Mataupu 25

O Le Soifua Mai o Iesu Keriso: “O Le Tala Lelei e Olioli Tele Ai”

“O le a ea se taua o lenei tala matagofie? Pe ua tatou faatagaina ea e faatumuina ai o tatou olaga? Pe ua tatou talia ea i lona uiga atoa e aunoa ma se faatuatuai?”

Mai le Soifuaga o Iosefa Filitia Samita

I le vaitau o le Kerisimasi i le 1971, sa maua ai se avanoa e se tusitala o se nusipepa e talanoa ma Peresitene Iosefa Filitia Samita ma tagata o lona aiga. Na faasoa mai e le tusitala se faaataataga o le soifuaga o le perofeta:

“O le Kerisimasi o se taimi faapitoa mo Peresitene Iosefa Filitia Samita. O se aso mo le aiga ma se aso e manatunatu ai. Ae, o le mea sili mo Peresitene Iosefa Filitia Samita o se aso lea mo le fanau.

“‘Ou te manatu o le mea e sili ona ou fiafia i ai i le Kerisimasi o le fanau,’ na saunoa ai Peresitene Samita, a o ia fusi mai le afafine o le afafine o lona afafine faalatalata ia te ia.

“Faatasi ai ma se Tusi Paia tele e i ai ata i luga o ona vae, sa susueina ai e Peresitene Samita ma le toalua o fanau a fanau a ana fanau, o Shanna McConkie, 4, ma Sherri, 2, i itulau o lo o faamatala ai le fanau mai o le pepe o Keriso. Sa umi lava ona matamata i le itulau o lo o i ai le ata o le falepovi. Sa i ai se mafutaga vavalalata ia Peresitene Samita ma teineiti. …

“Sa fiafia Peresitene Samita i le mau asiasiga a le aiga i le taimi o le Kerisimasi. ‘O le Kerisimasi o le taimi e faatasi ai aiga,’ sa ia faapea mai ai.”¹

Mo Peresitene Samita, o aga o le Kerisimasi e totonugalemu i le soifua mai o le Faaola, misiona, ma le Togiola. I le tali atu i faamanuiaga o le Kerisimasi mai tagata o le ekalesia, sa ia fai mai: “Ou te faafetai i le manatu mai o i latou na lafo maia faamanuiaga o le Kerisimasi. Ou te lagona o le faaalia lea o le alofa ma le faamanatuga o le soifua mai o le Faaola ua tatou faamamalu ma tapuai i ai o le ao o le ekalesia. O lana savali o le filemu ma le finagalo alofa i tagata. O lou faamoemoe lea mo o’u uso a tagata uma i soo se mea.”²

Ia Tesema 1970, sa faasalalau ai e Peresitene Samita le savali o le Kerisimasi mo tagata o le ekalesia i le lalolagi. I se vaega na ia saunoa ai:

“Ou te faafeiloai atu ia te outou i lenei Vaitau o le Kerisimasi, i le alofa ma le mafuta faatasi, ma se tatalo ia silasila ifo lo tatou Tama e Faavavau i le alofa ma liligi mai Ana faamanuiaga e tele i o outou luga.

“I nei taimi ua tupu tele le amioleaga, ua tele puapuaga i le lalolagi, ua i ai taua ma tala o taua, ua tatou manaomia lava, e lei faapenei muamua, le taitaiga ma le puipuiga a le Alii.

“E tatau ona tatou iloa e ui i faigata ma gasegase uma e oo mai ia i tatou, o le Alii o lo o pulea mea uma o le lalolagi ma afai tatou te tausia Ana poloaiga ma faamaoni ma le faatuatua i Ana tulafono, o le a Ia faamanuia i tatou iinei ma tauia i tatou i le ola e faavavau i Lona malo i le taimi talafeagai. …

“… Ou te tatalo nei i lenei Kerisimasi, ma i taimi uma lava, ia faatotonugalemu lo tatou faatuatua i le Alo o le Atua ma ia maua e i tatou lava lena filemu e sili atu i le malamalama.”³

rane/lamb of god, 1/5/04, 4:51 PM, 8C, 7653x10653 (339+483), 150%, paintings, 1/12 s, R74.8, G64.7, B79.0 — O le tala o le soifua mai o le Faaola “e le pasiā lava tusa pe faamatala faafia.”

Aoaoga a Iosefa Filitia Samita

O le tala i le soifua mai o lo tatou Togiola e manino lava i lona faigofie maualalo.

