Mataupu 7

O Iosefa ma Ailama Samita, o Molimau mo Iesu Keriso

“Tatou te sii ae o tatou leo i le faafetai mo ola ma galuega a le Perofeta o Iosefa Samita, o le Peteriaka o Ailama Samita, ma perofeta ma aposetolo ma alii ma tamaitai amiotonu sa atiae i luga o le faavae na latou faataatia.”

Mai le Soifuaga o Iosefa Filitia Samita

Mai le taimi a o itiiti lava o ia, na iloa e Iosefa Filitia Samita e i ai le sootaga faapitoa a lona aiga i le Perofeta o Iosefa Samita. Sa musuia o ia e le faataitaiga a le tama o lona tama o Ailama Samita, o le uso matua ma le uo faamoni i le Perofeta o Iosefa. Sa galue ma le faamaoni Ailama faatasi ma lona uso o se taitai i le Ekalesia. Sa ia fesoasoani foi i le lomiaina o le Tusi a Mamona ma sa tofia o se tasi o Molimau e Toavalu o le tusi. Ia Iuni 27, 1844, sa faamaturoina ai Iosefa ma Ailama i Karefasi, Ilinoi, ma faamauina ai a laua molimau i le Faaola ma Lana talalelei. “Sa lei fevaevaeai i laua i le soifuaga, ma sa lei tuueseeseina i laua i le oti!” (MF&F 135:3).

Sa le iloa lava e Iosefa Filitia Samita matua o ona matua i le itu o le au Samita. Ao lei taitai ona fanau mai o ia, sa faamaturoina Ailama le tama o lona tama. O le faletua o Ailama o Mary Filitia Samita na maliu a o talavou o ia. Na saunoa Iosefa Filitia Samita: “Sa ou le iloa lava le tina o lou tama o Samita. Ou te faanoanoa ai lava i lena mea, aua o ia o se tasi o tina ua sili ona tamalii na soifua ai, ae sa ou iloa lona uso matagofie, o lou Aunt o Mercy Thompson, ma a o ou laitiiti sa masani ona ou alu ma asiasi ia te ia i lona aiga ma nofo i luga o lona vae, a o ia faamatala mai ia te au ni tala e uiga i le Perofeta o Iosefa Samita, ma, oi, ou te faafetai tele ona o lena avanoa.”¹

Sa aoao foi Iosefa Filitia Samita mai faataitaiga a lona tama, o Iosefa F. Samita, o le sa silafia patino le Perofeta o Iosefa Samita. E uiga i lona tama, na saunoa Iosefa Filitia Samita: “Sa leai se elemene o le masalosalo po o le le mautinoa i lana molimau. Aemaise ai lava ina ua ia talanoa i le paia o lo tatou Faaola po o le misiona a le perofeta o Iosefa Samita.”²

O nei faataitaiga ma aoaoga na taitaia Iosefa Filitia Samita e maua se molimau o le talalelei toefuatai i lona tamaitiiti. “Ou te le manatua le taimi na ou le talitonu ai i le misiona a lo tatou Alii ma le Faaola o Iesu Keriso po o le misiona a le Perofeta o Iosefa Samita,”³ na ia fai mai ai. Ina ua ia aoao atu le talalelei, sa ia tau atu i nisi o taimi lana molimau i le gagana masani faaleaiga: “Pe ou te alofa i le Perofeta o Iosefa Samita? Ioe, ou te alofa, e faapei o lo’u tama i luma atu o au. Ou te alofa ia te ia ona o ia o se auauna a le Atua ma ona o le toefuataiga o le talalelei ma ona o mea lelei ma faamanuiaga ua oo mai ia te au ma mo au lava, ma oe ma o a outou lava, e ala mai i faamanuiaga na tuuina atu i luga o lenei alii ma i latou na galulue soosoo tauau faatasi ma ia.”⁴

