Mataupu 8

O Le Ekalesia ma le Malo o le Atua

“Ia iloa e tagata uma ma le mautinoa o le Ekalesia lenei a le Alii ma o lo o taitaiina e ia ana mataupu. Se faamanuiaga ina a maoae le avea ma sui auai o se faalapotopotoga paia!”

Mai le Soifuaga o Iosefa Filitia Samita

O le auaunaga a Iosefa Filitia Samita o se Peresitene o le Ekalesia, mai ia Ianuari 23, 1970, ia Iulai 2, 1972, o le faatumutumuga o lona soifua auauna i le malo o le Alii. Sa ia talasua e faapea o lona uluai tofiga i le Ekalesia na oo mai a o pepe o ia. I le iva o ona masina, o ia ma lona tama, o Peresitene Iosefa F. Samita, na malaga faatasi ma Peresitene Polika Iaga i St. George, Utah, e auai i le faapaiaga o le Malumalu o St. George.¹

A o talavou o ia, sa faataunuu e Iosefa Filitia Samita se misiona ma mulimuli ane sa valaauina e fai ma peresitene i le korama o le perisitua ma o se sui o le fono faatonu o le Faalapotopotoga mo le Faaalualuina i Luma o le Mutuale a Alii Talavou (o le igoa muamua o le faalapotopotoga ua ta’ua nei o Alii Talavou). Sa ia galue foi o se failautusi i le ofisa o le Tusitalafaasolopito o le Ekalesia, ma sa ia fesoasoani lē leoa o se failautusi lē aloaia ina ua avea lona tama ma Peresitene o le Ekalesia. O nei avanoa e galue auauna ai, sa talisapaia ai e Iosefa Filitia Samita ia le faalapotopotoga musuia a le Ekalesia ma lana matafaioi e taitai ai tagata taitoatasi ma aiga i le ola e faavavau.

Sa faauuina Iosefa Filitia Samita o se Aposetolo a le Alii o Iesu Keriso ia Aperila 7, 1910. Na avea o ia o se sui o le Korama a Aposetolo e Toasefululua mo le toeitiiti 60 tausaga, e aofia ai le toetoe 20 tausaga na avea ai ma Peresitene o lena Korama. I le avea ai o se Aposetolo, sa ia fesoasoani e taitaiina le Ekalesia i le lalolagi. Sa ia auai i le tele o vaega o le misiona a le Ekalesia, sa avea ma Tusitalafaasolopito o le Ekalesia, peresitene o le Malumalu i Sate Leki, peresitene o le Sosaiete o mea tau Gafa i Iuta, ma se Fesoasoani i le Au Peresitene Sili.

Joseph Fielding Smith holding open scriptures. — O Peresitene Iosefa Filitia Samita, o se auauna tuuto i le malo o le Alii

O se tama e faigofie ma lotomaulalo, sa le i sailia lava e Iosefa Filitia Samita nei tofiga. Ae ina ua valaauina o ia e le Alii e auauna atu, sa ia usiusitai ma le naunautai ma le fiafia. Sa ia faaalia ma le filemu lona galue faamaoni i se tasi aso, i le 89 o ona tausaga, sa ia alu ai i se fono. A o savali mai lona fale, sa se’e o ia ma pau ai i lalo o ni fasitepu. E ui ina sa tiga lona vae, ae sa ia savali e tusa o le kuata o le maila—“setusetu e pei o se toeaina matua,” na ia fai mai ai— ina ia faataunuuina lona tiute. Ina ua maea le fono, sa ia savali atu i le fale, ma ia faatagaina ai loa le fomai e siaki o ia. Na maua e le fomai e tele vaega o le ponaivi o le aao o Peresitene Samita ua taei. Mulimuli ane na ta’ua e Peresitene Samita le mea na tupu. “Na fai si umi o le fono,” na ia fai mai ai. “Ae o le tele lava o fono e faapena.”²

I se savali mo le autalavou a le Au Paia o Aso e Gata Ai, na faasoa atu ai e Peresitene Samita le mafuaaga na ia matua tuuto atu ai i le galuega a le Ekalesia:

“Ou te iloa o lo o soifua le Atua. Ou te iloa o Iesu Keriso o le Alo Pele e Toatasi i la le tino o lo tatou Tama. E atoatoa lou faatuatua i le misiona a le Perofeta o Iosefa Samita ma i latou na mulimuli mai ia te ia.

