Eperu, Tusi i Tagata

O se tusi i le Feagaiga Fou. Na tusia e Paulo lenei tusi i tagata Iutaia o le Ekalesia e faatauanau i latou e uiga i vaega tāua o le tulafono a Mose na faataunuuina ia Keriso ma ua suia ai lena tulafono i le tulafono maualuga o le talalelei a Keriso. Ina ua foi mai Paulo i Ierusalema i le iuga o lana misiona lona tolu (e tusa o le 60 T.A.), sa ia iloa e toatele lava tagata Iutaia o le Ekalesia o loo tausisi pea i le tulafono a Mose (Galu. 21:20). E tusa lea o le sefulu tausaga talu mai se konafesi a le Ekalesia na faia i Ierusalema lea na maua ai le tonu e faapea o ni isi o sauniga faapitoa o le tulafono a Mose e le aoga mo le faaolataga o Kerisiano i tagata o Nuuese. E foliga mai, sa mulimuli ane ona tusi atu Paulo i tagata Eperu e faailoa atu ai ia te i latou e ala i a latou lava tusitusiga paia atoa ma pogai tatau ua tatau ai lava ona latou le toe ola i le tulafono a Mose.

O le mataupu 1 ma le 2 ua faamatala mai ai le sili atu o Iesu nai lo agelu. O le mataupu 3–7 ua faatusatusa ai Iesu ia Mose ma le tulafono a Mose ma ua tautino mai ai e sili atu lava Iesu i lo Mose ma le tulafono a Mose. Ua aoao mai foi o le Perisitua Mekisateko e sili atu i lo le Perisitua Arona. O le mataupu 8–9 ua faamatala ai le ala ua aoga ai sauniga a Mose e sauniuni ai tagata mo le misiona a Keriso ma le ala ua avea ai Keriso ma puluvaga o le feagaiga fou (Alema 37:38–45; MF&F 84:21–24). O le mataupu 10 o se apoapoaiga ia filiga ma faamaoni. O le mataupu 11 o se lauga e uiga i le faatuatua. O le mataupu 12 ua tuuina mai ai fautuaga ma alofaaga. O le mataupu 13 ua faamatala mai ai le uiga mamalu o le faaipoipoga ma le tāua o le usiusitai.