E ui ina faafetai Peresitene Samita mo aoaoga ma le talatuu o lona aiga, o lana molimau o lana lava lea. Na ia fai mai, “Ou te faafetai pea lava pea mo le molimau ua oo mai ia te au e ala i le Agaga o le Alii e faapea o Iosefa Samita, le Perofeta a le Atua, ua tofia e tulai mai i le ulu o le Tisipenisione o le Atoaga o Taimi.”⁵ I se tasi taimi na ia molimau: “O lou malamalama, ona o le meaalofa a le Atua, i le tausaga e 1820, na mafai ai ona vaai Iosefa Samita i le Tama ma le Alo; sa faailoa mai e le Tama lona Alo; na fetalai mai le Alo ia te ia, ma fesili mai i mea ua ia fia iloa, ma fautuaina o ia; tau atu ia te ia mea e tatau ona fai, ma le folafolaga e mulimuli ane o le a oo mai isi malamalama ma le atoatoaga o le talalelei, sa lei i ai i luga o le fogaeleele, o le a toefuataiina mai.” Ona ia faasoa mai lea o lona talitonuga o le a maua e tagata uma lenei lava molimau e tasi: “O agaga taitasi o lo o i luga o le fogaeleele e i ai le naunautaiga e iloa lenei mea, ua i ai le aia tatau, aua o agaga taitasi e faamaulalo ia te ia lava, ma ua i ai i le loloto o le agamalu ma le faatuatua, ma le agaga salamo, ua alu atu i luma o le Alii, o le a maua lena malamalama, i le faamaoni a o ola o ia.”⁶

Aoaoga a Iosefa Filitia Samita

E lua mataupu ua tulai maualuga mai: o Iesu o le Alo o le Atua ma Iosefa Samita o se perofeta

Tatou te faafesootaia le suafa o Iesu Keriso ma Iosefa Samita. O Keriso o le Alii; sa ia saunia le taulaga togiola; o ia o le toetu ma le ola; e ala atu ia te ia o le a faatuina ai tagata uma i le tino ola pea, ae o i latou o e talitonu ma usiusitai i ana tulafono o le a maua le ola e faavavau.

O Iosefa Samita o le perofeta, ua valaauina i aso e gata ai e maua mai faaaliga o upumoni faaola o le talalelei ma tulai o se taitai tofia, ua i ai le mana mai luga, e faatautaia ai sauniga o le talalelei.

Ona o nei upumoni ua faaalia mai ia te ia e oo atu i atunuu uma a o le i oo mai le Afio Mai Faalua, e le tioa ona tatou maua Moronae o faapea atu ia Iosefa Samita o lona “igoa o le a tauleleia ma tauleagaina i totonu o atunuu uma, ituaiga, ma gagana, po o le a tauleleia ma tauleagaina i totonu o nuu uma e mo le lelei ma le leaga i atunuu uma.” [Iosefa Samita—Tala Faasolopito 1:33.]

E le tioa foi ona tatou iloa le Alii o fetalai atu i le Perofeta: “O le a fesilisili tuluiga o le lalolagi i lou igoa, ma o le a fai oe ma tauemuga a tagata valelea, ma o le a atigu seoli e faasaga ia te oe;

“A o e loto mama ma e atamamai, ma e tamalii, ma e amiomama, o le a saili fautuaga, ma le pule, ma faamanuiaga mai lou lima e le aunoa.” (MF&F 122:1–2.)

O le a amata ona fesilisili tuluiga o le lalolagi i le igoa o Iosefa Samita, ma o le toatele o tagata i le tele o atunuu o loo olioli i le talalelei toefuatai e ala i lona tomai.

Talu mai le amataga o lenei tisipenisione, o le molimau e uiga ia Iesu, e pei ona faaalia ia Iosefa Samita, ua laugaina i le Iunaite Setete, Kanata, Peretania Tele, o le toatele o Europa, ma motu o le Pasefika.

I ni tausaga ua faatoa mavae sa faigata ona talitonuina le faateleina o le galuega i Mexico, i atunuu o Amerika Tutotonu, ma Amerika i Saute.

Ma o Asia o lea [i le 1971] ua tatala i le savali o le talalelei i se auala ua sili atu i soo se mea ua tuanai. Ua faasolo ina mautu nei le Ekalesia i Iapani ma Korea, i Taiuani ma Hong Kong, ma ua tatou amata i Taialani Sigapoa, ma Initonesia.

