuanai ai, na vaaia ai e Peresitene Iosefa Filitia Samita ma lona faletua o Jessie ni uiga faapea i isi tagata o le militeli. Sa laua taamilo i le misiona a le Ekalesia i Asia i sasae ma asiasi foi i tagata o le Au Paia o Aso e Gata Ai mai le Iunaite Setete sa tautua i le militeli. Sa faamalieina Peresitene ma Sister Samita i nei alii talavou, o e, e ui lava i faaosoosoga o le lalolagi, ae sa ola i ni olaga lelei, ma le mama. I le konafesi aoao ia Oketopa 1955, na lipoti mai ai e Peresitene Samita:
“Outou tama ma tina o lo o tautua o outou atalii i vaegaau, ia outou mitamita ia i latou. O i latou o ni alii talavou lelei. O nisi alii o a tatou vaegaau e liliu mai, o e na aumai i le Ekalesia e ala i aoaoga, i mataupu ma faataitaiga—aemaise o faataitaiga a tagata o le Ekalesia o lo o latou tautua faatasi i vaegaau.
“Sa ou feiloai i nisi o alii talavou ua fai mai, ‘Ua matou o mai i le Ekalesia ona o olaga o nei alii talavou ma ona ua latou aoao i matou i mataupu faavae o le talalelei.’
“O lo o faia e i latou ni galuega lelei. Atonu e i ai se tasi pe lua e faatamala, ae o nei alii talavou ua ou maua le avanoa e feiloai i ai, talanoa i ai, latou te faasoa atu a latou molimau i le upumoni ma ua savavali ma le lotomaualalo.
“Ma a o ou feiloai atu i le au taitai ma faifeau … , i lona aotelega latou te faapea mai, ‘Matou te fiafia i o outou alii talavou. E mama i latou. E faamoemoeina i latou.’”2
Na apoapoai mai Peresitene Samita i tagata o le Ekalesia ina ia—faapei o nei alii talavou o le malo—“e ese mai le toatele o le lalolagi.”3 I nei lava lauga, sa ia masani ona saunoa e uiga i le tausia o le paia o le aso Sapati, usitaia o le Upu o le Poto, faamamaluina o suafa o le Tama Faalelagi ma Iesu Keriso, ofuina o laei talafeagai, ma tausia le tulafono o le ola mama. Sa ia tau atu ma le mautinoa i tagata o le Au Paia o Aso e Gata Ai o faamanuiaga o le a latou maua pe afai latou te lafoai i leaga o le lalolagi ma tausia poloaiga “e sili atu nai lo soo se mea e mafai ona latou iloa.”4
E oo lava i taimi o taua, tatou te mafai ona ola i le lalolagi ae le o ni ō le lalolagi.
Aoaoga a Iosefa Filitia Samita
1
Ua finagalo le Alii ia tatou lafoai i leaga o le lalolagi ma ola o ni Tagata Paia.
Ua tatou ola i se lalolagi leaga ma le amioleaga. Ae ui ina o lo o tatou i ai i le lalolagi, e le o tatou o ni o o le lalolagi. Ua faamoemoe e tatou te faatoilaloina le lalolagi ma ola ai ia avea o ni tagata paia. … E sili ae lo tatou malamalama nai lo le lalolagi, ma e tele mea e finagalo ai le Alii mai ia i tatou nai lo i latou.5
I le mataupu e sefulufitu o le Ioane—e tau le mafai ona ou faitauina lenei mataupu e aunoa ma le maligi o ou loimata— … i le tatalo ai o lo tatou Alii, i lona Tama i le filemu o lona agaga atoa aua ua ia silafia ua oo mai le itula e ofoina atu ai ia lava o se taulaga, sa ia tatalo mo ona soo. I lena tatalo sa ia faapea atu ai,
“Ou te tatalo ina ia e le aveesea i latou mai le lalolagi, ae ia e tausi ia i latou ina nei leaga.
“E le ni o le lalolagi i latou, faapei o au foi ou te le so le lalolagi au.
“Ia e faapaiaina i latou i lau upumoni: o lau afioga o le upumoni lea.” (Ioane 17:15–17.)
