Vaega 96
Faaaliga na tuuina mai ia Iosefa Samita le Perofeta, ua faaali mai ai le faatulagaga o le aai po o le siteki o Siona i Katelani, Ohaio, i le aso 4 o Iuni, 1833, e avea o se faataitaiga i le Au Paia i Katelani. O le mea na faia o se konafesi a faitaulaga sili, ma o le mataupu faapitoa sa iloiloina o le tuuina atu lea o ni fanua faapitoa, sa ta’ua o le faatoaga a Falani, sa umia e le Ekalesia latalata i Katelani. Talu ai ona sa lē ioe faatasi le konafesi po o ai e tatau ona pulea le faatoaga, o lea sa malilie uma ai e ole atu i le Alii e faatatau i le mataupu.
1, Ia faamalosia le Siteki o Siona i Katelani; 2–5, Ia tufatufa e le epikopo le tofi mo le Au Paia; 6–9, Ia avea John Johnson ma uso o le faatulagaga autasi.
1 Faauta, Ou te fai atu ia te outou, o le poto lenei, ia mafai ona outou iloa ai le ala e fai e faatatau i lenei mataupu, ona ua tatau ia te a’u ona faamalosia lenei siteki ua ’Ou faatuina mo le malosi o Siona.
2 O lea, ia tuu atu i la’u auauna o Newel K. Whitney e pulea le fanua lea ua ta’ua i totonu o outou, lea ua Ou fuafuaina e fausia ai i luga lo’u fale paia.
3 O lenei foi, ia vaevaeina i ni fasi fanua, e tusa ma le poto, mo le manuia o i latou o e o saili ni tofi, ma o le a iloilo i se fono i totonu o outou.
4 O lea, ia faaeteete ia outou tagai i lenei mataupu, ma le vaega lena ua tatau ai mo le manuia o la’u faatulagaga, mo le faamoemoe o le aumaia o la’u upu i le fanauga a tagata.
5 Auā faauta, e moni Ou te fai atu ia te outou, o le mea lenei ua silisili ona tatau ia te a’u, ina ia mafai ona alu atu o la’u upu i le fanauga a tagata, mo le faamoemoe o le faamaluluina o loto o le fanauga a tagata mo lo outou lelei. Ua faapea lava. Amene.
6 O lenei foi, e moni Ou te fai atu ia te outou, o le poto ma se mea ua tatau ai lenei ia te a’u, le tatau i la’u auauna o John Johnson, o lē ua Ou talia lana taulaga, ma o lē ua Ou faalogoina ana talosaga, o lē Ou te tuu atu i ai se folafolaga o le ola e faavavau e tusa ai ma lona tausia o a’u poloaiga mai le taimi nei ma le agai i luma—
7 Ona o ia o se e tupuga mai ia Iosefa ma o se ua tofusia i faamanuiaga o le folafolaga na faia i ona tamā—
8 E moni Ou te fai atu ia te outou, ua tatau ia te a’u ona avea o ia o se uso i le faatulagaga, ina ia mafai ona fesoasoani o ia i le aumaia o la’u upu i le fanauga a tagata.
9 O lea ia outou faauu o ia i lenei faamanuiaga, ma ia saili o ia ma le filiga e aveese faalavelave o loo i luga o le fale ua ta’ua i totonu o outou, ina ia nofo ai o ia i totonu. Ua faapea lava. Amene.