Malamalama, Malamalama o Keriso

O le malosi, mana, po o le uunaiga faalelagi e pogai mai le Atua e ala mai ia Keriso ma e tuuina atu ai le ola ma le malamalama i mea uma. O le malamalama o le tulafono ua pulea ai mea uma i le lagi ma le lalolagi (MF&F 88:6–13). O lea malamalama e fesoasoani foi i tagata e malamalama i upumoni o le talalelei ma e fesoasoani e tuuina atu i latou i luga o lena ala o le talalelei e taitaiina atu ai i le faaolataga (Ioane 3:19–21; 12:46; Alema 26:15; 32:35; MF&F 93:28–29, 31–32, 40, 42).

E le tatau ona fenumiai le malamalama o Keriso ma le Agaga Paia. O le malamalama o Keriso e lē o se tagata. O le malamalama o Keriso o se uunaiga e sau mai le Atua ma e saunia ai se tasi e talia le Agaga Paia. O le malamalama o Keriso o se faatosinaga o le lelei i le olaga o tagata uma (Ioane 1:9; MF&F 84:46–47).

O se tasi ala e faaali mai ai le malamalama o Keriso o le lotofuatiaifo, lea e fesoasoani i se tasi e filifili ai i le va o le saʼo ma le sese (Moro. 7:16). Pe a aoao atili tagata i le talalelei, o le a sili ona faamalamalamagofie o latou lotofuatiaifo (Moro. 7:12–19). O tagata e uai atu i le malamalama o Keriso e taitaiina atu i latou i le talalelei a Iesu Keriso (MF&F 84:46–48).