Afai o lo o tatou ola i le tapuaiga na faaalia mai e le Alii ma ua tatou maua, ua le o le lalolagi i tatou. E le tatau ona i ai sa tatou vaega i lona valea uma. E le tatau ona tatou auai i ana agasala ma ona sese—sese o filosofia ma le sese o aoaoga faavae, sese e faatatau i malo, po o o a lava nei sese— e leai sa tatou vaega o i ai.
Pau lava le vaega tatou te fai o le tausia lea o poloaiga a le Atua. Ua na o le pau lea, o le faamaoni i feagaiga taitasi ma tautinoga taitasi ua tatou faia ma ave i o tatou lava luga.6
Aua nei i ai le manatu mai mea sa ou fai atu ai faapea ou te lagona e tatau ona tatou faamaualuga mai tagata uma e i fafo atu o le Ekalesia ma lē fegalegaleai ma i latou. Ou te le i fai atu lena mea, ae ou te manao ina ia tatou ogatasi ma le Au Paia o Aso e Gata Ai, ma afai ua savavali tagata o le lalolagi i le pouliuli ma le agasala ma feteenai ma le finagalo o le Alii, e i ai le avanoa mo i tatou e tusia ai le laina tuaoi.7
Ina ua tatou auai i le Ekalesia … , ua faamoemoeina i tatou e lafoai i le tele o ala o le lalolagi ma ola e avea ma ni ē paia. Ua tatou le toe oofu pe tautatala pe amio pe mafaufau foi e pei ona faia soo e nisi. O le toatele o le lalolagi ua faaaoga le lauti, kofe, tapaa, ma le ava malosi, ma ua aafia i le faaaogaina o fualaau faasaina. E tele upu leaga ma mataga ma lē migao, inosia ma lē mama i o latou olaga, ae o nei mea uma e tatou te le masani ai. O i tatou o Tagata Paia a le Silisili Ese. …
Ou te valaau atu i le Ekalesia ma ona tagata uma e lafoai le leaga o le lalolagi. E tatau ona tatou tetee atu i le amioleaga ma tulaga uma o le ola le mama e faapei o se mala …
I le avea ai o ni auauna a le Alii, o lo tatou faamoemoe o le savavali lea i le ala ua ia faataatia mo i tatou. E le gata ina tatou naunau e fai ma tautala i mea e fiafia i ai o ia, ae tatou te saili ina ia ola ina ia avea o tatou olaga e faapei o ia.8
Tausia o le Aso Sapati ia paia
Ou te fia fai atu ni nai upu e faatatau i le tausia o le aso Sapati i lona paia. O lenei poloaiga sa tuuina mai i le amataga, ma sa poloaiina e le Atua le Au Paia ma tagata uma o le lalolagi e tatau ona latou tausia le aso Sapati ma faamamaluina—le aso e tasi i le fitu. I lena aso e ao ona tatou malolo mai a tatou galuega, e ao ona tatou ulu atu i le maota o le Alii ma ofo atu ai au faamanatuga i Lona aso paia. Aua o le aso lenei ua atofa mo i tatou e malolo ai mai a tatou galuega ma tapuai atu i le Silisili Ese. [Tagai MF&F 59:9–10.] O lenei aso tatou te ofoina atu ai ia te Ia la tatou faafetai ma le viiga ia te Ia i le tatalo, i le anapogi, i pesega, ma le faamalamalamaina ma le aoaoina o le tasi e le isi.9
O le aso Sapati ua fai ma aso o fiafiaga, o tafaoga, o soo se mea ae le o se aso e tapuai ai, … ma ou te faanoanoa e faapea atu e toatele tele—o le toatasi ua toatele tele—tagata o le Ekalesia a Iesu Keriso o le Au Paia o Aso e Gata Ai ua auai i lena faataitaiga, ma o le aso Sapati i nisi o tagata o le Ekalesia ua faapea o se aso o tafaoga, o fiafiaga, nai lo le aso tatou te auauna ai i le Alii lo tatou Atua ma o tatou agaga atoa, ma o tatou loto atoa, manatu, ma le malosi. …
O lenei, o le tulafono lenei i le Ekalesia i aso nei e pei lava sa i ai i le tulafono a Isaraelu anamua, ma o nisi o o tatou tagata ua le fiafia ona ua latou lagona faapea o le tausia o le aso Sapati ua faatapualaa ai a latou gaoioiga fai.10