“Ou te iloa ua ia i tatou le upumoni o le talalelei e faavavau a Iesu Keriso, e faapei ona ou iloa o loo ou ola. Ana ou le iloaina, ou te le manao ou te i ai iinei pe i ai sa’u mea e fai i lenei galuega. Ae ua ou iloaina i alava ninii taitasi o lou tino. Ua faaali mai e le Atua ia te au.”³

Aaoga a Iosefa Filitia Samita

Ina ua tuanai seneturi o le pouliuli faaleagaga ma le liliuese, na toefuatai mai e le Alii Lana talalelei ma faatulaga Lana Ekalesia i le lalolagi

Ua uma [ona] toefuatai mai e le Alii le talalelei ma toe faatulaga lana Ekalesia i luga o le fogaeleele. O le mafuaaga o lenei faatulagaga ma le toefuataiga ona o le tele o seneturi na i ai le lalolagi i le pouliuli faaleagaga, e aunoa ma le pule, ma e aunoa ma le malamalama; sa latou le iloa le ala e tapuai ai i le Atua soifua. …

Sa motusia le feagaiga e faavavau; na mou atu le malamalama moni o mataupu autu o le talalelei ona o le liliuese; na taofia mai tagata le aia e taitai ai sauniga o le talalelei. Na oo ai ina ua alagatatau ona toefuatai mai vaega uma, ma ia faateleina ai le faatuatua o tagata e ala i le tatalaina o le lagi ma le toefuataiga mai o le talalelei.

O lea na auina mai ai e le Alii ana avefeau mai lona afioaga, ma le atoatoaga o le talalelei, ma le mana, ma le pule o le perisitua e tuuina atu i alii, ma tuuina atu ia i latou poloaiga … aua na silafia e le Alii le malaia o le a oo mai i luga o e o nonofo i le lalolagi, ma o lona finagalo o se lapataiga talafeagai, ma le avanoa e talia ai le talalelei ia tuuina atu i tagata ina ia latou salamo ma liliuese mai a latou auala leaga ma auauna atu i le Alii [tagai MF&F 1:17–23].⁴

Matou te folafola atu o Le Ekalesia a Iesu Keriso o le Au Paia o Aso e Gata Ai o le malo o le Atua i le lalolagi, ua na o lenei le nofoaga e o mai i ai tagata e aoao mataupu faavae moni o le faaolataga ma maua ai le pule o le perisitua paia.⁵

Ou uso e ma tuafafine pele: E le mafuatiaina lo’u loto faafetai mo faamanuiaga ua foai mai e le Alii ia te au, ma mo tagata faatuatua o lana ekalesia i nuu eseese o le lalolagi, ma mo ana fanau uma i soo se mea.

Oute faafetai ia te ia i aso uma o lou olaga ua ia toefuatai i nei aso e gata ai o lana talalelei e faavavau mo le faaolataga o i latou uma e talitonu ma usiusitai i ana tulafono.⁶

O le Alii lava Ia o loo taitaia le galuega a le Ekalesia, ma o lo tatou faamanuiaga lo tatou auai ai.

O Le Ekalesia a Iesu Keriso o le Au Paia o Aso e Gata Ai i le tulaga moni lava, o le malo lea o le Atua i le lalolagi.⁷

Ou te manao e faapea atu e leai se tagata ia te ia lava e mafai ona taitai lenei ekalesia. O Le Ekalesia a le Alii o Iesu Keriso; o ia o le āo. O lo o tauave e le ekalesia lona suafa, o i ai lana perisitua, taitai lana talalelei, aoao atu ana aoaoga faavae, ma fai lana galuega.

