Uluai Faaaliga Vaaia

O le faaali mai o le Atua le Tamā ma lona Alo o Iesu Keriso i le Perofeta o Iosefa Samita i se togavao.

I le tautotogo o le 1820, o Iosefa Samita, Laitiiti, ua agaʼi atu i le sefululima o ona tausaga. Sa nonofo o ia ma lo latou aiga i le aai o Palamaira, Niu Ioka. I se va e le mamao i sisifo ma le fale o le aiga sa i ai se togavao o laau tetele. Sa alu atu Iosefa i lena vao e tatalo atu ai i le Atua ina ia iloa ai po o le fea ekalesia e saʼo. Sa uunaia o ia a o ia faitau i le Tusi Paia e ao ona ia saili atu i lena tali mai le Atua (Iako. [FF] 1:5–6). I le tali i lana tatalo, na faaali atu ai le Tamā ma le Alo ia te ia e aua neʼi auai i se ekalesia i luga o le lalolagi i lenā taimi, auā ua sesē uma (IS—T 1:15–20). O lenei mea paia na tupu na amata ai le faasologa o mea na tutupu na aumaia ai le toefuataiga o le talalelei ma le Ekalesia moni a Keriso.