Efaraima
I le Feagaiga Tuai, o le atalii lona lua o Iosefa ma Asenati (Kene. 41:50–52; 46:20). E le tusa ai ma tu e masani ai, na maua e Efaraima le faamanuiaga o le tofi o le ulumatua e sui ai Manase, o lē o le atalii ulumatua (Kene. 48:17–20). Na avea Efaraima ma tamā o le ituaiga o Efaraima.
O le ituaiga o Efaraima
Na tuuina atu ia Efaraima le tofi o le ulumatua i Isaraelu (1 No. 5:1–2; Iere. 31:9). I aso e gata ai, o lo latou avanoa ma le tiutetauave o le tauaveina o le perisitua, avatu le savali o le talalelei toefuataiina i le lalolagi, ma sisi i luga se tagavai e faapotopoto mai ai Isaraelu ua faataapeapeina (Isai. 11:12–13; 2 Ni. 21:12–13). O le fanau a Efaraima o le a faapaleina i le mamalu o i latou mai atunuu i matu o e e foi mai i aso e gata ai (MF&F 133:26–34).
O le laau a Efaraima po o Iosefa
O se talafaamaumau a se tasi vaega mai le ituaiga o Efaraima lea sa taitaiina mai Ierusalema i Amerika e tusa o le 600 T.L.M. O le talafaamaumau a lenei vaega ua taʼua o le laau a Efaraima po o Iosefa, po o le Tusi a Mamona. O lea laau ma le laau a Iuta (le Tusi Paia) ua avea o se molimau tuufaatasi e uiga i le Alii o Iesu Keriso, i lona toetu, ma lana galuega paia i nei vaega e lua o le aiga o Isaraelu.