E leai sa tatou aia e solia ai le aso Sapati. … Ou te faanoanoa tele i lena mea, e oo lava i nofoaga o le Au Paia o Aso e Gata Ai, e le o vaai totoa i ai nisi i lenei aoaoga faavae e tusa ma le mea e tatau ona i ai; o lo o i ai nisi o tatou e foliga mai ua lagona e matua sao lava le mulimuli i tu ma aga a le lalolagi e tusa ai ma lenei mataupu. Ua latou talia manatu ma lagona o le lalolagi e soli ai le poloaiga a le Alii. Ae afai tatou te faia o lea, o le a fai ma o tatou tiute le tali atu i le Alii, ma e tatou te le mafai ona solia lana upu ma maua faamanuiaga o e ua faamaoni.11
Usitai i le Upu o le Poto
O le Upu o le Poto o se tulafono faavae. Na te faasino maia le ala ma tuuina mai ia i tatou faatonuga uma e faatatau i taumafa ma mea inu, e aoga pe le lelei foi mo le tino. Afai tatou te mulimuli faamaoni i mea ua faamauina faatasi ma le fesoasoaniga a le Agaga o le Alii, tatou te le manaomia nisi fautuaga. O loo i ai i lenei faatonuga matagofie le folafolaga lea:
“Ma o le au paia uma o e e manatua e tausi ma faia nei upu, ma savavali i le usiusitai i poloaiga, o le a latou maua le maloloina i o latou pute ma le su i o latou ivi;
“Ma o le a latou maua le poto ma oa silisili o le malamalama, o oa natia lava;
Ma o le a taufetuli ae le vaivai, ma o le a savavali ae le matapogia. MF&F 89:18–20]12
E faitau piliona tala ua faaaluina i tausaga taitasi mo ava malosi ma tapaa. O le onā ma le eleelea inosia ua aumai e nei mea leaga i le aiga o tagata e faatamaia ai, e le gata i le soifua maloloina, ae faapea le puipuiga o le soifua lelei ma le faaleagaga o tagata.13
Ua malepelepe aiga e ala i le faateteleina o le faaaogaina o fualaau faasaina ma le soona faaaoga sese o fualaau faatagaina.14
E le tatau ona tatou faalogo i [le] tofotofoga ma faasalalauga amioleaga o mea e leaga ai le tino ma tausalaina e lo tatou Tama i le lagi ma lona Alo o Iesu Keriso, ua ese mai le talalelei ua la aumaia ia i tatou. …
E ao ona mama o tatou tino. E ao ona mama o tatou manatu. E tatau ona i ai i o tatou loto le naunau e auauna i le Alii ma tausi i ana poloaiga; ia manatua a tatou tatalo, ma i le lotomaulalo saili timaiga e ala mai le taitaiga a le Agaga o le Alii.15
Na faaali mai e le Alii le Upu o le Poto i le Perofeta o Iosefa Samita e fesoasoani ai i le Au Paia e maua le malosi faaletino ma le faaleagaga.
Faaaloalo i le suafa o le Atua
E ao ona tatou tausia le suafa o le Atua i le tulaga e sili ona paia ma mamalu lona faaaloalogia. E leai se mea sili ona tiga pe fesiligia ai lagona o se tagata lau silafia nai lo le faalogo i ni faamatalaga inosia, le faavaea, po o le eleelea e siomia ai le suafa o le Silisiliese. O nisi o tagata ua masani ai i gagana masoa ua foliga mai ua faigata ia i latou ona fai mai ni fuaiupu se lua pe tolu e aunoa ma le faamamafa—e pei ona latou manatu ai—o se tautinoga inosia ma le taufaifai. E i ai i latou e foliga mai ua latou manatu … o se mea lea e ausia e alii ma siitia ai lo latou tulaga mai le mea e masani ai le toatele o tagata, pe afai latou te faaaoga le gagana taufaifai. … O mea eleelea o soo se tulaga toilalo ma faatamaia ai le agaga, e ao ona aloese mai ai tagata uma o le Ekalesia ia faapei o ni mea oona.
