Esoto

O se tusi na tusia e Mose i le Feagaiga Tuai o loo faamatala ai le tuua e Isaraelu o Aikupito. O le talafaasolopito anamua o Isaraelu e pei ona tusia i le Esoto e mafai ona vaevaeina i vaega e tolu: (1) o le nofopologa o le nuu i Aikupito, (2) o lo latou tuua o Aikupito i lalo o le taitaiga a Mose, ma (3) lo latou faamaoni i le auauna atu i le Atua i o latou olaga faalelotu ma o latou olaga faalemalo.

O le vaega muamua, o le mataupu 1–15, o loo faamatala mai ai puapuaga o Isaraelu i Aikupito; o le talafaasolopito anamua ma le valaauga o Mose, o le Esoto ma le amataga o le Paseka; ma le savaliga i le Sami Ulaula, le faaumatiaga o autau a Farao, ma le pese a Mose o le manumalo.

O le vaega lona lua, o le mataupu 15–18, o loo faamatala ai le faaolaina o Isaraelu ma mea na tutupu i le malaga mai le Sami Ulaula i Sinai; o le vai oona o Mara, le tuuina atu o salu ma le manai, le tausia o le Sapati, o le meaalofa faavavega o le vai i Refiti, ma le taua iina ma sa Amalekā; le taunuu mai o Ietero i le togālauapi ma lana fautuaga i le taitaiga faalemalo o le nuu.

O le vaega lona tolu, o le mataupu 19–40, e faatatau i le faapaiaga o Isaraelu i le galuega a le Atua i le taimi o mea tāua na tutupu i Sinai. Na faamanuia ai e le Alii le nuu e avea o se malo o faitaulaga ma se nuu paia; na ia tuuina atu ai Poloaiga e Sefulu; ma sa tuuina atu faatonuga e uiga i le fale fetafai, ma meafale, ma tapuaiga e faia i totonu. Ona sosoo ai lea ma le tala i le agasala a le nuu i le tapuai i le tamai povi auro, ma le mea mulimuli o le tala i le fauina o le fale fetafai ma le saunia o mea uma e manaomia mo sauniga.