Mose

O se perofeta o le Feagaiga Tuai o lē na taitaiina atu le fanauga a Isaraelu mai le nofopologa i Aikupito ma tuuina atu ia te i latou tulafono faalelotu, faalevafealoai, ma tulafono tau le soifua mālōlōina e pei ona sa faaali atu e le Atua.

O le galuega auauna a Mose na sopo atu i tala atu o lona lava olaga faaletino. Na aoao mai Iosefa Samita e faapea, na sau Mose faatasi ma Elia i le Mauga o Liua ma sa laua tuuina atu ai ki o le perisitua ia Peteru, Iakopo, ma Ioane (Mata. 17:3–4; Mare. 9:4–9; Luka 9:30; MF&F 63:21).

Na faaali mai Mose ia Iosefa Samita ma Oliva Kaotui i le aso 3 Aperila 1836, i le malumalu i Katelani, Ohaio, ma tuuina atu ia te i laua ki o le faapotopotoina o Isaraelu (MF&F 110:11).

Ua taʼua i faaaliga i aso e gata ai mea e tele e uiga ia Mose. O loo taʼua soo o ia i le Tusi a Mamona ma ua tatou iloa mai le Mataupu Faavae ma Feagaiga e uiga i lana galuega (MF&F 84:20–26) ma sa maua e ia le perisitua mai le tamā o lana avā, o Ietero (MF&F 84:6).

Ua faamaonia foi i faaaliga i aso e gata ai tala o le Tusi Paia e uiga i lana galuega i le fanauga a Isaraelu ma ua toe faamaonia ai foi o ia lava na tusia tusi muamua e lima i le amataga o le Feagaiga Tuai (1 Ni. 5:11; Mose 1:40–41).

Na laveaiina o ia e le afafine o Farao, Esoto 2:1–10.
Na sola i Mitiana, Esoto 2:11–22.
Na faaali atu le agelu a le Alii ia te ia i le laau na mu, Esoto 3:1–15.
Na folafola atu mala e oo mai i tagata Aikupito, Esoto 7–11.
Na amataina e le Alii le Paseka, Esoto 12:1–30.
Na taitaiina le fanauga a Isaraelu e sopoia le Sami Ulaula, Esoto 14:5–31.
Na faatotoina atu e le Alii le manai i le toafa, Esoto 16.
Na ia taia le papa i Horepa ma sa tafe mai ai le vai, Esoto 17:1–7.
Na sii i luga e Arona ma Huro lima o Mose ina ia manumālō ai Iosua ia Amaleka, Esoto 17:8–16.
Na fautuaina Mose e Ietero, Esoto 18:13–26.
Na ia saunia le nuu i le faaali mai o le Alii i le mauga o Sinai, Esoto 19.
Na faaali mai e le Alii Poloaiga e Sefulu ia Mose, Esoto 20:1–17.
Na vaai Mose ma toeaina e fitusefulu i le Atua, Esoto 24:9–11.
Sa nutililiiina e ia papamaa o le molimau ma faaumatia le tamai povi auro, Esoto 32:19–20.
Na la talanoa ma le Atua faafesagai lava, Esoto 33:9–11.

O Le Tusi a Mose

O se tusi i le Penina Tau Tele o loo i ai faaliliuga musuia a Iosefa Samita o mataupu muamua e fitu o le Kenese.

O le mataupu 1 o se talafaamaumau e uiga i se faaaliga vaaia ina ua vaai ai Mose i le Atua, o lē na faaali mai ia te ia le ata atoa o le faaolataga. O le mataupu 2–5 o se tala lea o le Foafoaga ma le paʼū o le tagata. O le mataupu 6–7 o loo i ai se faaaliga vaaia e uiga ia Enoka ma lana galuega i le lalolagi. O le mataupu 8 o loo i ai se faaaliga vaaia e uiga ia Noa ma le lolo tele.

O tusi e lima a Mose

O tusi muamua e lima o le Feagaiga Tuai ua taʼua o tusi a Mose. O papatusi apamemea na aumaia e Nifae mai ia Lapana sa i ai tusi a Mose (1 Ni. 5:11).