Ma o le a oo mai le aso, i le tausiga alofa a le Alii, o nisi o atunuu, ua latalata mai nei i le savali o le upumoni, o le a tatala mai o latou faitotoa mo i tatou, ma o toeaina o Isaraelu o le a o atu ma tau atu i e faamaoni i o latou loto i na atunuu e uiga ia Keriso ma le talalelei o lona malo ua oo mai i luga o le fogaeleele i nei aso e ala mai i le Perofeta o Iosefa Samita.⁷

O Iosefa Samita o le e faailoa mai le malamalama o Keriso ma le faaolataga i le lalolagi mo nei aso ma augatupulaga.⁸

E lua autu e tulai maualuga pea lava pea i lou mafaufau. O Iesu Keriso o le Alo o le Atua, o le sa faasatauroina mo agasala a le lalolagi, ma Iosefa Samita o le perofeta ua valaauina ma tofia e aumai le tisipenisione o le atoaga o taimi. O lau savali lena i le lalolagi.⁹

Na tofia e le Alii Iosefa Samita e tulai i le ulu o lenei tisipenisione mamalu.

O Iosefa Samita … na sau ma i lalo o le taitaiga a avefeau paia na faataatiaina le faavae mo le malo o le Atua ma lenei galuega ofoofogia ma le matagofie ina ia saunia le lalolagi mo le afio mai o le Alii.¹⁰

The Prophet Joseph Smith, Jr. in the Sacred Grove (in Manchester, New York) when he received the First Vision. Joseph is depicted kneeling before God the Father and Jesus Christ. Both God the Father and Christ are portrayed wearing white robes. The Father is presenting Christ to Joseph. There are trees in the background. (Joseph Smith - History 1:15-20) — “O Iosefa Samita o le perofeta na valaauina ma tofia e aumaia le tisipensione o le atoaga o taimi.”

Ou te iloa o ia [Iosefa Samita] sa valaauina, tofia e lo tatou Tama oi le lagi; na ia maua faaaliga ma le taitaiga mai le Alo o le Atua mo se lelei ma se faamanuiaga o tagata uma lava pe afai latou te talia.¹¹

E leai se masalosalo i lou mafaufau na saunia e le Alii le Perofeta o Iosefa Samita ma tuuina atu ia te ia faaaliga, poloaiga, ua tatala le lagi ia te ia, ma valaauina o ia e tulai mai le ulu o lenei tisipenisione mamalu. E matua faamalieina lou mafaufau i lona talavou, ina ua alu atu e tatalo, sa vaai o ia ma tu i luma o le Atua le Tama ma lona Alo o Iesu Keriso; i lou mafaufau e leai se masalosalo—ou te iloa e moni lenei mea. Ou te iloa na mulimuli ane na ia maua asiasiga mai ia Moronae, o le Perisitua Arona i lalo o aao o Ioane le Papatiso, o le Perisitua Mekisateko i lalo o aao o Peteru, Iakopo, ma Ioane, ma o le Ekalesia a Iesu Keriso o le Au Paia o Aso e Gata Ai sa faatuina i le aso ono o Aperila 1830, i le poloaiga mai le lagi.¹²

I le filifilia o se sui e tulai i le ulu o lenei “galuega sili ma le ofoofogia o le a oo mai i fanau a tagata,” [tagai MF&F 4:1] e le i filifilia e le Alii se tasi ua atamai i le poto ma tu ma aga a le lalolagi. O ona ala e le o ala ia o le tagata, o ona manatu e le o manatu ia o le tagata [tagai Isaia 55:8]. O se tasi ua aoaoina i mea o le lalolagi o le a tele mea e faigata ona toe aveesea ai mai tu ma filosofia o tagata. I lona poto sili na filifili ai e le Alii se tamaitiiti e faigofie—ao se tama e sefulufa tausaga lona matua. I lenei talavou na faaalia mai ai e le Alii le atoaga o le talalelei, semanu e le talia e le lalolagi ona o lo latou le talitonu. I le tele o tausaga o taitaiga faalelagi—aua sa aoaoina o ia e avefeau mai le afioaga o le Alii—o lenei alii talavou, o Iosefa Samita, sa saunia e taitaiina le galuega o le toefuataiga o le Talalelei ma le atinaeina o le Malo o le Atua.¹³

Na fetalai le Alii o lenei tupulaga o le a maua Lana upu e ala i le Perofeta o Iosefa Samita.

I tausaga taitasi a o i ai le talalelei i luga o le fogaeleele, e ao ona faaalia i perofeta a le Alii, ma e tatau ona valaaulia e tulai o ni taitai tofia e faataunuu ma taitaia le faia o sauniga o le faaolataga mo uso a tagata.