Na te filifili tagata ma valaau i latou e avea ma meafaigaluega i ona aao ina ia faataunuuina lona finagalo, ma e na te taiala ma taitai i latou ia latou galuega. Ae o tagata ua na o ni meafaigaluega i aao o le Alii, ma o le mamalu ma le viiga mo mea uma ua faataunuuina e ana auauna e faafoi atu ia te ia e faavavau.

Ana fai o le galuega lenei a le tagata, o le a iuvale, ae o le galuega a le Alii, ma e le iuvale lava. Ma ua ia i tatou le faamaoniga afai tatou te tausi i poloaiga ma totoa i le molimau ia Iesu ma faamaoni i faamoemoega uma o le a taiala ma taitaia e le Alii i tatou ma lana ekalesia i le ala o le amiotonu, mo le faataunuuga o ona faamoemoega uma.⁸

I tagata uma o le Ekalesia i le lalolagi ou te fia tau atu o lenei ekalesia e i ai lana misiona na tofia mai le lagi e faatinoina i lalo o le faatonuga ma le taitaiga a Iesu Keriso, lo tatou Faaola, ma e leai se mea e taofia lana fuafuaga e faatatau i ai. O le a faataunuu le fuafuaga a lo tatou Tama i le lagi. Ou te faamoemoe i le Au Paia i le lalolagi latou te faafetai i le Alii i aso uma ona o lo latou auai i lana ekalesia ma mo le misiona a le Perofeta o Iosefa Samita i le toefuataiga o le talalelei mo lo tatou olioli ma le fiafia.⁹

Mo e faamaoni i o latou loto i nuu uma matou te fai atu: E alofa le Alii ia te outou. Ua ia finagalo ia outou maua le atoatoaga o faamanuiaga o le talalelei. Ua ia valaauina nei outou ia talitonu i le Tusi a Mamona, ia talia Iosefa Samita o se perofeta, ma ia o mai i lona malo faalelalolagi ma avea ai ma suli i le ola e faavavau i lona malo faalelagi.¹⁰

Sa leai lava se taimi talu mai le amataga o le faatulagaga o le Ekalesia na taitaiina ai e se tagata le Ekalesia. E le i faia i aso o Iosefa Samita po o Polika Iaga; sa le i faia lava talu mai lena taimi. O le galuega lenei a le Alii, ma ia aua nei galo o le Silisiliese lava o le a faia lenei galuega, ae le o le tagata.¹¹

Ou te iloa o Le Ekalesia a Iesu Keriso o le Au Paia o Aso e Gata Ai o le malo o le Atua i le lalolagi, ma o lena e pei ona faatulagaina nei ma taitaiina ua i ai le faamaoniga a le Alii ma faia i le ala e pei ona faatonuina ai.

Ia iloa ma le faamaoni e tagata uma o le Ekalesia lenei a le Alii ma o lo o ia taitaiina ona mataupu. Se faamanuiaga ina a maoae le avea ma sui auai o se faalapotopotoga paia!¹²

Ua faatulagaina le Ekalesia e fesoasoani i tagata ina ia maua le olioli ma le fiafia i lenei olaga ma le ola e faavavau i le olaga a sau.

Ua faatuina e le Alii mea uma i le faatulagaga tatau ma ua tuuina mai ia i tatou se faatulagaga atoatoa. E le mafai e tagata ona faaleleia lea faatulagaga. Afai tatou te faia mea ua faaalia mai e le Alii, e pei ona sa ia faaalia mai, o le a atoatoa mea uma, aua o le faatulagaga o se faatulagaga atoatoa; o lona teori—o lona fuafuaga—e aunoa ma se faaletonu.¹³

Ua faatulaga e le Alii i lana Ekalesia se faalapotopotoga o le perisitua ua taitaia e aposetolo ma perofeta. Ma ua ia faia isi faalapotopotoga … e fesoasoani ma lagolago i le perisitua.

