1 Ina ia faamauina le molimau a lenei tusi ma le Tusi a Mamona, matou te faasilasila atu le faamaturoina o Iosefa Samita le Perofeta, ma Ailama Samita le Peteriaka. Sa tafanaina i laua i le falepuipui i Karefasi, i le aso 27 o Iuni, 1844, pe tusa o le itula e lima i le afiafi, e se vaega o tagata leaga faaauupegaina—na vali uli o latou mata—e tusa ma le 150 i le 200 tagata. Sa muamua ona fanaina o Ailama ma pa’ū filemu ai i lalo, ma alaga: O a’u o se tagata oti! Sa oso Iosefa mai le faamalama, ma sa fana ma oti ai i le taumafaiga, ma alaga: E, le Alii e, lo’u Atua! Sa toe fanaina i laua uma, i se ala sauā lava, ina ua mavae ona maliliu i laua, ma e ta’ifa pulu na tafana ai i laua uma.

2 O Ioane Taylor ma Willard Richards, se toalua o le Toasefululua, na pau lea o tagata sa i ai i totonu o le potu i le taimi lea; sa manu’a Ioane Taylor i se ala sauā lava i pulu e fa, ae ua toe malosi mai talu mai lea taimi; o Willard Richards, na sao mai, e ala i le tausiga a le Atua, e aunoa ma se pu i lona ofu.

3 O Iosefa Samita, le Perofeta ma le Tagatavāai a le Alii, e tele atu mea na ia faia, vagana ai lava Iesu, mo le faaolataga o tagata i lenei lalolagi, nai lo se isi lava tagata na ola ai. I le va puupuu o le luasefulu tausaga, na ia aumaia le Tusi a Mamona, lea na faaliliuina e ia i le meaalofa ma le mana o le Atua, ma sa avea ma ala na faasalalau atu ai i konetineta e lua; auina atu le ’atoatoaga o le talalelei tumau e faavavau, ua i ai i totonu, i itu e fa o le lalolagi; aumai faaaliga ma poloaiga ua i ai i le tusi lenei o Mataupu Faavae ma Feagaiga, ma le tele o isi tusi ma aoaoga poto mo le manuia o le fanauga a tagata; faapotopoto le tele o afe o le Au Paia o Aso e Gata Ai, faavae se aai tele, ma tuua se ta’uta’ua ma se igoa e lē mafai ona faaumatia. Sa soifua maualuga o ia, ma sa maliu maualuga o ia i luma o fofoga o le Atua ma lona nuu; ma e pei o le toatele o le ’au faauuina a le Alii i taimi anamua, ua faamau faailogaina lana misiona ma lana galuega i lona lava toto; ma ua faapea foi lona uso o Ailama. Sa lei fevaevaea’i i laua i le soifuaga, ma sa lei tuueseeseina foi i laua i le oti!

4 Ina ua alu atu Iosefa i Karefasi e tuu atu o ia lava i manaoga faatagāfai o le tulafono, i le lua po o le tolu aso a o lumanai ai lona tagatavaleina, sa saunoa mai o ia: “Ua ’ou alu atu e pei o se tamai mamoe e fasia; ae ua ’ou toafilemu e pei o se taeao o le tau mafanafana; ua ia te a’u se lotofuatiaifo ua aunoa ma se faatausuai e faasaga i le Atua, ma faasaga i tagata uma. O le a ’ou oti lē sala ma o le a faapea ona fai ane e uiga ia te a’u—sa fasiotia o ia ma le faufau i ai.”—I le taeao lava lea, ina ua uma ona sauni o Ailama e alu—e mafai ona tatou faapea ane i le fasiga? ioe, aua sa faapea lava—sa faitauina e ia le palakalafa lenei, e latalata i le faaiuga o le mataupu e sefululua o le tusi a Eteru, i le Tusi a Mamona, ma afe i lalo le itulau i ona luga:

5 Ma sa oo ina ou tatalo atu i le Alii ina ia avatu e ia le alofa tunoa i Nuuese, ina ia latou maua le alofa mama. Ma sa oo ina fetalai mai le Alii ia te a’u: Afai e lē i ai ia te i latou le alofa mama, e lē afaina lea mea ia te oe, ua e faamaoni; o le mea lea, o le a faamamāina ou ofu. Ma ona ua e vaai i lou vaivai, o le a faamalosia ai oe, e oo lava i le nofo i lalo i le nofoaga ua Ou saunia i maota o lo’u Tamā. Ma o lenei ou te … faatofa atu i Nuuese; ioe, ma i o’u uso foi o e ua ou alofa i ai, seia oo ina tatou feiloai i luma o le nofoa-faamasino o Keriso, lea o le a iloa ai e tagata uma ua lē pisia o’u ofu i o outou toto. Ua maliliu nei le ’au molimau, ma ua tu nei la laua mau.

6 O Ailama Samita na fasefulu-fa tausaga o le matua ia Fepuari, 1844, ma o Iosefa Samita sa tolusefulu-valu ia Tesema, 1843; ma mai i le taimi ma le agai i luma o le a tusia o laua igoa i totonu o le ’au maturo o tapuaiga faalelotu; ma o le a faamanatuina i lē e faitau i atunuu uma, o le Tusi a Mamona, ma le tusi lenei o Mataupu Faavae ma Feagaiga o le ekalesia, na faatauina i toto e sili ona lelei o le seneturi sefuluiva, e aumai ia tusi mo le faaolataga o se lalolagi ua faaleagaina; ma e faapea afai e mafai e le afi ona faamū se laau mata mo le mamalu o le Atua, o le a faigofie lava ona susunuina o laau mamago e faamamā ai le tovine mai le faaleagaina. Sa soifua i laua mo le mamalu; sa maliliu i laua mo le mamalu; ma o le mamalu o lo laua taui lea e faavavau. E mai lea vaitausaga i lea vaitausaga o le a oo atu o laua igoa i lalo i tupulaga o ni maa taua i e ua faapaiaina.

7 Na mamā i laua mai se solitulafono, e pei ona sa faamaonia ai soo i laua muamua, ae sa na’o taupulepulega leaga a tagata faalata ma amioleaga na falepuipui ai i laua; ma o o laua toto lē sala ua i luga o le fola o le falepuipui i Karefasi o se faamaufaailoga lautele ua faapipii i le lotu “Mamona” e lē mafai ona faafitia e soo se faamasinoga i le lalolagi, ma o o laua toto lē sala i luga o le faailoga o le Setete o Ilinoi, faatasi ma le folafolaga solia a le Setete e pei ona sa folafolaina e le kovana, o se molimau i le moni o le talalelei tumau e faavavau e lē mafai e le lalolagi atoa ona faafitia; ma o o laua toto lē sala i luga o le fu’a o le saolotoga, ma i luga o le faavae o le saolotoga o le Iunaite Setete, o se amupasa mo le tapuaiga a Iesu Keriso, o le a ootia ai loto o tagata faamaoni i atunuu uma; ma o o laua toto lē sala, faatasi ma toto lē sala o le ’au maturo uma i lalo o le fatafaitaulaga na vaai i ai Ioane, o le a tagi a’e i le Alii o ’Au seia oo ina tauia lena toto i luga o le lalolagi. Amene.