Samuelu, le Perofeta o le Feagaiga Tuai
O le atalii o Elekana ma Hana, na fanau mai Samuelu i le tali atu i tatalo a lona tinā (1 Samu. 1). A o itiiti o ia sa tuuina atu o ia i le tausiga a Eli, le faitaulaga sili i le fale fetafai i Sailo (1 Samu. 2:11; 3:1). Na valaauina e Ieova o Samuelu a o talavou lava e avea o se perofeta (1 Samu. 3). Ina ua maliu Eli, sa avea Samuelu ma le perofeta ma le faamasino lauiloa o Isaraelu ma sa ia toe fuataiina mai tulafono, faatulagaga tatau, ma tapuaiga faalelotu e masani ai i le laueleele (1 Samu. 4:15–18; 7:3–17).
1 Samu. 28:5–20 o loo i ai se tala ia Samuelu e faapea na toe aumaia mai le oti e le taulaitu o Enetoro i le talosaga a le Tupu o Saulo. O lenei mea e lē o se faaaliga vaaia mai le Atua, auā e lē mafai e se taulaitu po o e foi o i ai aitu vavalo ona uunaia se perofeta e faaali mai i lana talosaga (1 Samu. 28:20; 31:1–4).
O le tusi 1 ma le tusi lona 2 a Samuelu
O nisi Tusi Paia o le Samuelu 1 ma le 2 ua avea ai ma tusi e tasi. A o ni isi Tusi Paia o loo avea ai o ni tusi se lua. O nei tusi o loo aofia ai se vaitaimi e tusa o le 130 tausaga, mai le fanau mai o Samuelu seia oo atu i le taimi a o lei maliu le Tupu o Tavita.
O le tusi 1 a Samuelu
O le mataupu 1–4 o loo faamatala ai le fetuuina ma le faasalaina e le Alii o le aiga o Eli ma le valaauina o Samuelu e avea o le faitaulaga sili ma le faamasino. O le mataupu 4–6 o loo faamatala mai ai le ala na oo atu ai le atolaʼau o le feagaiga i lima o Filisitia. O le mataupu 7–8 o loo tusia ai lapataiga a Samuelu e uiga i le mauaina o atua pepelo ma se tupu amioleaga. O le mataupu 9–15 o loo faamatala mai ai le faauuina o Saulo ma lana nofoaiga e avea o se tupu. O le mataupu 16–31 ua faamatala ai le talafaasolopito o Tavita ma lona mauaina o le pule—sa faauuina e Samuelu o Tavita o lē na fasiotia Koliata. Sa ita Saulo ia Tavita, ae sa musu Tavita e fasioti ia Saulo e ui lava ina maua e ia le avanoa e fasiotia ai o ia.
O le tusi e 2 a Samuelu
O loo i ai faamatalaga i le nofoaiga a Tavita i le avea o se tupu o Iuta ma le avea mulimuli ane ma tupu o Isaraelu uma. O le mataupu 1–4, o loo faaali mai ai se tauiviga umi i le va o soo o Tavita, ma soo o Saulo, ina ua uma ona faauuina Tavita o se tupu e tagata Iutaia. O le mataupu 5–10 ua faaali mai ai le avea o Tavita ma pule sili i le tele o laueleele. O le mataupu 11–21 ua faaali mai ai le faaitiitia o le malosi faaleagaga o Tavita ona o ana agasala ma fouvalega i totonu o lona lava aiga. O le mataupu 22–24 ua faamatala mai ai le taumafai o Tavita e faia se faaleleiga ma le Alii.