I tisipenisione taitasi o le talalelei e i ai manaoga faapitoa e tatau ona faamalieina, faafitauli e foia, ma o fesoasoani e tatau ona tuuina atu e fesoasoani ai i tagata o le Ekalesia i le galueaiina o lo latou faaolataga “i le fefe ma le gatete” i luma o le Alii. (Tagai Filipi. 2:12.) O lea ua i ai a tatou faalapotopotoga o ausilali [Aualofa, Alii Talavou, Tamaitai Talavou, Peraimeri, ma le Aoga Sa] e galulue ma fesoaosani i le perisitua. E matua faatulaga lelei lava ina ia faamalieina manaoga o tagata i soo se tulaga e manaomia ai. O itutino i latou o le malo o le Atua ma ua faatuina e fesoasoani ai i tagata o le Ekalesia ina ia faaatoatoaina o latou olaga ma faia mea e aumai ai le olioli ma le fiafia i lenei olaga ma le ola e faavavau i le olaga a sau. …

O le Ekalesia ma ona ofisa ua avea ma faalapotopotoga e auauna atu e fesoasoani i le aiga ma tagata taitoatasi. O faiaoga asiasi, taitai perisitua, ma epikopo ua tofia e taitai i latou e galulue mo le ola e faavavau i le malo o lo tatou Tama, ma ua tofia ausilali e fesoasoani ma lagolago i lenei galuega tele o le faaolataga.

E le mafai ona matou faamamafa malosi atu le manaomia tele o le faaaogaina o nei polokalama uma mo le lelei ma faamanuiaga o fanau uma a lo tatou Tama. …

Afai e fai e i tatou uma mea uma e tatau ona tatou fai i le faaalualuina i luma o polokalama a le Ekalesia, o le a faamanuiaina ma faatamaoaigaina i tatou e le Alii i lona atoatoaga o le a manuia ai a tatou galuega, ma o le a maua ai le filemu ma le olioli iinei ma le mamalu e faavavau o mulimuli mai.¹⁴

O la tatou auaunaga i le Ekalesia e faaalia ai le alofa mo isi ma le agaga faafetai mo le galuega e faavavau a le Alii.

O loo faatasi le Alii ma le Ekalesia. O lo o ia taialaina i tatou. O loo i ai lona agaga i luga o nei tagata. Ua ia finagalo ina ia tatou auauna ia te ia i le lotomaulalo ma le tasi o le loto ma le agaga.¹⁵

Na maliu mai lo tatou Faaola i le lalolagi e aoao i tatou ia fealofani, ma ina ua faaalia mai lena lesona sili e ala i lona mafatiaga tele ma lona maliu ina ia tatou ola ai, pe le tatau ea ona faaali lo tatou alofa mo o tatou tagata e ala i galuega auauna mo i latou? Pe le tatau ea ona faaali la tatou faafetai mo le auaunaga e le i’u na ia tuuina mai mo i tatou, e ala i lo tatou tuuina atu o le auaunaga i lana galuega?

O le tagata ua faia na o ia mea i le Ekalesia e mo ia lava o le a le maua le faaeaga. Mo se faataitaiga, o le tagata ua naunau e tatalo, e totogi lana sefuluai ma taulaga, ma fai ona tiute masani e faatatau ia te ia lava, ae leai ma se isi mea, o le a le maua lava le sini o le atoatoaga. ¹⁶

Ia aua lava nei musu e auauna atu. A talosagaina e se pulefaamalumalu lau fesoasoani, ia fiafia e talia ma tuuina atu le mea sili e te mafai i lena galuega. Ua finagalo le Alii ia tatou faia lenei, ma o lo o tatou i lalo o le feagaiga e faia o lea. O lenei ala e aumai ai le olioli ma le filemu, ma i lea lava taimi o i latou ua galulue auauna atu e maua faamanuiaga silisili. E tele atu mea e maua e le faiaoga nai le o loo aoaoina; o faamanuiaga e toe foi mai ia i tatou pe a tatou talia se valaauga e galue i le Ekalesia e sili atu nai lo faamanuiaga tatou te tuuina atu mo isi. O le na te le talia e fai se galuega pe alo i tiute pe a tuuina atu ia te ia i le Ekalesia ua i tulaga matautia o le aveesea o le taitaiga a le Agaga. E iu ina latou faavaeluatai ma faatalale i tiute uma, ma, e faapei o se laau e le teuteuina ma fui, o le a mago ma oti i le oti faaleagaga.¹⁷

O lau auaunaga lelei o le a le galo i lena Atua o loo e auauna i ai ma lē ona le galuega o loo e punouai ai.¹⁸

A young man and his mother working in a flower garden as an elderly woman looks on. — “O lau auaunaga lelei o le a le galo i lena Atua o loo e auauna i ai ma lē ona le galuega o loo e punouai ai.”

