Folasaga

Ua faatuina e le Au Peresitene Sili ma le Korama a Aposetolo e Toasefululua le faasologa o Aoaoga a Peresitene o le Ekalesia e fesoasoani ai e faalatalata atili atu oe i lou Tama Faalelagi ma faaloloto ai lou malamalama e uiga i le talalelei toefuataiina a Iesu Keriso. A o faaopoopo e le Ekalesia isi voluma i lenei faasologa, o le a e faatupulaia se faaputuga o tusi o le talalelei e faasino i ai, mo lou aiga. Ua mamanuina tusi o lenei faasologa e faaaoga mo suesuega faaletagata lava ia ma aoaoga o le Aso Sa. E mafai foi ona e faaaogaina e tapena ai isi lesona po o lauga ma tali ai fesili e uiga i aoaoga faavae o le Ekalesia.

Ua avatu i lenei tusi aoaoga a Peresitene Iosefa Filitia Samita, o le na avea ma Peresitene O Le Ekalesia a Iesu Keriso o le Au Paia o Aso e Gata Ai mai le 23 o Ianuari, 1970, i le 2 o Iulai, 1972.

Suesuega Faaletagata Lava Ia

A o e suesueina aoaoga a Peresitene Iosefa Filitia Samita, ia saili ma le loto tatalo mo musumusuga a le Agaga Paia. O fesili i le faaiuga o mataupu taitasi, o le a fesoasoani ia te oe e te malamalama ai i aoaoga a Peresitene Samita ma faaaoga ai i lou olaga. A o e suesueina nei aoaoga, atonu o le a e manao e te mafaufau i ni auala e faasoa atu ai i tagata o lou aiga ma uo. O lea faiga o le a faamalosia ai lou malamalama i mea e te faitauina.

Aoao Atu mai le Tusi Lenei

Ua mamanuina lenei tusi mo le faaaogaina i le fale ma le lotu. I vaega a faitaulaga sili, korama a toeaina, ma Aualofa, e lua lesona o le Aso Sa o masina taitasi o le a aoaoina mai i mataupu o le tusi. Talu ai e tele atu mataupu o le tusi nai lo le mea e mafai ona aoao i le 12 masina, o lea e mafai ai e taitai o uarota ma siteki ona fuafuaina pe o a mataupu e sili ona fetaui ma mea o manaomia e tagata o le au paia.

E mafai ona fesoasoani taiala nei ia te oe e aoao atu ai mai le tusi:

Sauni e Aoao Atu

Saili atu i le taitaiga a le Agaga Paia a o e sauniuni e aoao atu. Ia suesue ma le agaga tatalo le mataupu ua atofa atu ina ia mautinoa ai ua e malamalama i aoaoga a Peresitene Samita. O le a e aoao atu ma le faamaoni a’ia’i ma le mana pe a uunaia oe lava ia i ana upu (tagai MF&F 11:21).

Afai o loo e aoaoina atu se lesona a le Perisitua Mekisateko po o le Aualofa, e le tatau ona e tuu esea le tusi lenei, pe saunia foi lesona mai nisi punaoa. Filifili ma le agaga tatalo mai le mataupu ia aoaoga e te lagona o le a sili ona fesoasoani ai ia i latou o loo e aoaoina. O nisi mataupu e tele atu ‘anomea o loo i ai nai lo mea e mafai ona talanoaina i le taimi faatulagaina o le vasega.

Ia uunaia tagata o le vasega e suesue i le mataupu a o lei oo i le vasega ma ia aumai a latou tusi. A latou faia lena mea, o le a sili ona latou saunia e faasoa mai i talatalanoaga ma taufai faagaeetia ai e le tasi le isi.

I au tapenaga e aoao atu, ia gauai faapitoa atu i “Fautuaga mo Suesuega ma le Aoaoina Atu” o i le faaiuga o mataupu taitasi. I lalo o le faaulutala lea, o le a e maua ai fesili, o mau fesootai, ma fesoasoani mo le aoaoina atu. O fesili ma mau fesootai e patino lava i le mataupu o loo maua ai. O fesoasoani mo le aoaoina atu e mafai ona taiala ai oe i au taumafaiga uma e fesoasoani ai i isi ia maua le fiafia e aoao ma ola ai i le talalelei.

Folasia le Mataupu

A o e folasia atu le mataupu, ma i le gasologa o le lesona, ia e galue e atiina ae se siosiomaga e mafai ai e le Agaga ona pai atu i loto ma mafaufau o i latou e te faiaoga ai. Ina ia amata le lesona, fesoasoani ia i latou e te faiaoga ai, ia taulai atu i aoaoga o le mataupu. Mafaufau i manatu nei:

Faitau ma talanoaina le vaega ua faaulutala “Mai le Soifuaga o Iosefa Filitia Samita” i le amataga o le mataupu.
Talanoaina se ata po o se mau mai le mataupu.
Usu faatasi se viiga e fetaui i ai.
Faasoa se aafiaga puupuu faaletagata lava ia e uiga i le autu.