O tala mananaia ua faaleagaina pea ona o le le malamalama o le au tusitala i le tulaga moni e faaaoga ai suafa paia. Afai e faaaoga le gagana taufaifai e i latou o e ua faaaloalogia ma lauiloa, o le a le faaleleia ai le tala ae ua faasese ese ai mai lona tauaogaina ma lona matagofie. … O se tulaga ese lea o nisi o tagata, ma o ni tagata lelei i na mea, ua manatu o le faaaogaina o ni gagana e aofia ai le suafa o le Alii, e faaopoopo ai le matagofie, atamai, po o le mana, ia latou tala! …
Mai isi tagata uma i luga o le fogaeleele, o le Au Paia o Aso e Gata Ai e ao ona uumau le mamalu ma le faaloalogia maualuga o mea uma ua paia. O tagata o le lalolagi ua le i aoaoina e pei ona aoaoina ai i tatou i nei mea, e ui o lo o i ai le toatele o tagata faamaoni, matatau, ma faamamaina i le lalolagi. Ae ua ia i tatou le taitaiga a le Agaga Paia ma faaaliga a le Alii, ma ua Ia aoaoina i le paia i tatou i o tatou aso o tatou tiute e faatatau i nei mea uma.16
O laei talafeagai ma le tausiga o le tulafono o le ola mama
E le tatau i le Au Paia o Aso e Gata Ai ona mulimuli i aga ma uiga le mama o le lalolagi. O i tatou o tagata o le Alii. Ua ia finagalo tatou te ola mama, ola amiolelei, ia tausia o tatou manatu i le mama ma faamaoni i le tausiga o ana poloaiga uma. Aisea tatou te mulimuli ai i le lalolagi, e le mafai i se a ona tatou tauagafau, e le mafai i se a ona tatou faia mea e finagalo le Alii tatou te faia?17
A o ou savali atu i le auala a o ou agai atu i le Ofisa o le Ekalesia po o le foi mai foi, ou te vaai i tamaitai talavou ma matutua, o le toatele o i latou o “afafine o Siona,” e le talafeagai o latou laei [tagai Isaia 3:16–24]. Ou te iloa o taimi ma aga e suia. … [Ae] o le mataupu faavae o le tauagafau ma le tausaafia e tumau e le suia. … O tulaga faatonuina ua ta’u mai e le Au Pulega Aoao a le Ekalesia e faapea o tamaitai, atoa ai ma alii, e ao ona talafeagai o latou laei. Ua aoaoina i latou i amioga talafeagai ma le tauagafau i taimi uma.
O lea, i la’u faamasinoga, o se vaaiga faanoanoa lea i “afafine o Siona” pe a le talafeagai o latou laei. I le ma lea, o lenei faaupuga e mo alii faapea foi ma tamaitai. Sa tuuina mai e le Alii poloaiga ia Isaraelu anamua e faapea e tatau i alii ma tamaitai ona ufiufi o latou tino ma usitaia le tulafono o le ola mama i taimi uma.
Ou te tuuina atu se talosaga mo le amio tauagafau ma le ola mama mo tagata uma o le Ekalesia, i alii ma tamaitai foi, ina ia nofomama, mama i o latou olaga, ma usiusitai i feagaiga ma poloaiga ua tuuina mai e le Alii ia i tatou. …
… O le ofuina o lavalava e le talafeagai, e foliga mai o se mea e le taua, e aveesea ai se mea mai o tatou tamaitai talavou po o alii talavou i le Ekalesia. E avea ma tulaga e faigata ai ona tausia ia mataupu autu e faavavau e tatou te ola ai pe afai tatou te toe foi atu i le afioaga o lo tatou Tamai i le lagi.18
2
O faamanuiaga ua folafola mai mo e faamaoni e sili mamao atu nai lo fiafiaga le tumau o le lalolagi.