E leai se tala e tutusa lona matagofie ma lenei, pe na te saveu le agaga o le lotomaulalo i le loloto, e pei o lenei tala mamalu o le soifua mai o lo tatou Togiola. E leai ni upu e mafai e le tagata ona faamatala e faalautele pe faaleleia pe faaopoopo i le faaupuga o lona lotomaulalo faigofie. E le pasiā lava e tusa pe faamatala faafia, ma o lona faamatalaina e seasea ona faia i aiga o tagata. Tatou taumafai e manatu ia i tatou lava ma leoleo mamoe o leoleo a latou lafu i lena po e faigata ona faagaloina. O nei alii o tagata lotomaulalo o e le i galo le faatuatua o o latou tama, o o latou loto e le i faamaaaina e faapei o loto o taitai o Iutaia i aso o le misiona a lo tatou Alii, ana fai o lea, e le faaali mai agelu ia i latou ma la latou savali paia. Sei tatou toe faamatala lenei tala matagofie.

“Sa i le vao o lea nuu leoleo mamoe sa nonofo ai ma leoleo po i la latou lafu mamoe.

“Faauta foi, ua tu mai ia i latou le agelu a le Alii, ua pupula faataaliolio mai foi ia te i latou le pupula o le Alii: ua matua fefefe ai lava i latou.

“Ona fai mai lea o le agelu ia te i latou, Aua tou te matatau: aua faauta, ou te au mai ia te outou le tala lelei, e olioli tele i le nuu uma.“

Aua o le aso nei ua fanau ai i le aai o Tavita, lo outou Faaola, o le Alii ia o Keriso.

“O le faailoga lenei ia te outou, e iloa e outou le tama meamea ua aui i le ie, o loo taoto i le fale povi.

“Ona faafuasei lea ona faatasi mai ma le agelu o au mai le lagi e toatele ua vivii i le Atua, ua faapea ane,

“O le viiga i le Atua i mea aupitoaluga, ma le manuia i le lalolagi, o le finagalo alofa i tagata.

“Ua o i le lagi agelu sa ia i latou, ona fetautalatalaai ai lea o leoleo mamoe, Ina tatou o ia i Peteleema, tatou te vaavaai i lenei mea ua faia, ua faailoa mai ia te i tatou e le Alii.

“Ma ua latou faataalise atu, ona maua lea o Maria, ma Iosefa, ma le tama meamea o taoto i le falepovi.” [Luke 2:8–16.]

E mafai e se agaga ona faitau lenei ae le pa’i i ai le agaga o le loto maulalo ma faagaeetia i le faigofie o le moni o le tala?⁴

E ui o Iesu Keriso o le Alo o le Atua, na afio mai o Ia i lenei lalolagi o se pepe ma maua le alualu i luma mai le alofa tunoa i le alofa tunoa seia Ona maua le atoatoaga.

Ou te manatu ua malamalama uma i tatou o Iesu Keriso o Ieova lava lea, o le na taitaiina Isaraelu i aso o Aperaamo ma Mose, ma o le mea moni e mai aso o Atamu. O Ieova foi, po o Iesu Keriso, o se peresona Agaga na faaali atu i le uso o Iareto, ma sa fanau mai o ia o se pepe i lenei lalolagi ma tuputupu ae ai ma avea ma tagata matua i lenei lalolagi.⁵

Jesus Christ at age twelve in the temple at Jerusalem during the Feast of the Passover. A group of learned Jewish doctors are gathered around Christ. The doctors are expressing astonishment at the wisdom and understanding of the young Christ. (Luke 2:41-50) — I Lona talavou, sa faateleina le poto o Iesu “o lea fuaiupu ma lea fuaiupu, o lea mataupu ma lea mataupu.:

O lo tatou Faaola o se Atua a o le i soifua mai o ia i lenei lalolagi, ma na afio mai o ia ma lena lava tulaga ina ua afio mai iinei. O ia lava o le Atua ina ua soifua mai e faapei foi ao le i soifua mai o ia. Ae tusa ai ma lenei olaga e foliga mai sa ia amata e faapei o isi uma tamaiti ma maua le malamalama o lea fuaiupu ma lea fuaiupu. Fai mai Luka “ua tupu le poto ma le tino o Iesu, ua alofagia o ia e le Atua atoa ma tagata.” [Luka 2:52.] Na faamauina e Ioane “na ia le maua i le atoatoaga muamua,” ma sa alualu i luma “mai le alofa tunoa i le alofa tunoa seia Ona maua le atoatoaga.” [MF&F 93:13.] …

O le mea moni, a o le i atoa le 12 o ona tausaga— o le taimi lea sa ia faaofoina ai fomai ma tagata popoto i le malumalu—e tele mea sa ia aoaoina e uiga i le galuega a lona Tama [tagai Luka 2:46–49]. Sa mafai ona oo mai lenei malamalama ia te ia e ala i faaaliga, i asiasiga a agelu, pe o nisi o auala. Ae o lona poto, e tusa ai ma lenei olaga, e oo mai i lea fuaiupu ma lea fuaiupu o lea mataupu ma lea mataupu. E le taumateina sa ia fesootai, mai lea taimi i lea taimi, ma lona Tama Faalelagi.

