Faasatauroga

O se ituaiga o faasalaga Faa-Roma, sa taatele i taimi o le Feagaiga Fou, lea sa faaoo ai le oti i le tagata e ala i le nonoaina po o le tutuiina i fao o ona lima ma ona vae i se satauro. Sa masani ona faia lenei faasalaga i naʼo tagata pologa ma tagata ua solitulafono mamafa. O le faasatauroga e masani ona faia pe a uma ona sasaina le tagata o le a faasatauroina (Mare. 15:15). O le tagata e faasatauroina e masani ona aveina e ia lona lava satauro i le mea e faasatauro ai o ia (Ioane 19:16–17). O ona lavalava e masani lava ona aveina e fitafita o e na faaooina le faasalaga ia te ia (Mata. 27:35). Ona tutuʼi ai lea o le satauro i le eleele ina ia tusa o le tasi po o le lua futu le va o ona vae ma le eleele. Ona leoleoina lea o le satauro e fitafita seia oti le tagata i luga o le satauro, ma o nisi taimi e oo atu i le tolu aso e faatalitali ai (Ioane 19:31–37).

Na faasatauroina Iesu Keriso ona o se vaega o tagata lē talitonu sa faia o se moliaga pepelo e faapea ua fouvale o ia ia Kaisara ma ua upuvale i lona faapea mai o ia o le Alo o le Atua. O se ofu pāuli (Ioane 19:2), o se pale tuitui, ma isi uiga faatiga na tuuina atu ia Iesu (Mata. 26:67; Mare. 14:65).