O lau tatalo o i tatou uma lava, o lo o galulue faatasi o ni uso ma tuafafine moni i le malo o le Alii, ia galulue ina ia faataunuuina le galuega tele o lo o faatalitali mai.¹⁹

I lenei tisipenisione, o le malo o le Atua ma le galuega a le Alii o le a faasalalauina i le lalolagi.

O le tisipenisione o le Talalelei ua faamatalaina o le faamatuuina atu i taitai filifilia paia, o se faatonuga mai le Atua o le mana ma le pule e talai ai le finagalo o le Atua, ma faia sauniga uma e tatau ai. …

Na i ai taimi na aveesea ai le Talalelei mai tagata ona o lo latou solitulafono. E faapei o aso o Noa. Na liliuese Isaraelu mai le Alii ma sa tuua ai i le pogisa mo le tele o augatupulaga ao lei afio mai Iesu Keriso, ma ina ua maliu mai o ia i tagata sa ia toefuataiina mai le atoatoaga o le Talalelei. Sa Ia auina mai ona soo e talai lana savali i le lalolagi uma, ae e lei tele ni seneturi ua mavae ae toe pauu foi tagata i mea sese ma aveesea ai le pule e galulue ai i le suafa o le Alii. O lea ua alagatatau ai le matala o le lagi ma le oo mai o le tisipenisione fou e saunia ai mo le afio mai faalua o lo tatou Alii i ao o le lagi e nofotupu i luga o le fogaeleele i lona mamalu mo le afe tausaga, o lenei ua lata mai, ua i o tatou faitotoa.²⁰

O le talalelei lava ia e tutusa lava i tisipenisione uma; o le fuafuaga o le faaolataga e tutusa mo fanau uma a lo tatou Tama i soo se matua. Mai lea taimi i lea taimi na aveesea ona o le liliuese, ae soo se taimi e tuu ai e le Alii tagata i le lalolagi, sa ofoina atu ia i latou tulafono ma upumoni o le faaolataga lava e tasi ua ia faaalia mai ia i tatou.

Ae i ai le mea faaopoopo tele e tasi ua tatou maua i lenei vaitaimi sa lei i ai muamua. I lenei tisipenisione sa faatonu e le Alii e faapea o le Ekalesia o le a le toe taitai seseina lava; o le taimi lenei ua iinei le talalelei e le toe aveesea. O le taimi nei o le upumoni faaalia ua faamoemoe e saunia ai tagata mo le afio mai faalua o le Atalii o le Tagata, ma o le a faatuina le Ekalesia i itu uma o le lalolagi pe a afio mai le Alii e aumai le meleniuma o le filemu ma le amiotonu.²¹

O i tatou o tagata o le ekalesia o le lalolagi, o se ekalesia e i ai le fuafuaga o le ola ma le faaolataga, o se ekalesia ua faatulaga e le Alii lava ia i aso e gata ai e tauaveina lana savali o le faaolataga i ana fanau uma i le lalolagi uma. …

Ua tatou maua le tino ma le malosi ua mafai ai ona tatou faataunuuina le poloaiga ua tuuina mai e le Alii ia i tatou e ala mai le Perofeta o Iosefa Samita ina ia tatou tauave le tala lelei o le toefuataiga i nuu uma ma tagata uma.

