Mamā ma le lē Mamā

I le Feagaiga Tuai, na faaali e le Alii ia Mose ma Isaraelu anamua e naʼo ni meaʼai faapitoa sa manatu i ai e mamā, pe i se isi faaupuga, e tatau ona aai ai. O le eseesega sa faia e Isaraelu i le va o meaʼai e mamā ma meaʼai e lē mamā sa i ai se uiga taua tele i o latou olaga faalelotu ma ā latou fegalegaleaiga faaleolaga. E i ai ni isi o manu, manulele, ma iʼa sa manatu i ai e mamā ma sa taliaina e aai ai, a o isi manu sa lē mamā sa faasaina (Levi. 11; Teu. 14:3–20). O ni isi foi tagata mamaʼi sa manatu i ai e lē mamā.

I le itu faaleagaga, o le mamā o le aunoa lea ma le agasala ma manaoga o le agasala. O le itu lea ua faaaogaina ai le upu e faamatala ai se tagata e amiomamā ma ua i ai se loto mamā (Sala. 24:4). O le nuu o le feagaiga a le Atua sa maua i taimi uma lava faatonuga faapitoa ina ia mamā (3 Ni. 20:41; MF&F 38:42; 133:5).