Mataupu 23
Tiutetauave o Tagata Taitoatasi
“Tatou te faamoemoe mo o tatou tagata o le Ekalesia i soo se mea e aoao i mataupu faavae sao e pulea ai i latou lava.”
Mai le Soifuaga o Iosefa Filitia Samita
Sa savali atu le uso ia D. Arthur Haycock agai atu i le Maota o le Pulega a le Ekalesia i se tasi aso ina ua ia vaai atu ia Peresitene Iosefa Filitia Samita o tatala le faitotoa i le itu o le fale. O lona manao e ulufale atu i le fale o lo o galue ai o se failautusi a le Korama a Aposetolo e Toasefululua, sa “faavavevave atu ai i luga o faasitepu ia le uso ia Brother Haycock, lua pe tolu i le taimi e tasi, ina ia tu atu i totonu o le faitotoa a o lei tapunia. Toeitiiti lava a ia le maua atu. A o agai atu i totonu o le fale sa ia toe faavavevave atu foi ina ia maua atu Peresitene Samita la te savavali faatasi atu i le lifi. Sa ia faapea atu ia te ia, ‘Ou te faamoemoe e faapea ona ou laki i le faavava atu i le lagi i le faitotoa e te tatalaina.’” I le amataga sa le i tali mai Peresitene Samita, ma e sa popole le uso ia Haycock ina nei avea lona taumafai e fai se tala malie, ae ua alu atu ai ma se tala sese. Ae “ina ua la taunuu atu i le lifi na saunoa atu Peresitene Samita, ma faaivi atu lona mata, ‘O lenei, uso, aua nei e faamoemoe i lena mea!’”1
E ala i lauga ma gaoioiga, sa aoao atu pea lava pea e Peresitene Samita le mataupu faavae sa ia faasoa atu i le uso ia Brother Haycock: Na ia faamamafa atu e ui ina alagatatau i le Au Paia ona fesoasoani ma le maelega i isi ia maua faamanuiaga o le talalelei, o le faaolataga o le tiute o tagata taitoatasi. Sa ia fautuaina foi le Au Paia ina ia faamoemoe le tagata ia te ia lava ma ia galue ma le maelega i tulimataiga o lenei soifuaga. “O le uiga tonu lena o le olaga,” na ia saunoa ai, “ina ia atiina ae o tatou gafatia, aemaise o le maua o le pulea o le tagata lava ia.”2
Sa aoao e Iosefa Filitia Samita e galue a o laitiiti o ia. Sa masani ona tuua e lona tama lo latou aiga, o lea sa “ia faaaoga ai le tele o lona soifua faatamaitiiti e faia ai galuega e faia e se tagata matua.” O le mea moni, o ia o se tagata galue maelega sa ia “le manatu ua ia maua se tasi o galuega i le amataga na te lei manaomia, i le mitamita ai o se tamaitiiti sa ia tatauina faanana ai le susu o se tasi o povi a le aiga ina ia faamaonia ai lona tomai e faia ai, ma o lea sa tofia ai o ia e faia tumau lena galuega.”3
Na faaauau pea lona naunau e galue ina ua avea o se faifeautalai i Egelani. Sa tusia e lona faletua o Louie lenei tusi ia te ia ao i ai iina: “Ou te iloa e sili atu lou fiafia e galue nai lo le faafiafia, o lea e tele ai lo’u alofa ma le faatuatua ua ou lagona ua e latalata ina avea o se alii talavou ua atoatoa.”4 E le gata i le faataunuuina o lona tiute e aoao atu le talalelei i isi, ae sa ia galue ma le malosi e aoao le talalelei e ia lava. I se tasi o tusi na ia lafo atu i le fale, sa ia tau atu lona taumafai e tauloto vaega o mau: “Sa ou taumafai i le aso atoa e aoao se fuaitau o mau ae e lei maua lava. Ae ua ou naunau e aoao a o le i maea.”5
Na pasi faasolo atu e Peresitene Samita lona talitonuga i le galue, i lana fanau. Sa ia fai atu ia i latou: “E maliliu tagata i o latou moega. Ma e faapena foi i le agaga taumafai.” I le i ai o lenei mataupu faavae i le mafaufau, sa faamautinoa e ia ma lona faletua e ala po la laua fanau i taeao uma ma faia o latou tiute ina ia tumau ai le mama ma le faatulagaina lelei o lo latou aiga. “Sa foliga mai e le o se amiolelei ia tama lo matou taooto i moega ae ua tea le ono,” na manatua ai e se tasi o ona atalii. “Ioe sa na o le faa-tasi ona ou faia. Sa iloa e tama lena mea.”6 Na fesoasoani foi Peresitene Samita i le teuina o le fale. E le i leva ona faaipoipo i laua ma Louie, sa ia faia galuega na ia mafai ona fai i le fausiaina o lo laua fale muamua. I le gasologa o tausaga, sa tele ina galue o ia e lipea fale e ia lava, fesoasoani i le kukaina o taumafa, ma fesoasoani e tau fua o laau ma tuufagu.7
O Brother Haycock, le alii lava lea na faavavevave e mulimuli atu ia Peresitene Samita i totonu o le Maota o le Pulega o le Ekalesia, na mulimuli ane ua avea ma failatusi i Peresitene e lima o le Ekalesia e aofia ai ma Peresitene Samita. I lenei fegalegaleaiga vavalalata, na ia vaaia ai le faaauau pea ona taumafai ia Peresitene Samita e faaleleia o ia lava faaleagaga. Fai mai a ia e masani ona ia savali atu i le ofisa o Peresitene Samita ma iloa ai o lo o ia suesue i tusitusiga paia po o faitau se isi tusi.8
Aoaoga a Iosefa Filitia Samita
1
Ua finagalo le Alii ina ia tatou maelega i le sailia o faamanuiaga faaletino ma le faaleagaga.