Tatai Atu i se Talanoaga e Uiga i Aoaoga a Peresitene Samita

A o e aoao atu mai lenei tusi, valaaulia isi e faasoa mai o latou manatu, fai ni fesili, ma aoao e le tasi le isi. A oo ina latou taufai fefaasoaai, o le a sili atu ona latou saunia e aoao ma mauaina faaaliga mo le tagata lava ia. Faataga ni talanoaga lelei e faaauau pea nai lo le taumafai e fai uma le lesona. Ina ia uunaia ni talanoaga, faaaoga ia fesili o i le faaiuga o mataupu taitasi. E mafai foi ona e atiina ae au lava fesili aemaise mo i latou o loo e faiaoga ai.

O vaega ia e filifili mai ai e te ono maua ai ni manatu faaopoopo:

Talosagaina tagata e auai e faasoa mai mea ua latou aoaoina mai a latou suesuega faaletagata lava ia o le mataupu. E ono fesoasoani le faafesootai o nisi o le vasega a o faagasolo le vaiaso ma talosagaina i latou e sauniuni e faasoa mai mea ua latou aoaoina.
Tofi ni tagata e faitauina fesili filifilia i le faaiuga o le mataupu (pe taitoatasi po o ni vaega toalaiti). Fai i ai e vaavaai mo aoaoga i le mataupu e fesootai ma fesili. Ona valaaulia lea o i latou e faasoa mai o latou manatu ma malamalamaaga i isi o le vasega.
Faitau faatasi ni saunoaga filifilia a Peresitene Samita mai le mataupu. Talosagaina tagata auai e faasoa mai faataitaiga mai tusitusiga paia ma mai o latou lava aafiaga e faapupula mai ai mea sa aoao mai e Peresitene Samita.
Fai atu i tagata auai e filifili se vaega e fiafia i ai ma faitau leleoa. Valaaulia i latou i ni vaega taitoalua pe taitoatolu, ma i latou o e sa filifiliaina foi le vaega lena, ma talanoa i mea na latou aoaoina.

Uunaia le Fefaasoaai ma le Faaaogaaga

O le a sili ona anoa ia aoaoga a Peresitene Samita mo tagata o le vasega e faasoa atua i isi ma faaaoga i o latou olaga. Mafaufau i manatu nei:

Fesili i tagata pe mafai faapefea ona latou faaaogaina ia aoaoga a Peresitene Samita i o latou tiutetauave i le fale ma i le lotu. Mo se faataitaiga, e mafai ona e fesoasoani ia latou manatunatu loloto ma talanoaina pe mafai faapefea ona latou faaaogaina ana aoaoga o ni tane, ava, matua, atalii, afafine, faiaoga o aiga, po o faiaoga asiasi.
Uunai tagata auai e faasoa atu nisi o aoaoga a Peresitene Samita i tagata o le aiga ma uo.
Valaaulia tagata auai e faaaoga mea ua latou aoaoina, ma faasoa mai o latou aafiaga i le amataga o le vasega e sosoo ai.

Faaiu le Talanoaga

Otooto faapuupuu le lesona, po o le fai atu i ni tagata auai se toatasi pe toalua e faia lena mea. Molimau atu e uiga i aoaoga sa outou talanoaina. E mafai foi ona e valaauliaina isi e faasoa mai a latou molimau.

Faamatalaga e faatatau i Punaoa o Loo Ta’ua i Lenei Tusi

O aoaoga o i lenei tusi o ni saunoaga e sii sao mai i lauga, tusiga, tusi faitau, tusi patino, ma api talaaga a Peresitene Iosefa Filitia Samita. O saunoaga sii mai punaoa lolomi o loo faatumauina pea ia faailoga, sipelaga, faamataitusi tetele, ma parakalafa o na uluai punaoa sei vagana ai suiga faatonutonu po o ni sese i le taina, pe a ua tatau ai mo le lelei o le faitauga. O lena mafuaaga, atonu e te matauina ai ni nai eseesega laiti i le anotusi. Mo se faataitaiga, o le upu talalelei o loo faamataitusi laiti i nisi saunoaga ae faamataitusi tetele i isi.

E le gata i lea, e tele foi ina faaaoga e Peresitene Samita ia faaupuga e pei o le alii, tagata, po o uso a tagata e faasino i tagata uma, o tane ma fafine. E tele ina ia faaaogaina suinauna o le o ia, lana, ma lona e faasino ai i itupa e lua. O se mea masani lenei i le gagana o lona taimi. E ui i eseesega i le faaaogaaga o nei gagana ma le taimi nei, ae e faatatau lava aoaoga a Peresitene Samita i alii ma tamaitai.