Tusi Paia

O se aotelega o tusitusiga Faa-Eperu ma Faa-Kerisiano o loo i ai ni faaaliga paia. O le Tusi Paia o le galuega a perofeta e toatele ma tagata tusitala musuia sa galulue i lalo o le taitaiga a le Agaga Paia (2 Pete. 1:21).

O le Tusi Paia Kerisiano o loo i ai vaega e lua, ua lauiloa lea o le Feagaiga Tuai ma le Feagaiga Fou. O le Feagaiga Tuai ua aofia ai tusi o tusitusiga paia na faaaoga e tagata Iutaia o Palesitina i le taimi o le misiona a le Alii i la le tino. O le Feagaiga Fou e aofia ai tusitusiga e uiga i taimi o le au Aposetolo ma ua manatu i ai e tutusa lava le paia ma le pule e pei o tusitusiga paia a Iutaia. O tusi o le Feagaiga Tuai na maua mai i tusitusiga faaleatunuu e aofia ai senituri e tele ma sa toetoe lava ina tusia atoa i le gagana Eperu, a o tusi o le Feagaiga Fou o le galuega lea a se tupulaga e tasi ma sa tusia tele lava i le gagana Eleni.

O le Feagaiga Tuai o le tulafono lea na tuuina atu ia Mose ina ua teena e Isaraelu le atoatoaga o le talalelei sa i ai i le nuu a le Atua mai le amataga o le olaga faaletino. O le Feagaiga Fou o le talalelei lea e pei ona aoaoina e Iesu Keriso.

I le Tusi Paia Eperu (o le Feagaiga Tuai) ua vaevaeina tusi o i ai i vaega e tolu; o le Tulafono, o le Au Perofeta, ma Tusitusiga. O le Tusi Paia ua faaaogaina e le lalolagi Kerisiano ua faatulagaina ai tusi e tusa ma mataupu, e pei o talafaasolopito, solo, ma valoaga.

O tusi o le Feagaiga Fou o loo alu i le faasologa masani lenei: o Evagelia e fa ma Galuega; o tusi a Paulo; o tusi faalauaitele a Iakopo, Peteru, Ioane, ma Iuta; ma le Faaaliga a Ioane.

O Le Ekalesia a Iesu Keriso o le Au Paia o Aso e Gata Ai e ava ma faamamalu i le Tusi Paia ma e tautino atu foi o loo faaauau pea e le Alii ona tuuina mai isi faaaliga faaopoopo i ana perofeta i aso e gata ai ua lagolagoina ma faamaonia ai tala o tusitusiga paia e uiga i galuega a le Atua i tagata.