Nifae, le Atalii o Liae

I le Tusi a Mamona, o se atalii amiotonu o Liae ma Sarai (1 Ni. 1:1–4; 2:5). Sa maua e Nifae le faatuatua malosi i le afioga a le Atua (1 Ni. 3:7) ma sa avea o se perofeta sili, se tausi talafaamaumau, ma se taitai o lona nuu.

Sa usiusitai ma tatalo i le faatuatua, 1 Ni. 2:16.
Na foi atu i Ierusalema e aumai papatusi apamemea, 1 Ni. 3–4.
Na foi atu i Ierusalema e aumai le aiga o Isamaeli i le vao, 1 Ni. 7.
Na ia maua le faaaliga vaaia lava e tasi na maua e Liae, 1 Ni. 10:17–22; 11.
Na ia vaai i se faaaliga vaaia le lumanai o lona nuu ma le toe fuataiga o le talalelei, 1 Ni. 12–13.
Na faamatalaina le faaaliga vaaia e uiga i le laau o le ola, 1 Ni. 15:21–36.
Na gausia lana aufana ae ala i le faatuatua na mafai ai e ia ona maua mai ni meaʼai, 1 Ni. 16:18–32.
Na fausia se vaa ma malaga atu ai i le laueleele folafolaina, 1 Ni. 17–18.
Sa nonofo eseese sa Nifaē ma sa Lamanā, 2 Ni. 5.
Na tuu atu le molimau faaiu, 2 Ni. 33.

O le tusi 1 a Nifae

O le mataupu 1 e oo i le 18:8 o loo faamatala faapitoa mai ai le perofeta o Liae ma lona aiga i le tuua o Ierusalema. Na malaga atu i latou i luga o toafa naumati seia ona latou taunuu atu i le sami. 1 Nifae 18:9–23 o loo faamatala ai lo latou malaga atu i se laueleele folafolaina, e pei ona faatonuina ai e le Alii, e ui lava ina fouvale Lamana ma Lemuelu. O le mataupu 19–22 o loo faamatala ai le faamoemoega o Nifae i le tausia o talafaamaumau (1 Ni. 6:1–6; 19:18)—ina ia faatauanau i tagata uma ia manatua le Alii lo latou Togiola. Sa ia sii upu a Isaia (1 Ni. 20–21) ma sa faaliliuina savali a Isaia, ma le faamoemoe ia mafai ai e tagata uma ona iloa o Iesu Keriso o lo latou Faaola ma le Togiola (1 Ni. 22:12).

O le tusi e 2 a Nifae

O le mataupu 1–4 o loo i ai nisi o aoaoga ma valoaga mulimuli a Liae ae lei maliu o ia, e aofia ai faamanuiaga i ona atalii ma ā latou fanau. O le mataupu 5 ua faamalamalama mai ai le pogai na o ese ai tagata sa Nifaē mai tagata sa Lamanā. Na fausia e sa Nifaē se malumalu, sa aoao atu le tulafono a Mose, ma sa tausia talafaamaumau. O le mataupu 6–10 o loo i ai upu a Iakopo, le uso itiiti o Nifae. Sa faamatala mai e Iakopo le talafaasolopito o Iuta ma sa vavalo e uiga i le Mesia, o ni isi o ia faamatalaga na sii mai tusitusiga a le perofeta o Isaia. O le mataupu 11–33 sa faamaumauina ai e Nifae lana molimau e uiga ia Keriso, le molimau a Iakopo, valoaga e uiga i aso e gata ai, ma mataupu e tele mai le Feagaiga Tuai i le tusi a Isaia.