… “Ma sa oo ina faapea ona tupu ae Iesu faatasi ma ona uso, ma ua faateleina lona malosi, ma sa faatalitali i le Alii i le oo mai o le taimi o lana galuega. Ma sa auauna atu o ia i lalo o le taitaiga a lona tama, ma sa le tautala o ia e pei o isi tagata, sa le mafai foi ona aoaoina o ia; aua sa le manaomia e ia soo se tagata e aoaoina o ia. Ma ina ua mavae tausaga e tele, sa oo mai ai le itula o lana galuega.” [Faaliliuga a Iosefa Samita, Mataio 3:24–26.]

O le saunoaga a lo tatou Alii e le mafai ona ia faia se mea a o mea na te vaai atu i le Tama o faia, o lona uiga faigofie ua faaali mai foi ia te ia mea uma lava na faia e lona Tama [tagai Ioane 5:19–20]. E aunoa ma se masalosalo, na maliu mai Iesu i le lalolagi e faalagolago i tuutuuga lava ia e pei ona manaomia ai mo i tatou taitoatasi—sa galo ia te ia mea uma, ma sa tuputupu ae o ia mai lea alofa tunoa i lea alofa tunoa. O lona faagaloina, po o le aveesea o lona muai malamalama, o le a manaomia e faapei foi o tulaga ia i tatou taitoatasi, ina ia faataunuu ai le soifuaga faaletino nei.

Sa lei i ai se atoatoaga o le Faaola muamua, ae ina ua tuanai ona maua lona tino ma le toetu, sa tuuina atu ai mana uma ia te ia i le lagi ma le lalolagi. E ui o ia o se Atua, o le Alo o le Atua, ma le mana ma le pule e foafoaina ai le lalolagi ma isi lalolagi, ae e i ai ni mea e le i atoatoa sa le i mauaina e ia seia mavae lona toetu. I se isi faaupuga sa le i maua e ia le atoatoaga sei vagana ua i ai lona tino toetu.⁶

Na afio mai Iesu Keriso i le lalolagi e togiola i tatou mai le oti faaletino ma le faaleagaga.

Na afio mai Iesu iinei e faataunuu se misiona faapitoa sa tofia ai o ia a o lei faataatiaina le faavae o lenei lalolagi. Ua faamatalaina o ia i tusitusiga paia o “o le Tamai mamoe na fasia talu ona faavaeina o le lalolagi.” [Faaaliga 13:8.] Sa ofo atu o ia e sau, i le Taulotoaiga o Taimi, e togiola tagata mai le pau o le a oo mai ia i latou e ala i le solitulafono a Atamu.

… Ua na o Iesu lava le tagata na fanau mai i le lalolagi e leai sona tama faaletino. O le Tama o lona tino o le Tama foi lea o lona Agaga, ma le Tama o agaga o tagata uma. Mai lona Tama sa ia maua ai le ola e faavavau; mai lona tina sa ia maua ai le mana e oti ai, ona o lona tina o le tina e fai lona tino faitino. Mai ia te ia ua maua ai lona toto, ma e mai lona Tama ua ia maua ai le tino e ola pea. Ua maua ai le mana e maliu ai ma toetu, sa ia mafai ona totogi le tau o le solitulafono a Atamu, ma togiolaina ai tagata uma mai le tuugamau.⁷

O le mafuaaga moni o le afio mai o Iesu Keriso i le lalolagi … o le, muamua, e togiolaina uma tagata mai le oti faaletino, ua oo mai i le lalolagi ona o Atamu, ma le lua, e faaolaina tagata uma mai le oti faaleagaga po o le faaaunuua mai le afioaga o le Alii e fuafua i lo latou salamo ma le faamagaloina o agasala ma tutumau i le iuga o lo latou olaga faataitai.⁸

Tatou te olioli i le soifua mai o le Alo o le Atua i tagata.

Tatou te faafetai mo le taulaga togiola sa Ia faatinoina e ala i le faamaligiina o Lona lava toto.

Tatou te faafetai ona sa Ia togiolaina i tatou mai le oti ma tatala ai le faitotoa ina ia tatou maua le ola e faavavau.

Tatou te tatalo mo le filemu i le lalolagi, mo le salalau o le talalelei, ma mo le manumalo faaiu o le upumoni.

Matou te valaau atu i fanau a lo tatou Tama i soo se mea e auai faatasi ma i tatou i le faia o mea tatou te maua uma ai le filemu i lenei lalolagi ma le olioli e faavavau i le lalolagi a sau [tagai MF&F 59:23].⁹

E ao ona tatou faaaoga le tala o le soifua mai o le Faaola e faatumu ai ma uunaia o tatou olaga.

