Tulafono a Mose

Na tuuina atu e le Atua tulafono e ala ia Mose i le aiga o Isaraelu e sui ai le tulafono maualuga lea na lē mafai ona latou usiusitai i ai (Esoto 34; FIS, Esoto 34:1–2; FIS, Teu. 10:2). O le tulafono a Mose e aofia ai le tele o mataupu autū, tulafono, sauniga, sauniga faalelotu, ma faatusa e faamanatu ai i tagata o latou tiute ma matafaioi. O aofia ai se tulafono o poloaiga ma galuega o le olaga lelei, faamaoni, ma le faalelotu—e aofia ai taulaga (Levi. 1–7)—mea na fuafuaina e faamanatu atu ai ia te i latou le Atua ma o latou tiute ia te ia (Mosaea 13:30). O le faatuatua, salamo, papatisoga i le vai, ma le faamagaloina o agasala o vaega uma na o le tulafono, faapea foi ma Poloaiga e Sefulu ma le tele o isi poloaiga maualuga e tu ai le olaga lelei ma le faamaoni. O le tele o tulafono tau sauniga na faataunuuina i le maliu ma le toetu mai o Iesu Keriso, lea na faaiuina ai taulaga i le faamasaaina o le toto (Alema 34:13–14). O le tulafono lea sa faia i lalo o le Perisitua Arona ma sa avea o se talalelei sauniuni i le aumaia o e usiusitai i ai ia Keriso.