O Iosefa Samita o le perofeta ua valaaulia e le Alii i aso nei e toefuatai le upumoni o le faaolataga ma maua ki ma mana e faatautaia ai nei galuega faaola.

Na fetalai atu le Alii ia te ia: “… o lenei tupulaga o le a latou maua lau upu e ala atu ia te oe.” (MF&F 5:10.) Ma o lea, e tusa ai ma le talalelei toefuatai e ala mai ia Iosefa Samita, na fetalai mai le Alii: “O lenei Talalelei o le Malo o le a laugaina i le lalolagi atoa, o se molimau i atunuu uma, ma pe a oo mai le iuga, po o le faatafunaina o le amioleaga.” [Iosefa Samita—Mataio 1:31.]¹⁴

Ou te fai atu nei—

O lena Iosefa Samita o ia lea e tatau i tagata uma ona vaai i ai i aso nei e aoao ai le upumoni e uiga ia Keriso ma lana talalelei;

Pe a oo i le taimi talafeagai o le a iloa le igoa o lenei perofeta i tulimanu uma o le lalolagi ma tagata uma;

O i latou e faamaoni i o latou loto o le a talia o ia o se perofeta ma o le a tapuai i le Alii e pei ona faaali mai;

O le ekalesia ua ia faatulagaina e ala i poloaiga mai le lagi, e ola aua e mulimuli i faaaliga na oo mai ia te ia;

Ma o i latou uma e talitonu i aoaoga a Iosefa Samita ma galulue i le taiala na ia saunia o le a maua le malamalama o Iesu Keriso o le Alo o le Atua sa faasatauroina mo agasala a le lalolagi.

O le auala lava lea e tasi ou te iloa ai o Iesu o le Keriso—ma e ala mai faaaliga mai le Agaga Paia—ou te iloa o Iosefa Samita o se perofeta ma e faavavau lava ona avea o se perofeta a le Atua. …

I se agaga o le molimau ma le faafetai, ou te [faasoa] atu ai nei upu musuia mai le Mataupu Faavae ma Feagaiga: “O Iosefa Samita, le Perofeta ma le Tagatavaai a le Alii, e tele atu mea na ia faia, vagana ai lava Iesu, mo le faaolataga o tagata i lenei lalolagi, nai lo se isi lava tagata na ola ai.” (MF&F 135:3.)¹⁵

O Iosefa Samita ma lona uso o Ailama sa tutu faatasi i le ola ma le oti

Ou te faafetai ona o le toefuataiga o upumoni e faavavau i lenei tisipenisione mulimuli o le talalelei; mo le misiona ma le galuega a Iosefa Samita, le Perofeta, ma le tama o lou tama, o Ailama Samita, le Peteriaka; ma le mea moni, o ki o le malo o le Atua ua toe aumai i le tagata i le lalolagi.¹⁶

Hyrum with his arm around Joseph with men pulling a boat ashore behind them. — O Iosefa ma Ailama Samita: “Sa lei fevaevaeai i laua i le soifuaga, ma sa lei tuueseeseina i laua i le oti!” (MF&F 135:3).

“O lenei foi, e moni Ou te fai atu ia te oe, amuia lava lau auauna o Ailama Samita; aua o Au, o le Alii, ua alofa ia te ia ona o le faamaoni o lona loto, ma ona e fiafia o ia i mea ua sao i ou luma, ua fetalai mai ai le Alii.” [MF&F 124:15.]

O ai se e le fiafia i le maua o le faamalo o le faatuatuaina ma le viiga mo ia, ma e mai le Alii? O Ailama Samita o se tasi sa muai papatiso i lenei tisipenisione. I lona olaga sa ia tulai i tafatafa o lona uso o Iosefa ma faamalosi ia te ia e ala i timaiga, faatuatua ma le alofa atoa. O Ailama o se alii e maeu le agamalu o lona loto. E ia te ia le lotomaulalo loloto ma e sili atu lona alofa i lona uso nai lo lona alofa i lona lava ola. Sa faaalia lenei i lona maliu na ia maua ai le palealii o se maturo. Sa ia le fefe i lona puipuia o le upumoni. Ioe e “alofa o ia i le mea sao.”

