Samita, Iosefa, Laitiiti

O le perofeta na filifilia e toefuataʼi le Ekalesia moni a Iesu Keriso i le lalolagi. Na fanau Iosefa Samita i le setete o Veremota i le Iunaite Setete o Amerika ma sa ola o ia mai le 1805 i le 1844.

I le 1820, na faaali ai le Atua le Tamā ma Iesu Keriso ia Iosefa, ma sa iloa ai e ia e leai se ekalesia moni i le lalolagi i lena taimi (IS—T 1:1–20). I se taimi mulimuli ane na asia ai o ia e le agelu o Moronae, o lē na faaali mai le mea sa natia ai papatusi auro lea sa i ai le talafaamaumau e uiga i tagata anamua sa nonofo i le konetineta o Amerika (IS—T 1:29–54).

Na faaliliuina e Iosefa Samita papatusi auro ma le 1830 na ia lomia ai ma taʼua o le Tusi a Mamona (IS—T 1:66–67, 75). I le 1829, na ia maua ai le pule o le perisitua mai ia Ioane le Papatiso ma mai ia Peteru, Iakopo, ma Ioane (MF&F 13; 27:12; 128:20; IS—T 1:68–70).

E pei ona taitaiina e le Atua, i le aso 6 Aperila 1830, sa faatulagaina ai le Ekalesia toefuataiina a Iesu Keriso e Iosefa ma isi e toatele (MF&F 20:1–4). I lalo o le taitaiga a Iosefa, sa faatuputeleina ai le Ekalesia i Kanata, Egelani, ma le vaega i sasaʼe o le Iunaite Setete, aemaise lava i Ohaio, Misuri, ma Ilinoi. Sa mulimuli atu sauaga mamafa ia Iosefa ma le Au Paia i soo se mea na latou nonofo ai. O le aso 27 Iuni 1844, na faamaturoina ai Iosefa ma lona uso o Ailama i Karefasi, Ilinoi, i le Iunaite Setete o Amerika.