A oo mai [taeao o le Kerisimasi] o nisi o le a punonou o latou ulu e aioi atu ma le faamaulalo i le Tama o le Malamalama mo faamanuiaga ua latou maua e ala i mafatiaga o lona Alo pele, ma o le a faitau le tala matagofie ma le agaga o le faaneetaga. O nisi, ma le faanoanoa, o e itiiti lo latou malamalama, pe afai e i ai, i le aitalafu o loo latou nofosala ai i le Alo o le Atua, o le a fiafia, e le o le vivii atu ma le tatalo lotomaulalo, ae o pati laulauvavale ma le onana, e aunoa ma sina manatu itiiti i le taua o le soifua mai o le Tagata mai Kalilaia. …

E faapefea e se tasi ona faitau lenei tala ootia o le soifua mai o Iesu Keriso e aunoa ma le manatu e lafoai ana agasala? I lenei vaitau o le tausaga e alagatatau mo se tasi ma isi uma—o le tupu i lona maota, pe afai o i ai ni tupu i ni maota i le taimi nei, o le faifaatoaga i si ona faleoo, o le mauoa ma le mativa foi—e tootutuli o latou tulivae ma viia o ia o le e aunoa ma se agasala, o lona soifua na faamaumau e ositaulaga ma le faanoanoa mo le manuia o ona uso a tagata; o lona toto sa faamaligi o se togiola mo le agasala. …

… …“O le a la se taua o lenei tala matagofie? Pe ua tatou faatagaina ea e faatumuina ai o tatou olaga? Pe ua tatou talia ea i lona uiga atoa e aunoa ma se faatuatuai?” Pe ua tatou talitonu ea o lenei pepe o le Alo pele lava lea e toatasi o le Atua i le tino? Pe ua i ai ea so tatou faatuatua mausali i lana misiona ma pe ua tatou naunau ea e mulimuli ia te ia ma le usiusitai? Afai ua talitonu le lalolagi ma gauai faamaoni atu i ana aoaoga, ona le faataumaoia lea e le mataua ma le amioleaga i le gasologa o tausaga. … Ua tele naua le auauna atu na o laugutu i e ua faapea e mulimuli i le Alo o le Atua ae itiiti le tapuai faamaoni e faalagolago i le faamaoni o ana aoaoga.

Na folafola atu e le agelu i leoleo mamoe i lena po matagofie, ua ia aumai le tala lelei e olioli ai le nuu uma [tagai Luka 2:8–10], ae o le toatele o tagata i mea uma i luga o le fogaeleele, ua le fiafia e talia faamanuiaga o nei tala lelei. Sa le i naunau i latou e lafoai a latou agasala, faalotomaulalo i latou lava ma faatonutonu o latou olaga ina ia ogatasi ma aoaoga a le Matai. …

O lenei foi ou te toe aioi atu i tagata uma i nuu uma: Fulitua i o outou ala leaga ae liliu mai i le tapuaiga moni i le Alo o le Atua, ina ia faaolaina o outou agaga i lona malo.¹⁰

Fautuaga mo Suesuega ma le Aoaoina Atu

Fesili

O a mea tou te fai i le aiga e manatua ai le Faaola i le taimi o le Kerisimasi? O a ni mea tatou te aoao mai i tu ma aga o le Kerisimasi a Peresitene Samita? (Tagai “Mai le Soifuaga o Iosefa Filitia Samita.”)
Aisea e te manatu ai o le tala i le soifua mai o Iesu Keriso “e le pasiā lava”? (Tagai vaega 1.)
Iloilo saunoaga a Peresitene Samita e uiga i le afio mai o Iesu Keriso i le lalolagi o se pepe ma soifua ai i faigata o le olaga faaletino (tagai vaega 2). O a ni o outou manatu ma lagona a o mafaufau loloto i le naunau o le Faaola na te faia o lea?
Mafaufau loloto i le fesootaiga o le soifua mai o le Faaola ma le Togiola a le Faaola (tagai vaega 3). E faapefea e matua ona fesoasoani ia latou fanau ia maua lenei malamalama? E faapefea e lenei malamalama ona aafia ai tu ma aga o a tatou Kerisimasi?
O a ni mea tatou te fai e faaaoga ai le tala o le soifua mai o le Faaola e “faatumu ai ma uunaia o tatou olaga”? (Tagai vaega 4.)

Mau Fesootai

Isaia 53; Luka 1:26–35; 2; 1 Nifae 11:8–23

Fesoasoani mo le Aoaoina Atu

Talanoaga i ni vaega laiti “tuuina atu i le toatele o tagata le avanoa e auai i se lesona. O tagata taitasi e masani ona mumusu e talanoa mai, atonu e fia faasoa ni manatu i ni vaega laiti nai lo le faia i luma o le vasega atoa” (O Le Aoao Atu, E Leai Se Isi Valaauga E Sili Ai [1999], 161).