Alema, le Atalii o Alema

O se tusi e ese lava i le Tusi a Mamona, e aofia ai se otootoga o talafaamaumau a perofeta e pei o Alema, le atalii o Alema, ma lona atalii o Helamana. O mea na tutupu e pei ona taʼua i le tusi na amata mai e tusa o le tausaga e 91 e oo atu i le 52 T.L.M. O le tusi o loo i ai mataupu 63. Mataupu 1–4 o loo faamatala ai fouvalega a le ʼausoo o Neʼoa ma Amiliki e tetee i sa Nifaē. O taunuuga taua na oo i ai na sili ona mataʼutia e oo i lena vaitau o le talafaasolopito o sa Nifaē. o mataupu 5–16 o loo i ai tala o uluaʼi malaga faaletalaiga a Alema, e aofia ai lana lauga i le Leoleo Mamoe Lelei (Alema 5) ma lana talaiga ma Amoleka i le ʼaʼai o Amonaea. O mataupu 17–27 o loo i ai le talafaamaumau e uiga i atalii o Mosaea ma la latou talaiga i sa Lamanā. Mataupu 28–44 o loo i ai ni isi o lauga sili ona taua a Alema. I le mataupu 32 o loo faatusa ai e Alema le afioga i se fatu; i le mataupu 36 o loo ia toe faamatala ai le tala o lona liliu i le ekalesia i lona atalii o Helamana. O mataupu 39–42 o loo faamaumauina ai le fautuaga a Alema i lona atalii o Korianetona, o lē sa aʼafia i le solia o le tulafono o le ola mamā; o lenei lauga taua ua faamalamalama mai ai le faamasinotonu, alofa mutivalevale, toetutu, ma le Togiola. O mataupu 45–63 o loo faamatala mai ai taua a sa Nifaē i le vaitaimi lena ma le malaga atu i isi nuu i lalo o le taitaiga a Hakota. O taitai maoaʼe faapei o Kapeteni Moronae, Tianekuma, ma Liae na fesoasoani i le faasaoina o sa Nifaē e ala i lo latou lototetele ma mea na latou faia i le taimi tatau.