Na fetalai le Alii ia [Atamu]: “E te ai foi au mea e ai ma le afu o ou mata” [Kenese 3:19; tagai foi Mose 4:25], ma i le faasologa o tausaga na valaau atu le Alii i ona tagata ina ia maelega, ia auauna ia te ia i le faatuatua, ia galulue. …
I le tau amata mai o le Ekalesia i nei vanu [i Iuta], e tele le faamamafa na tuuina atu i galuega e Peresitene Polika Iaga ma isi au uso, ma ua alagatatau aua na malaga mai o tatou tuaa iinei e aunoa ma se mea. Sa latou galulue. Sa latou toaaga. Sa alagatatau lo latou faia o mea sa manaomia, ma o lea sa faatonuina ai i lea tulaga ma sa tuuina atu pea lava pea ia i latou le faasinoala ina ia latou toaaga. Sa aoaoina i latou ina ia le femitai i o latou loto. Na latou o mai iinei ina ia latou tapuai i le Alii lo latou Atua ma tausi i ana poloaiga. Sa poloaiina i latou e lotomaulalo ma ia maelega foi. … Oi, maimau e pe ana tatou manatua lena. Ou te faanoanoa aua ua tatou faagaloina. …
… Na fetalai le Alii, “Aua e te paie; ona o ia e paie o le a le ‘ai i le areto pe ofu i ofu o le e galue.” [MF&F 42:42.] E logo lelei ma tonu lena, e sao lea? O le a le mea o le a manuia ai fua le tagata paie i galuega a e e toaaga—pe a faapea o lea tagata paie, o lo o malosi ma e mafai ai ona galue o ia? Ou te le alofa lava i so o se ituaiga o gaoioiga e faamoemoe e faaleaga i le tagata e ala lea i le uunaia o i latou ina ia paie, ma ou te le popole po le a le matua o i ai. E le taulia le matua o i ai, afai ua malosi le tino o le tagata ma ua mafai ona faia galuega, e tatau ona tausia e ia o ia lava; o le finagalo lea o le Alii mo ia.
Na fetalai le Alii i le isi faaaliga:
“O lenei foi, e moni Ou te fai atu ia te outou, o alii taitoatasi ua ia te ia le tiute e tausi ai lona lava aiga, ia tuu atu ia te ia e fai, ma o le a leai se ala o le a le maua ai e ia lona pale; ma ia tuu atu ia te ia e galue i le ekalesia. Tuu atu i tagata taitoatasi ia filiga i mea uma. Ma o le e paie o le a leai sona tulaga i le ekalesia, vagana ai ua salamo o ia ma suia ona ala.” [MF&F 75:28–29.]
O le fautuaga lena na tuuina atu e le Alii i le Ekalesia mo aso nei. Ma e le faapea ua na o le suotosinaina o le fanua, po o le selesele ma ao fua o faatoaga ma punouai i galuega, ae o le uiga ia faapena foi i le tagata ona toaga i mea faaleagaga faapea ma mea faaletino o lo tausia ai o ia.9
Ua tatou i ai iinei mo se faamoemoega sili. O lena faamoemoega e le o le ola i le 100 tausaga pe itiiti ifo, ma toto o tatou fanua, selesele fua o a tatou faatoaga, aoina fua o laau, nonofo i fale, ma siosiomia i tatou i mea moomia o le olaga faitino. E le o le faamoemoega lena o le olaga. O nei mea e tatau mo lo tatou soifuaga iinei, ma o le mafuaaga lena e ao ai ona tatou toaaga. Ae toafia tagata ua faaalu lo latou taimi e mafaufau ai o le mea lava i lenei olaga o le faaputu o mea o lenei lalolagi, ola filemu, ma siosiomia i latou i mea taugata uma, ma avanoa manuia, ma mea faafiafia e mafai e le olaga faitino ona maua, ma e leai lava se mafaufau i se mea i talaatu?