[Na ta’ua e se tasi o le Ekalesia] na fai si ona le malamalama pe a ia totogi lana sefuluai ma tausi le Upu o le Poto, fai ana tatalo, ma taumafai e usiusitai i poloaiga uma ua tuuina mai e le Alii ia te ia, ae na ia tauivi ma faigata o le sailiga o mea e tausia ai o ia; ae o lona tuaoi e soli le aso Sapati, ou te manatu e ulaula ma inupia; ua ia te ia le mea ua ta’ua e le lalolagi o le ola fiafia, e le ano o ia i aoaoga a lo tatou Alii ma le Faaola o Iesu Keriso, ae o la e faamanuiaina.
E te silafia, e toatele tagata o le Ekalesia ua manatunatu i lea mea i o latou loto ma fesili pe aisea. Pe aisea ua foliga mai ai ua faamanuiaina lenei tamaloa i mea lelei uma o le lalolagi—e ui, o le tele o mea leaga ua ia manatu e lelei—ae o lea e toatele naua tagata o le Ekalesia o lo o taumafai, galulue ma le faamaoni e taumafai e ola ai i lenei lalolagi.
O le tali o se mea faigofie. Afai i nisi o taimi, ma o nisi o taimi ou te faia ai, o le alu i se taaloga soka po o se taaloga pesipolo po se isi nofoaga faafiafia, o taimi uma lava e siosiomia au e alii ma tamaitai e faapusa a latou sikaleti po o sika po o paipa palapala. E oo ina le manuia, ma fai ai foi si le fiafia. Ou te lilu atu ia Sister Samita, ma ou fai atu se tala i lona taliga, ona ia faapea mai lea, “Ia, o lena e te iloa le mea na e aoao mai ia te au. O loo e i ai i lo latou lalolagi. O lo latou lalolagi lenei.” Ma o lena e toe oo mai ai ia te au le malamalama. E sa’o, ua tatou i ai i lo latou lalolagi, ae ia le avea ai i tatou o ni ō le lalolagi.
O lea, ona o lo latou lalolagi lenei o lo o tatou ola ai, o lea ua latou manuia ai, ae ou uso e ma tuafafine pele, o le a oo mai le iuga o lo latou lalolagi. …
O le a oo mai le aso o le a tatou le i ai i lenei lalolagi. O le a suia. O le a tatou maua se lalolagi sili. O le a tatou maua se lalolagi e amiotonu, aua a afio mai Keriso, o le a ia faamamaina le lalolagi.19
Afai tatou te saili ma le maelega, tatalo e le aunoa, talitonu, ma savavali i le amiotonu, ua ia i tatou le folafolaga a le Alii o mea uma o le a galulue faatasi mo lo tatou lelei [tagai MF&F 90:24]. E le o se folafolaga tatou te saoloto ai mai tofotofoga ma faafitauli o le olaga, aua o lenei olaga faataitai ua fuafua tatou te maua ai le poto masani ma tulaga faigata ma feteenai.
O le olaga e le i fuafuaina ina ia faigofie, ae ua tautino mai e le Alii o le a ia faatupuina tofotofoga ma faafitauli uma ina ia lelei se taunuuga mo i tatou. O le a ia tuuina mai le malosi ma le poto e faatoilalo ai le lalolagi ma tutu mausali ai i le faatuatua e ui lava i mea faafeagai uma. O se folafolaga e maua ai e i tatou le filemu i o tatou loto e ui i le vevesi ma faalavelave o le lalolagi. Ae o le mea sili, o se folafolaga e faapea a maea lenei olaga, o le a agavaa i tatou mo le filemu e faavavau i le afioaga o Ia o loo tatou saili i ona fofoga, o ana tulafono ua tatou tausia, ma o le ua tatou filifilia e auauna i ai.20
3
A tatou faamuamua le malo o le Atua i o tatou olaga, ua tatou galulue o ni malamalama i le lalolagi ma faia se faataitaiga mo isi e mulimuli ai.