Na soifua mai Ailama Samita i le aso iva o Fepuari, 1800, toeitiiti ono tausaga e matua ai nai lo le Perofeta. E leai se mamalu na oo mai ia Iosefa Samita sa le i faasoaina ma Ailama o le na fiafia ma lona uso i faamanuiaga uma ua tuuina mai e le Alii ia te ia. O lenei lava foi alofa faaleusoga sa faaalia e le Perofeta o Iosefa mo lona uso o Ailama. Na la soifua i le faanoanoa faatasi ma le fiafia faatasi. O sauaga foi lava e tasi na oo ifo ia i laua. Sa la faatasi i le falepuipui e tasi mo le igoa lelei o le Ekalesia, ma ina ua oo mai le taimi e faamaufaailogaina ai la laua molimau, sa la faasoa faatasi le palealii o le maturo. “Sa lei fevaevaeai i laua i le soifuaga, ma sa lei tuueseeseina i laua i le oti.” [MF&F135:3.] …

O se saafiafiga lenei mai le Perofeta: “Uso e Ailama, ua ia te oe se loto faatuatua tele! Ia alofa Ieova e Faavavau e faapaleina lou ulu i faamanuiaga e faavavau, o se taui mo le alofa ua ia te oe mo lou agaga! E fia ni faanoanoaga sa ta faasoa faatasi, ma ua saisaitia i taua i lima le alofa o le saua. Ailama, o lou igoa o le a tusia i le tusi o le Tulafono a le Alii, mo i latou o le a mulimuli mai ia te oe e vaavaai i ai, ina ia latou mulimuli ai i mamanu o au galuega.”

O lenei foi na faapea mai le Perofeta: “Ou te tatalo i lou agaga ina ia faapei ou uso uma o lou uso alofagia o Ailama, o le ua i ai le filemu o le tamai mamoe, ma le mamalu o le Iopu, ma a faapuupuu, o le agamalu ma le lotomaulalo o Keriso ma ou te alofa ia te ia i lena alofa e malosi atu i lo le oti, aua e leai lava se taimi ou te aoai ai ia te ia, o ia foi ia te au.”¹⁷

O Iosefa ma Ailama Samita ua faamaufaailogaina a la molimau i o laua toto.

O le tama o lou tama, o le Peteriaka o Ailama Samita, sa tofia e umia ki o lenei tisipenisione faatasi ai ma Perofeta Iosefa, lona uso laitiiti. Na fetalai le Alii e mautu upu uma i le mau a le toalua po o le toatolu [tagai 2 Korinito 13:1]. …

Sa le mafai e Iosefa Samita ona tu toatasi na o ia, semanu ua iuvale lana galuega, e pei foi o le galuega a le Faaola ona manaomia o le faamaoniga a se isi molimau, ma o ai se e molimau mo Keriso e ese mai lona lava Tama? [Tagai Ioane 8:12–18.] Ma o lea ua valaauina ai e le Alii se isi alii e tutu faatasi ma Iosefa Samita ma umia ki o le faaolataga i lenei tisipenisione e avea o se molimau faatasi ma ia. …

…E le gata o [Ailama] sa tofia e avea o le Peteriaka o le Ekalesia, o lona tofi lea, ae sa faapea foi ona fetalai i ai le Alii:

“Ma ua Ou tofia o ia mai le taimi nei ia avea o ia o se perofeta, ma se tagatavaai ma se talifaaaliga i lau ekalesia, faapea foi lau auauna o Iosefa;

“Ina ia galue gatasi foi o ia ma lau auauna o Iosefa; ma ina ia maua e ia fautuaga mai lau auauna o Iosefa, o le o le a ia faaali atu ia te ia ki e mafai ona ole mai ai o ia ma maua ai, ma faapaleina ai i lea lava faamanuiaga, ma le mamalu, ma le viiga, ma le perisitua, ma meaalofa o le perisitua, ia sa tuu atu i se taimi i luga o ia o le sa avea ma aʼu auauna o Oliva Kaotui;

“Ina ia mafai e lau auauna o Ailama ona molimau e uiga i mea o le a Ou faaali atu ia te ia, ina ia manatua lona igoa i le mamalu mai lea tupulaga i lea tupulaga, e faavavau ma faavavau lava.” [MF&F 124:94–96.]

