Tusi a Paulo
E sefulufa tusi i le Feagaiga Fou o tusi na muamua ona tusi atu ai le Aposetolo o Paulo i tagata o le Ekalesia. E mafai ona vaevaeina ia tusi i ni vaega e pei ona taʼua i lalo:
1 ma le 2 Tesalonia (50–51 T.A.)
Na tusia e Paulo nei tusi i tagata Tesalonia mai Korinito i le taimi o lana malaga lona lua faafaifeautalai. O lana galuega i Tesalonia o loo faamatalaina i le Galuega 17. Sa ia fia toe foi atu i Tesalonia, ae sa le mafai e ia ona faia lea mea (1 Tesa. 2:18). O lea na ia auina atu ai Timoteo e faamalosi atu i e na liliu mai ma aumaia se upu ia te ia e uiga ia te i latou. O le tusi muamua o lana faafetai lea i le toe foi mai o Timoteo. O le tusi lona lua sa tusia lea i se taimi puupuu mulimuli ane.
1 ma le 2 Korinito, Kalatia, Roma (55–57 T.A.)
Na tusia e Paulo tusi i tagata Korinito i le taimi o lana malaga lona tolu faafaifeautalai e tali atu ai i fesili ma faasaʼoina ni tulaga sa faaletonu i le Au Paia i Korinito.
O le tusi i tagata Kalatia atonu sa tusi atu ai i le tele o iunite o le Ekalesia i itu uma o Kalatia. Sa tuua e ni isi o le Ekalesia le talalelei ona o le mananao i le tulafono a tagata Iutaia. O le tusi lenei, sa faamalamalama atu ai e Paulo le faamoemoega o le tulafono a Mose ma le taua o se lotu faaleagaga.
Sa tusia e Paulo le tusi i tagata Roma mai Korinito, i le tasi itu ia saunia ai le Au Paia i Roma mo se asiasiga na ia faamoemoeina mo i latou. O lenei tusi foi ua toe faamautuina ai mataupu faavae ia na fefinauai ai ni isi tagata Iutaia o e na liliu atu i le loto Kerisiano.
Filipi, Kolose, Efeso, Filemoni, Eperu (60–62 T.A.)
Sa tusia e Paulo nei tusi a o i ai o ia i le falepuipui i le taimi muamua i Roma.
Sa tusi atu e Paulo le tusi i tagata Filipi e faaali atu ai lana faafetai ma lona alofa i le Au Paia i Filipi ma faamalosi atu ia te i latou mai lo latou faanoanoa ona o le umi ona tuuina o ia i le falepuipui.
Sa tusia foi e Paulo le tusi i tagata Kolose ona o se lipoti na tuuina mai e faapea ua pauʼū atu le Au Paia i Kolose i le sesē tele lava. Sa talitonu i latou e oo mai le atoatoaga i le tausia lelei o sauniga faalelalolagi ae le o le faatupuina o uiga Faa-Keriso.
O le tusi i tagata Efeso o se tasi lea o tusi sili ona tāua, auā o loo aofia ai i lea tusi aoaoga a Paulo e uiga i le Ekalesia a Keriso.
O le tusi ia Filemoni o se tusi e faapitoa lava ia te ia e uiga ia Onesemo, o se tagata pologa na ia faoina mea a lona matai, o Filemoni, ma sola i Roma. Sa toe auina atu e Paulo Onesemo i lona matai faatasi ma se tusi na talosaga atu ai ina ia faamagaloina Onesemo.
Sa tusia e Paulo le tusi i tagata Eperu i tagata Iutaia o le Ekalesia e faatauanau atu ia te i latou e faapea o le tulafono a Mose ua uma ona faataunuuina ia Keriso ma o le tulafono o le talalelei a Keriso ua sui ai i le tulafono a Mose.
1 ma le 2 Timoteo, Tito (64–65 T.A.)
Sa tusia e Paulo nei tusi ina ua mavae ona tatalaina mai o ia mai le falepuipui i Roma i le taimi muamua.
Sa malaga atu Paulo i Efeso, i le mea na ia tuua ai Timoteo e taofia ni isi o masalosaloga ua tuputupu aʼe, i le faamoemoe e toe foi atu i ai i se taimi mulimuli ane. Sa ia tusia lana tusi muamua ia Timoteo, atonu mai Maketonia, e fautua ma faamalosi atu ia te ia i le faataunuuina o lona tiute.
Sa tusia e Paulo lana tusi ia Tito i se taimi ina ua tatalaina o ia mai le falepuipui. Atonu sa asiasi atu o ia i Kereta, i le nuu sa galue ai Tito. O lea tusi sa faapitoa lava i le ola amiotonu ma le amiopulea i totonu o le Ekalesia.
Sa tusia e Paulo lana tusi lona lua ia Timoteo ao i ai o ia i le falepuipui i le taimi lona lua, ina ua le toe leva ae faamaturoina Paulo. O lenei tusi o loo i ai upu mulimuli a Paulo ma o loo faaalia ai le ofoofogia o le lototele ma le faatuatua i le feagai ai ma lona maliu.