O le Au Paia o Aso e Gata Ai ua faapei o se aai ua tu i luga o le mauga e le mafai ona lilo, ma faapei o le lamepa e aumai ai le malamalama ia i latou o loo i totonu o le fale. O lo tatou tiute le faapupula atu o lo tatou malamalama o se faataitaiga o le amiotonu, e le gata mo tagata i le mea o lo o tatou nonofo ai, ae mo tagata o le lalolagi atoa. [Tagai Mataio 5:14–16.]21
Matou te naunau e vaai i le Au Paia i nuu taitasi ua maua le atoatoaga o faamanuiaga o le talalelei ma tulai mai o ni taitai faaleagaga i o latou nuu.22
Uso e ma tuafafine, tatou tausia poloaiga a le Atua e pei ona faaalia mai. Sei o tatou faia se faataitaiga i luma o tagata o le lalolagi, ina ia latou, iloa a tatou galuega lelei, ma lagona ia salamo ma maua le upumoni ma talia le fuafuaga o le faaolataga, ina ia latou maua le faaolataga i le malo selesitila o le Atua.23
Ou te tatalo o le a tutulai malosi le Au Paia e tetee atu i uunaiga ma tofotofoga a le lalolagi; ina ia latou faamuamua i o latou olaga mea o le malo o le Atua; ina ia latou faamaoni i mea uma ma tausia feagaiga taitasi.
Ou te tatalo mo tupulaga talavou tuputupu ae ina ia latou tausia mama o latou manatu ma tino—ia saoloto mai amio le mama, mai le faaaoga sese o fualaau faasaina, ma mai le agaga o le fouvale ma le le usitaia o amio tausaafia lea ua lilofia ai le laueleele.
Lo matou Tama, liligi mai lou Agaga i luga o au fanau nei ina ia faasaoina i latou mai mea faigata o le lalolagi ma tausia le mama ma le le pona, ina ia agavaa ai o nisi e toe foi atu i lou afioaga ma ola ai ma lau afio.
Ma ia i ai lou alofa laveai ma i latou o lo o saili i ou fofoga ma o lo o savavali i ou luma i le faamaoni o o latou loto, ina ia avea i latou ma malamalama o le lalolagi, o ni mea faigaluega i ou aao e faataunuu ai le faamoemoega i le lalolagi.24
Fautuaga mo Suesuega ma le Aoaoina Atu
Fesili
-
A o e faitau i le “Mai le Soifuaga o Iosefa Filitia Samita,” mafaufau i luitau e feagai ma le autalavou i ona po nei pe a le faatasi ma o latou matua po o taitai matutua. O a mea tatou te mafai ona fai e fesoasoani ai i le autalavou ina ia tumau le faamaoni i ia tulaga?
-
O a ni faamanuiaga e oo mai ia i tatou a o tatou tausia poloaiga o loo ta’ua i le vaega 1?
-
E faapefea ona e faaaogaina aoaoga i le vaega 2 e fesoasoani ai i se tasi ua tosina atu i mea o le lalolagi? E faapefea ona tatou maua le “filemu i o tatou loto e ui i le vavao ma faalavelave o le lalolagi”?
-
E faapefea ona fesoasoani a tatou faataitaiga i isi e lafoai ai i ala o le lalolagi? (Tagai vaega 3.) O anafea na e vaai ai i le mana o faataitaiga amiotonu? Mafaufau i mea e mafai ona e fai e faatulaga ai se faataitaiga amiotonu mo lou aiga ma isi.
Mau Fesootai
Mataio 6:24; Mareko 8:34–36; Ioane 14:27; Filipi 2:14–15; Moronae 10:30, 32
Fesoasoani mo le Aoaoina Atu
“E mafai ona e faailoa lou alofa mo i latou ua e aoaoina e ala lea i le faalogo totoa ia i latou ma ia faamaoni lou fiafia i o latou olaga. O le alofa Faa-Keriso ua i ai le mana e faamaluluina ai loto ma fesoasoani i tagata e faalogo i musumusuga a le Agaga” (O Le Aoao Atu, E Leai Se Isi Valaauga e Sili Ai [1999], 46).