Tanielu
O le tagata autu i le tusi a Tanielu i le Feagaiga Tuai; o se perofeta a le Atua ma se alii faatuatua tele.
E leai se mea ua faailoa mai e uiga i ona matua, ae ui i lea e foliga mai e tupuga mai o ia i le gafa tau tupu (Tani. 1:3). Sa aveina o ia faatagataotaua i Papelonia, lea na maua ai e ia le igoa o Peletisara (Tani. 1:6–7). O Tanielu ma isi e toatolu na aveina faatagataotaua na mumusu e aai i meaʼai a le tupu ona o mafuaaga faalelotu (Tani. 1:8–16).
Sa mafai e Tanielu ona faauaʼi mai o le loto o Nepukanesa ma Tariu ia te ia i lona mana e faaliliuina ai miti (Tani. 2; 4). Sa ia faitauina foi ma faaliliuina le tusitusiga i le pa (Tani. 5). Sa taupulepule ona fili e tetee ia te ia, ma sa lafoina ai o ia i se lua o leona, ae peitai na faasaoina e le Alii lona ola (Tani. 6).
O le tusi a Tanielu
E lua vaega o i ai i le tusi: O le mataupu 1–6 o i ai tala e uiga ia Tanielu ma ana uo e toatolu; o le mataupu 7–12 o faaaliga faavaloaga na vaai i ai Tanielu. Ua aoao mai e lenei tusi le taua o le faamaoni i le Atua ma ua faailoa mai ai e faamanuia le Alii i e faamaoni.
O se mea sili ona taua i lenei tusi o le faamatalaina lea o le miti a le tupu o Nepukanesa. O lea miti, o loo faatusa ai le malo o le Atua i aso e gata ai i se maa na tofia i le mauga. O le a taavale pea le maa seia tumu ai le lalolagi uma (Tani. 2; tagai foi i le MF&F 65:2).