Aisea, o nei mea uma o faamanuiaga e maua ae le tumau. Tatou te aai ina ia ola. Tatou oofu ina ia maua le mafanafana ma ufiufi o tatou tino. E i ai o tatou fale e nonofo ai mo lo tatou fiafia ma le faigofie, ae tatou te vaai i nei faamanuiaga uma e le tumau e manaomia a o tatou malaga i lenei olaga. Ma e na o le pau lava lena o le aoga o na mea ia i tatou. Tatou te le mafai ona ave se mea o nei mea ma i tatou pe a tatou tuua lenei olaga. O auro, siliva ma maa taua, ua taua o le tamaoaiga, e leai se aoga i le tagata ua na ona mafai ai ona ia tausi ia te ia lava ma faamalieina ona manaoga iinei.10
O le Alii … ua ia finagalo mo i tatou ina ia maua le atamai i mea o lenei soifuaga ina ia tatou tausi ia i tatou lava mo se vaitaimi; ina ia tatou auauna ai i o tatou uso; ma ia mafai ai ona tatou aveina atu le feau o le talalelei i isi o ana fanau i le lalolagi atoa.11
“Ua faamoemoe le Alii … ia tatou maua le malamalama i mea o lenei soifuaga.”
O le faamoemoe o lo tatou i ai iinei o le faia lea o le finagalo o le Tama e pei ona faia i le lagi, ina ia galue le amiotonu i le lalolagi, ia faaitiitia le amioleaga ma tuu i lalo o o tatou vae, ia manumalo mai le agasala ma le fili o o tatou loto, ia tulai i luga ae o le le atoatoa ma vaivaiga o le pau o le tagata, e ala i le musumusuga a le Alii ma lona mana faaali, o le a avea o ni tagata paia ma auauna a le Alii i le lalolagi.12
2
Tatou te tali atu i le Alii mo le faataunuuina o o tatou tiute
O lo o tatou feagai ma lo tatou faatuatua ma le mafaufau loloto; tou te le o feagai ma au, e le ma le Au Peresitene o le Ekalesia, ae ma le Alii. Ou te le o feagai ma tagata e faatatau i lau sefuluai—o lo o ou feagai ma le Alii; o lea, e tusa ai ma lau lava amio i le Ekalesia ma lou tausia o isi tulafono ma aiaiga a le Ekalesia. Afai ou te le faamaoni i le tausia o tulafono a le Ekalesia, o la’u matafaioi lea i le Alii ma ou te tali atu ia te ia, i lea ma lea, ona o lo’u faatamala i lo’u tiute, ma atonu ou te tali atu i le Ekalesia e tusa ai ma lo’u auai. Afai ou te faia lo’u tiute, e tusa ai ma lou malamalama i tuutuuga ua saunia e le Alii mo au, e tatau ona i ai so’u mafaufau e aunoa ma se solitulafono. E tatau ona i ai so’u faamalieina i totonu o lo’u loto ua mafai ona ou faia lo’u tiute e pei ona ou malamalama i ai, ma o le a ou talia ni taui. Mo au, o se tulaga i le va o au ma le Alii; e faapena foi ia i tatou taitoatasi.
O Ia o le na auina mai lona Alo Pele e Toatasi i le lalolagi, ina ia faataunuuina le misiona na ia fai, e faapea ona auina atu agaga taitasi o e o faalogo mai i lou leo, ma faapea alii ma tamaitai uma i le lalolagi, ina ia faataunuuina se misiona, ma o lena misiona e le mafai ona faatauuuina pe a lē amanaiaina, po o le le faatauaina, e le mafai foi ona ausia i le valea.
