Agaga
O le vaega lena o le tagata ola na i ai a o lei fanau mai i la le tino, o le agaga lea e mau i totonu o le tino faaletino i le taimi o le olaga faaletino, ma o lea agaga o le a ola pea pe a mavae le oti e nofo eseese ma le tino seia oo i le toetutu. O mea uma e i ai le ola—o tagata, manu, ma laau—sa agaga ae lei i ai se mea ola i luga o le lalolagi (Kene. 2:4–5; Mose 3:4–7). O le tino agaga e foliga lava i le tino faaletino (1 Ni. 11:11; Eteru 3:15–16; MF&F 77:2; 129). O le agaga o se mea faitino, peitai e sili atu lona atoatoa pe mamā nai lo le elemene faaletino po o mea e tino (MF&F 131:7).
O tagata taitoatasi o se atalii po o se afafine moni lava o le Atua, na fanau mai o se agaga i Matua Faalelagi ae lei fanau mai i matua faaletino i le lalolagi (Epe. 12:9). Ua i ai i tagata taitoatasi uma i le lalolagi se tino agaga ola pea e faaopoopo i se tino o ʼaʼano ma ivi. E pei ona faamatalaina i ni isi taimi i tusitusiga paia, o le tuufaatasiga o le agaga ma le tino faaletino o le tagata ola lea (Kene. 2:7; MF&F 88:15; Mose 3:7, 9, 19; Ape. 5:7). O se agaga e mafai ona ola e aunoa ma se tino faaletino, ae lē mafai e le tino faaletino ona ola e aunoa ma le agaga (Iako. [FF] 2:26). O le oti faaletino o le tuueseesega lea o le agaga ma le tino. I le toetutu, o le a toe faatasia ai le agaga ma le tino faaletino lava lea o ʼaʼano ma ivi sa maua e ia i le olaga faaletino, faatasi ai ma eseesega tele nei e lua: e lē mafai ona toe tuueseeseina le tino ma le agaga, ma o le tino faaletino o le a ola pea ma faaatoatoaina (Alema 11:45; MF&F 138:16–17).