Ina ia tusa ai ma lona valaauga ma poloaiga, na faaee atu ai e le Perofeta o Iosefa Samita i luga o Ailama Samita o ki uma, pule ma meaalofa o le perisitua na umia e ia le Perofeta, ma sa umia foi e Oliva Kaotui. Na faaali atu foi e le Alii ia Ailama Samita mea uma e talafeagai ina ia mafai ai ona atoatoa o ia i le tulaga atoa, o se molimau ma lona uso o Iosefa, o se perofeta, tagatavaai, talifaaaliga ma peresitene o le Ekalesia, ma ia tulai mai i taimi uma ma le faavavau atoa i le ulu o lenei tisipenisione ma lona uso o Iosefa, o se molimau mo Iesu Keriso.¹⁸

Faatasi ai ma lona uso, o le tama o lou tama, Peteriaka Ailama Samita, o ia [Iosefa Samita] ua faamaufaailogaina lana molimau i lona toto i le Falepuipui i Karefasi. Ma o au, o se tasi, ua manao e fai ma mea faigaluega i le aao o le Alii ina ia iloa ai i tuluiga o le lalolagi o le faaolataga ua toe i ai aua ua faatuina ae e le Alii se tagatavaai malosi i aso nei e toe faatu lona malo i le lalolagi.¹⁹

Room in Carthage jail seen on slant; men with guns come through door; Joseph is heading for window which reveals crowd below; painting is bathed in reddish hues. — Na faatasia, Iosefa ma Ailama Samita ma faamaufaailogaina a laua molimau i o laua toto

Tatou te sii ae o tatou leo i le faafetai mo le ola ma galuega a le Perofeta o Iosefa Samita, o Ailama Samita le Peteriaka, ma perofeta ma aposetolo ma alii ma tamaitai amiotonu o e ua atiae i luga o le faavae ua latou faataatia.²⁰

Fautuaga mo Suesuega ma le Aoaoina Atu

Fesili

Na faamatala mai e Peresitene Samita tagata o lona aiga o e na fesoasoani e faafailele lana molimau o se tamaitiiti i le misiona a Iosefa Samita (tagai “Mai le Soifuaga o Iosefa Filitia Samita”). O a ni mea tatou te fai e fesoasoani ai i tamaiti ina ia maua ni molimau i le misiona a le Perofeta o Iosefa Samita?
O a ni auala e fesootai ai suafa o Iesu Keriso ma Iosefa Samita? (tagai vaega 1.) E faapefea e le galuega a le Perofeta o Iosefa Samita ona uunaia ai lau molimau i le Faaola ma Lana talalelei?
Manatunatu loloto i le iloiloga a Peresitene Samita e faatatau i le valaauina e le Alii o Iosefa Samita ae le o se “tasi ua poto i aoaoga ma tu masani a le lalolagi” (vaega 2). E faapefea e lenei malamalama ona fesoasoani ia i tatou pe a tatou lagona le le agavaa e faataunuu o tatou tiutetauave?
I le vaega 3, sa sii mai e Peresitene Samita le Mataupu Faavae ma Feagaiga 5:10 ma le 135:3. E faapefea ona e faamatalaina nei fuaiupu i se tasi e le masani i le misiona a Iosefa Samita?
O a mea tatou te aoaoina mai le sootaga i le va o Iosefa Samita ma lona uso o Ailama Samita? (Tagai vaega 4.)
O a ni ou lagona a o e mafaufau e uiga ia Iosefa ma Ailama Samita ua faamaufaailogaina a la molimau i o laua toto? (Tagai vaega 5.) O a ni auala tatou te faamamaluina ai la laua taulaga?

Mau Fesootai

Faaliliuga a Iosefa Samita, Kenese 50:30–31; 2 Nifae 3:5–15; MF&F 11:11–26; 76:22–24; 135

Fesoasoani mo le Aoaoina Atu

O se tasi o auala e uunaia ai le aoao ma le maelega o le faalogo totoa pe a fai e se tasi se fesili po o se faamatalaga. “O le faalogo o se faaaliga o le alofa. E masani ona manaomia ai le ositaulaga. A tatou faalogo ma le totoa i isi, tatou te faatuatuanai mea o lo o tatou mananao e fai atu ina ia faaali mai o latou manatu” ( O Le Aoao Atu, E Leai Se Isi Valaauga Sili Atu Ai [1999], 66).