Iopu

E ui ina faatatau lenei tusi i le puapuagā o Iopu, a e le o tali atoa e lenei tusi le fesili pe aiseā ua tatau ai ia Iopu (po o se isi lava tagata) ona mafatia i le tīgā ma le aveesea o lona ʼaīga ma ana oloa. Ua faamanino mai i le tusi e le naʼo le agasala a le tagata e oo mai ai puapuagā. E mafia ona faaaoga e le Alii puapuagā ina ia maua ai e tagata le potomasani, aoaiga, ma faatonuga, pe faasalaina foi i latou (MF&F 122).

E mafai ona vaevaeina lenei tusi i vaega e fa. O le mataupu 1–2 o se faatomuaga i le tala. O le mataupu 3–31 ua faamatala mai ai se faasologa o talanoaga i le va o Iopu ma ana uo e toatolu. O le mataupu 32–37 o loo i ai tautalaga a Eliu, le uō lona fa, o lē na tausalaina Iopu i ni pogai e ese mai i pogai ia na taʼua e uō e toatolu muamua. O le mataupu 38–42 ua faaiuina ai le tusi i se faamaoniga ia Iopu o lana ala i le olaga o se ala lelei mai lava i le amataga.

Ua aoao mai le tusi a Iopu, afai e maua e se tasi le malamalama saʼo e uiga i le Atua ma ia ola ai i se olaga e talia e le Atua, o le a sili atu ona mafai e ia ona onosaia puapuagā e oo mai ia te ia. O le faatuatua e le iu o Iopu ua faailoa mai i le fuaitau lenei, “E ui lava ina fasioti o ia ia te aʼu, ou te faamoemoe pea ia te ia” (Iopu 13:15). O loo taʼua foi Iopu i le Esekielu 14:14; Iako. (FF) 5:11; ma le Mataupu Faavae ma Feagaiga 121:10.