Ieremia
O se perofeta o le Feagaiga Tuai o lē na fanau mai i se aiga faitaulaga ma sa vavalo i Iuta mai le 626–586 T.L.M. Sa ola o ia e latalata atu i le taimi o isi perofeta tautaua: O Liae, Esekielu, Hosea, ma Tanielu.
Na tofia Ieremia i le muai olaga e avea o se perofeta (Iere. 1:4–5). I le taimi na avea ai o ia o se perofeta e lata atu i le fasefulu tausaga, sa ia aoao e tetee atu i le ifo i tupua ma le ola lē mamā i tagata Iutaia (Iere. 3:1–5; 7:8–10). Sa feagai o ia ma le faafeagai ma le faifai e le aunoa (Iere. 20:2; 36:18–19; 38:4). Ina ua mavae le paʼū o Ierusalema, o tagata Iutaia o e na sosola i Aikupito na aveina Ieremia faatasi ma i latou (Iere. 43:5–6), o inā, e tusa ai ma talatuu, sa latou fetogia ai o ia seia oo i le oti.
O le tusi a Ieremia
O le mataupu 1–6, o loo i ai valoaga na tuuina atu i le taimi o le nofoaiga a Iosia. O le mataupu 7–20 o loo i ai valoaga na faia i le taimi o Ioakima. O le mataupu 21–38 o mea na faia i le taimi o le nofoaiga a Setekaia. O le mataupu 39–44 o loo i ai valoaga ma faamatalaga o mea na tutupu i le talafaasolopito ina ua mavae le paʼū o Ierusalema. O le mataupu 45 o loo i ai se folafolaga ia Paruka, lana tusiupu, o le a faasaoina le ola o Paruka. O le mea mulimuli, o le mataupu 46–51 o loo i ai valoaga e tetee i atunuu ese. O le mataupu 52, o se faaiuga faaletalafaasolopito. O ni isi o valoaga a Ieremia sa i ai i papatusi apamemea a Lapana lea sa maua e Nifae (1 Ni. 5:10–13). E faalua ona taʼua Ieremia i isi taimi i le Tusi a Mamona (1 Ni. 7:14; Hela. 8:20).
O le tusi a Ieremia o loo aofia ai se faasilasilaga e uiga i le muai olaga o le tagata ma le muai tofia o Ieremia (Iere. 1:4–5); o se valoaga e uiga i le toe foi mai o Isaraelu mai i lo latou tulaga faataapeapeina, i le faapotopotoina mai i Siona e toatasi mai le aai ma e toalua mai le aiga, o se laueleele matagofie e mafai ona nonofo ai Isaraelu ma Iuta i le saogalemu ma le filemu (Iere. 3:12–19); ma se valoaga a le Alii i le toe faapotopotoina mai o Isaraelu mai i atunuu i matu e ala i le auina atu o “tagata faifaiva” ma “tagata tulimanu” e toatele e saili ia te i latou (Iere. 16:14–21). O lenei mea o le a tupu i aso e gata ai e sili atu ona tele nai lo le aumaia e Mose o Isaraelu mai Aikupito (Iere. 16:13–15; 23:8).