E ao ona tatou aoao ia tatou matafaioi i le Alii ma isi; o nei mea e tatau, ma tatou te le alualu i luma i mea faaleagaga, e le mafai ona tatou agai i luma i le malamalama o le Alii po o le atamai, e aunoa ma le tuuina atu atoa o o tatou manatu ma taumafaiga i le faaleleia o i tatou lava, i le faateleina o lo tatou poto ma le atamai i mea a le Alii.13
E ese le faigofie i tagata ona tuuaifua se isi mo a latou mea sese, ma e ese le faigofie ia i tatou, ona o lo tatou natura faaletagata, o le tauleleia pe a faapea o le mea ua faataunuuina o se mea e fiafia ma manuia ai. Ae tatou te le mananao lava e tauave se tiutetauave mo a tatou mea sese e le maua ai le fiafia, ma o lea ua tatou taumafai ai e tuu lena ituaiga o tiutetauave i se isi mea po o luga o nisi. … Ia tatou tauaveina a tatou lava avega ae aua le taumafai e tuu atu i se isi mea.14
3
Ua tuuina mai e le Atua le faitalia ma ua faamoemoe mai tatou te faia mea uma tatou te mafaia mo i tatou lava.
O le faitalia [o] le meaalofa sili ua tuuina mai e le Alii i luga o agaga taitasi e galue ai mo ia lava, e fai ana lava filifiliga, ina ia fai ma sui e i ai le mana e talitonu ai ma talia le upumoni ma maua le ola e faavavau po o le teena o le upumoni ma maua ai le faanoanoa o le mafaufau. O le tasi lenei o meaalofa sili a le Atua. E faapefea i tatou e aunoa ma lenei, afai e faamalosia i tatou e faapei o nisi e mananao e faamalosi o latou uso e usiusitai i mea latou te mananao i ai? O le a leai se faaolataga; o le a leai ni taui mo le amiotonu; e leai se tasi e faasalaina mo le le faamaoni aua o le a le tali atu tagata i luma o le na faia i tatou.15
Sa fesiligia Iosefa Samita pe faapefea ona ia pulea le toatele o tagata eseese e pei o tagata o le Au Paia. Na ia tali atu: “Ou te aoao i latou i mataupu faavae sao ona pulea ai lea e i latou i latou lava.”
O le mataupu faavae lenei tatou te galulue ai i le Ekalesia. Tatou te faamoemoe i o tatou tagata i soo se mea e aoao mataupu faavae sao ma ia pulea e i latou i latou lava.16
E leai se tagata, e tusa ai ma le tulaga i le Tama, sa faamalosia e fai le lelei. … E galue le tagata lava ia mo ia lava.”
O lenei meaalofa sili o le faitalia, o le avanoa lea ua tuuina atu i le tagata e fai ai lana lava filifiliga, e le i aveesea lava ma o le a le aveesea lava. O le mataupu faavae e faavavau e tuuina atu ai le saolotoga o manatu ma gaoioiga i tagata taitasi. E leai se tagata, e tusa ai ma le tulaga i le Tama, sa faamalosia e fai le lelei; e leai se tagata ua faamalosia e fai le leaga. E galue le tagata lava ia mo ia lava. O le fuafuaga a Satani le faamalepeina o lenei faitalia ma faamalosia tagata e fai lona loto. O le a leai se ola fiafia e aunoa ma lenei meaalofa sili. E ao i tagata ona maua le avanoa e filifili ai e ui lava atonu o le a latou fouvale ai i tulaga faalelagi. Ioe o le faaolataga ma le faaeaina e oo mai i le agaga saoloto e aunoa ma le faatauanau ma o le tagata lava ia ina ia tuuina atu taui amiotonu ma faasalaga mo e solitulafono.17
Tatou te talitonu i le alofa tunoa ua faaolaina ai i tatou pe a uma ona tatou faia mea uma tatou te mafai ona fai, ma o lena atinae i luga o le faavae o le togiola a Keriso, e tatau i tagata uma ona galulue mo o latou faaolataga i le matau ma le gatete i luma o le Alii [tagai 2 Nifae 25:23; Mamona 9:27].18
O se mea taua lea, e faaalia i gaoioiga tuusao ma taunuuga i tusitusiga paia uma, o mea uma na faia e le Atua mo tagata o mea uma e le mafai e tagata ona fai mo i latou lava ina ia maua ai le faaolataga, ae ua ia faamoemoeina tagata ia faia mea uma mo i latou lava i le malosi latou te mafai.