Ma e le gata ina tatou talai atu le talalelei i nuu uma a o le i afio mai faalua le Atalii o le Tagata, ae tatou te faaliliu mai tagata ma faatulaga faapotopotoga o le Au Paia ia i latou.²²

O le malo o le Atua ma le galuega a le Alii o le a salalau atu pea lava pea; o le a sili ona vave lona alualu i luma i le lalolagi i le lumanai nai lo le tulaga sa i ai i le taimi ua tea. Ua fetalai mai ai le Alii, ma ua faamauina e le Agaga; ma ou te molimau atu i lenei mea, aua ou te iloa e moni ia. Ua i ai le malo o le Alii iinei ina ia ola, ia salalau atu i nuu mamao, ia mauaa i le lalolagi, ma ola i le mea sa totoina ai e le Alii i lona lava mana ma lana lava upu, e le toe faatamaia lava, ae o le a faaauau seia faataunuuina faamoemoega o le Silisiliese—o mataupu faavae taitasi sa saunoa i ai perofeta talu le amataga o le lalolagi. O le galuega a le Atua, o ia lava, i lona lava poto ae le o le poto o tagata, na toefuataiina mai ai i le lalolagi i aso e gata ai.²³

O le talalelei e mo tagata uma, ma o le a faatuina le Ekalesia i nofoaga uma, i nuu uma, e oo lava i tuluiga o le lalolagi, a o le i oo mai le toe afio mai o le Atalii o le Tagata.²⁴

Ou te iloa ma molimau atu o le a tumau lava le finagalo o le Alii i le lalolagi. Ua i ai iinei Le Ekalesia a Iesu Keriso o le Au Paia o Aso e Gata Ai e nofomau ai. O le a manumalo le galuega a le Alii. E leai se mana i le lalolagi e taofia le salalau o le upumoni ma le folafolaina o le talalelei i nuu uma.²⁵

Ou te tuuina atu au faamanuiaga mo outou ma lau faamautinoaga o lo o faatasi le Atua i ona tagata, ma o le galuega o lo o tatou i ai o le a manumalo ma taavale i luma seia faataunuuina faamoemoega e faavavau o le Alii.²⁶

Fautuaga mo Suesuega ma le Aoaoina Atu

Fesili

E mafai faapefea ona tatou mulimuli i faataitaiga a Peresitene Samita i la tatou auaunaga i le Ekalesia? (Tagai “Mai le Soifuaga o Iosefa Filitia Samita.”)
Manatunatu i aoaoga a Peresitene Samita e uiga i le Toefuataiga o le talalelei (tagai vaega 1). O a ou lagona pe a e mafaufau i le ola ai i le taimi ina ua toefuataiina mai le Ekalesia a le Alii i le fogaeleele?
Na molimau Peresitene Samita o Iesu Keriso o le āo o le Ekalesia (tagai vaega 2). E faapefea ona e faasoa atu lau molimau i lenei upumoni i se tasi e le auai i le Ekalesia?
E faapefea e faalapotopotoga ma polokalama a le Ekalesia ona fesoasoani e te maua ai faamanuiaga o lo o taua i le vaega 3? E faapefea ona fesoasoani ai i lou aiga?
Na saunoa Peresitene Samita, “Na afio mai lo tatou Faaola i le lalolagi e aoao i tatou ia fealofani” (vaega 4). O a ni auala e mafai ai ona tatou mulimuli i faataitaiga a le Faaola o le alofa pe a tatou galulue o ni faiaoga asiasi po o faiaoga o aiga?
A o e iloiloina le vaega 5, matau le ala e ese ai lenei tisipenisione mai i isi. E faapefea e lenei malamalama ona aafia ai la tatou auaunaga i le Ekalesia? O a ni ou lagona a o e mafaufau i le sauniuniga o le lalolagi mo le Afio Mai Faalua o le Faaola?

Mau Fesootai

Mosaea 18:17–29; MF&F 1:30; 65:1–6; 115:4; 128:19–22

Fesoasoani mo le Aoaoina Atu

“Pe a e faaaogaina gaoioiga eseese e aoao ai, e mafai e i latou o lo o aoaoina ona malamalama lelei ma manatua atili mataupu faavae o lo o aoaoina. O se metotia e filifilia ma le faaeteete e mafai ona faamalamalama lelei, sili ona fiafia, ma manatua ai pea le mataupu autu” (O Le Aoao Atu, E Leai Se Isi Valaauga e Sili Ai [1999], 89).