1 O Lo’u loto ia tatau ona tofia ma faauuina la’u auauna o Warren A. Kaotui o se faitaulaga sili pulefaamalumalu i la’u ekalesia, i le laueleele o Freedom ma nofoaga o faataamilo ai;

2 Ma e tatau ona talai atu la’u talalelei tumau e faavavau, ma si’itia a’e lona leo ma lapatai atu i tagata, e lē gata i lona lava nuu, ae faapea i itumalo o tuaoi ai;

3 Ma ia tuu atu lona taimi atoa i lenei valaauga maualuga ma paia, ua Ou tuu atu nei ia te ia, e saili ma le filiga i le malo o le lagi ma lona amiotonu, ma o mea uma e tatau ai o le a faaopoopo i ai; ona e agavaa lē e galue i lona totogi.

4 O lenei foi, e moni Ou te fai atu ia te outou, ua latalata le afio mai o le Alii, ma o le a faate’ia ai le lalolagi e pei o se gaoi i le po—

5 O lea, ia fusi i o outou sulugatiti, ina ia mafai ona avea o outou ma fanau o le malamalama, ma o le a lē faate’ia outou e lena aso e pei o se gaoi.

6 O lenei foi, e moni Ou te fai atu ia te outou, sa i ai le olioli i le lagi ina ua ifo mai la’u auauna o Warren i lo’u tootoo, ma vavae ese o ia lava mai amioletonu o tagata;

7 O lea, amuia lava la’u auauna o Warren, ona o le a Ou alofa mutimutivale ia te ia; ma, e ui i le fiafaalialia o lona loto, o le a Ou siitia a’e o ia i luga, pe a tusa ai ma lona faamaualalo o ia lava i o’u luma.

8 Ma o le a Ou tuu atu ia te ia le alofa tunoa ma le faamautinoaga e mafai ona tulai ai o ia; ma afai e tumau pea o ia o se molimau faamaoni ma se malamalama i le ekalesia, ua Ou saunia se pale mo ia i maota o lo’u Tamā. E faapea lava. Amene.