Elia

O se perofeta o le Feagaiga Tuai o lē na toe foi mai i aso e gata ai e tuuina atu ki o le mana e faamaufaailogaina ai ia Iosefa Samita ma Oliva Kaotui. I ona aso, sa auauna atu Elia i le Malo o Isaraelu i Matu (1 Tu. 17–22; 2 Tu. 1–2). Sa faatuatua tele o ia i le Alii ma e lauiloa foi i le tele o vavega na ia faia. Sa ia taofia le timu i tausaga e tolu ma le afa. Sa ia faatuina mai se tama mai le oti ma sa ia aumaia foi le afi mai le lagi (1 Tu. 17–18). O loo faatali pea tagata Iutaia i le toe foi mai o Elia, e pei ona valoia e Malaki o le a toe foi mai o ia (Mala. 4:5). O loo avea pea o ia o se malo valaaulia i tausamiga o paseka a tagata Iutaia, o loo tatala ai pea le faitotoa ma le nofoa avanoa o loo faatalitali pea ia te ia.

Na fai mai le Perofeta o Iosefa Samita sa umia e Elia le mana e faamaufaailogaina ai o le Perisitua Mekisateko ma o le perofeta mulimuli sa i ai lea mana aʼo lei oo mai i le taimi o Iesu Keriso. Sa faaali mai o ia i le Mauga o Liua faatasi ma Mose ma faaee atu ki o le perisitua ia Peteru, Iakopo, ma Ioane (Mata. 17:3). Na toe faaali mai o ia, faatasi ma Mose ma isi, i le aso 3 Aperila 1836 i le Malumalu o Katelani Ohaio ma tuuina atu ia lava ki ia Iosefa Samita ma Oliva Kaotui (MF&F 110:13–16). O nei mea uma lava o le sauniuniga lea mo le afio mai faalua o le Alii, e pei ona taʼua i le Malaki 4:5–6.

O le mana o Elia o le mana e faamaufaailogaina ai o le perisitua lea e faamauina ai pe tatalaina ai mea i le lalolagi ma faamauina ai foi pe tatalaina mea i le lagi (MF&F 128:8–18). O loo i ai i auauna filifilia a le Alii i le lalolagi i ona po nei lenei mana e faamaufaailogaina ai ma fai ai sauniga faaola o le talalelei mo e o ola ma e ua oti (MF&F 128:8).