I lenei mataupu faavae e feteenai ma le faatulagaga o le lagi na amata ao le i faavaeina le lalolagi, mo avefeau paia o e na pasi mai le toetutu, po o avefeau e o mai i le li’o faalelagi, e o mai i le lalolagi ma faatino galuega mo tagata e mafai ona faia e i latou lava. …
O se mea sese matuia le talitonu na faia e Iesu mea uma mo le tagata pe afai e tautau atu a latou agasala i o latou laugutu, a e leai se isi mea latou te fai. E i ai galuega a tagata e fai pe afai latou te maua le faaolataga. Na ogatasi ma lenei tulafono e faavavau na faasino ai e le agelu ia Konelio ia Peteru [tagai Galuega 10], ma e sa auina atu Anania ia Paulo [tagai Galuega 9:1–22]. Sa faapea ona fai i le usiusitai i lenei tulafono, o Moronae, o le na malamalama i tusitusiga i luga o papatusi a Sa Nifae, sa ia le i faia le faaliliuga, ae i lalo o le taitaiga a le Alii, na avatu ai ia Iosefa Samita le Urima ma le Tumena sa mafai ai ona ia faataunuuina lena galuega taua e ala i le meaalofa ma le mana o le Atua.19
4
O o tatou tiutetauave tetele e lua o le saili i lo tatou lava faaolataga ma galulue maelega mo le faaolataga o isi.
Ua ia i tatou nei tiutetauave tetele e lua. … Muamua, ia saili lo tatou lava faaolataga; ma le, lona lua, o lo tatou tiute mo tatou uso a tagata. O lea ou te malamalama o lo’u tiute muamua e pei ona ou manatu i ai au lava, o le sailia lea o lou lava faaolataga. O lo outou tiute taitoatasi muamua lena, ma e faapea i tagata taitasi o lenei Ekalesia.20
O lo tatou popolega muamua o lo tatou lava faaolataga. E ao ona tatou saili i faamanuiaga uma o le talalelei mo i tatou lava. E ao ina papatisoina i tatou ma ulufale atu i le faatulagaga o le faaipoipoga e faavavau ina ia tatou mautofi i le atoatoaga o le malo o lo tatou Tama. Ona tatou popole ai lea i o tatou aiga, o a tatou fanau, ma o tatou tuaa.21
O lo … tatou tiute o le faaola o le lalolagi, o e ua maliliu e faapea ma e o soifua. O lo o tatou faaolaina i latou o lo o soifua o e o le a salamo e ala i le talaiga o le talalelei i nuu ma le faapotopotoina o fanau a Isaraelu, o e faamaoni i o latou loto. Ua tatou faaolaina e ua maliliu e ala lea i le malaga atu i le maota o le Alii ma faia nei sauniga—o le papatisoga, o le faaeega o lima, faamauga, ma isi mea e pei ona finagalo i ai le Alii tatou te fai—e avea ma o latou sui.22
O lo’u tiute, o lou tiute foi lea, ou uso e ma tuafafine foi—aua o le tiutetauave ua tuuina atu foi i o outou luga—e fai ai le mea silisili i le malosi tou te mafai, ae le o le faafiti, ae taumafai ma lo tatou loto atoa e faalautele valaauga ua tuuina mai e le Alii ia i tatou, e galulue ai ma le maelega mo le faaolataga o o tatou lava aiga, i tatou taitoatasi, ma le faaolataga o o tatou tuaoi, le faaolataga o i latou o i atunuu mamao.23
Fautuaga mo Suesuega ma le Aoaoina Atu
Fesili
-
O le a se mea e te fiafia i ai e uiga i taumafaiga a Peresitene Samita e aoao ana fanau e galulue? (Tagai “Mai le Soifuaga o Iosefa Filitia Samita.”) O a ni mea e mafai ona tatou fai e fesoasoani ai i tamaiti ina ia taunapa i ai?
-
E faapefea ona faateleina e aoaoga i le vaega 1 lou malamalama i le faalagolago ia te oe lava? Mafaufau i mea e mafai ona e faia ina ia e faalagolago atili ai ia te oe lava.
-
Toe iloilo le fautuaga i le vaega 2. O le a le uiga ia te oe o le “tali atu i le Alii”?
-
Na aoao mai e Peresitene Samita, “Tatou te faamoemoe mo o tatou tagata o le Ekalesia i nofoaga uma e aoao mataupu faavae sao ma ia ola ai lava latou” (vaega 3). E faapefea e lenei aoaoga ona manuia ai aiga? E faapefea ona taitaiina ai korama a le au perisitua ma Aualofa?
-
I a tatou taumafaiga e auauna i isi, aisea e te manatu ai “o lo tatou popolega muamua e mo lo tatou lava faaolataga”? (Tagai vaega 4.)
Mau Fesootai
Fesoasoani mo le Aoaoina Atu
“A o e aoao atu mai lenei tusi, valaaulia nisi e faasoa mai o latou manatu, fai ni fesili, ma aoao atu e le tasi le isi. A latou auai ma le maelega, o le a sili ona saunia i latou e aoao ma maua faaaliga patino” (mai itulau viii-ix i lenei tusi).