Mataupu 2

O Lo Tatou Faaola, o Iesu Keriso

“Ia avea ma faasilisili i o outou mafaufau, nei ma taimi uma lava, o Iesu o le Keriso, le Alo o le Atua soifua na afio mai i le lalolagi e tuu atu lona soifua ina ia tatou ola ai. O le upumoni lena, ma e faavaea. O luga o iina o loo fausia ai lo tatou faatuatua.”

Mai le Soifuaga o Iosefa Filitia Samita

A o avea o se Aposetolo, sa faamaoni Peresitene Iosefa Filitia Samita i lona valaauga o se tasi o “molimau faapitoa i le suafa o Keriso i le lalolagi atoa” (MF&F 107:23). Na is saunoa: “Ou te taumafai e alofa ia te Ia, lo tatou Togiola, e sili i mea uma lava. O lou tiute lea e fai. Ou te femalagaai i luga ma lalo i lenei atunuu o se tasi o Ana molimau faapitoa. E le mafai ona avea au o se molimau faapitoa a Iesu Keriso pe a na le ia te au le malamalama sili o Ia o le Alo o le Atua ma le Togiola o le lalolagi.”¹

I le avea ai o se tamā, sa galue malosi Peresitene Samita i lona tiute e molimau ai i le Faaola. Ia Iulai 18, 1948, sa ia lafo se tusi i ona atalii o Douglas ma Milton, sa avea o ni faifeautalai. Sa ia tusi atu:

“E i ai taimi ou te nofo ma manatunatu ai, ma i a’u faitauga o tusitusiga paia, ou te mafaufau i le misiona a lo tatou Alii, o mea sa ia faia mo au, ma e a oo mai nei lagona ia te au ou te faapea ifo ia te au lava, ou te le mafai ona ou le faamaoni ia te ia. E alofa o ia ia te au i le alofa atoatoa, e pei ona faia i tagata uma, aemaise i latou o lo o auauna ia te ia, ma e tatau ona ou alofa ia te ia i le alofa uma ua ia te au, e tusa pe le atoatoa, o lea e le tatau ona faapea. E matagofie. Sa ou le i ola i aso o lo tatou Faaola; e lei afio mai faapitoa o ia ia te au. Ou te le i vaai ia te ia. Sa le i manatu Lona Tama ma ia e alagatatau ona tuuina mai ia te au se faamanuiaga sili e pei o lenei. Ae le afaina o lea. Sa ou lagona lona faatasi mai. Ou te iloa o le Agaga Paia ua faamalamalamaina lou mafaufau ma faaalia mai o ia ia te au, o lea ou te alofa i lou Togiola, ou te faamoemoe, ma lagona e moni, e sili nai lo mea uma o lenei lalolagi. Manu ou te le maua lena mea. Ou te manao e faamaoni ia te ia. Ou te iloa na maliu o ia mo au, mo outou ma tagata uma ina ia tatou ola ai e ala i le toetu. Ou te iloa na maliu o ia ina ia faamagaloina ou sese, o au agasala, ma faamamaina i latou. E ese le matagofie o lenei alofa. E mafai faapefea ona ou faia se isi mea, aua ua ou iloaina, ae alofa ia te ia, lou Togiola. Ou te manao i ou atalii i le misiona ia maua lenei lagona. Ou te manao i au fanau ma fanau a au fanau e lagona faapena, ma ia le sese ese mai le ala o le upumoni ma le amiotonu.”²

Sa faamatala e se tasi o atalii o Peresitene Samita:

“I le avea ai o se fanau, o le tele o taimi matou te faalogo ai ia te ia o faapea mai, ‘Maimau e pe a na malamalama tagata i le lalolagi o faigata, o mafatiaga, ma agasala uma na tauave e lo tatou Alii i ona lava luga mo so tatou manuia.’ So o se taimi na te taua ai lenei mea, e maligi ona loimata.

“[I se taimi] sa ou nofo ai na o maua ma lou tama i ana suesuega, na ou matauina sa ia mafaufau loloto lava. Na ou musu e faalavelave i le toafilemu, ae mulimuli ane ua ia fai mai. ‘Oi, lou atalii e, maimau pe ana ta faatasi ma oe i le Aso Tofi ua tea a o matou feiloai i le Usoga i le malumalu. Oi, pe a na e faalogo i a latou molimau i lo latou alolofa mo lo latou Alii ma le Faaola, o Iesu Keriso!’ Ona punou ifo lea o lona ulu, ua maligi ona loimata ma tafe ifo i lona ofutino. Ma, ina ua tuanai le tele o sekone, e aunoa ma le sii ae o lona ulu, ae na luelue lona ulu i luma ma tua, ma fai mai, ‘Oi, ou te alofa tele i lo’u Alii ma le Faaola o Iesu Keriso!’”³

Aoaoga a Iosefa Filitia Samita

O Iesu Keriso le Alo Pele e Toatasi na Fanaua o le Atua ma o le Faaola o le lalolagi.

Sei ou fai atu, i le manino ma le malosi ou te mafaia, tatou te talitonu ia Keriso. Tatou te talia o ia e aunoa ma se masalosalo o le Alo o le Atua ma o le Faaola o le lalolagi.⁴

Christ, dressed in white, is portrayed as a shepherd. He is holding a dark colored lamb while many light colored sheep follow behind him. Illustrating the parable of the lost lamb, this canvas giclée depicts a flock of white sheep grazing on a grassy hill beside a stream. Clothed in a white robe with a crown of light on his head, Christ stands as the good shepherd, compassionately caring for the black lamb cradled in his arms. (Matthew 18:11-14). — “E taulai mea uma i le Alii o Iesu Keriso, o le Togiola o le lalolagi.”

Ua tatou iloa o le faaolataga o lo o ia Keriso; o ia o le Alo Ulumatua o le Tama e Faavavau, sa filifilia ma muai faauuina i le aufono i le lagi e faataunuu le Togiola le iu ma le faavavau; sa soifua mai o ia i le lalolagi o le Alo o le Atua; ma ua ia aumai le ola ma le tino ola pea i le malamalama e ala i le talalelei.

Tatou te talitonu ma le faamaoni atoatoa na afio mai Keriso e laveai i tagata mai le oti faaletino ma le faaleagaga ua oo mai i le lalolagi ona o le pau a Atamu ma ua ia tauave i ona lava luga agasala a tagata uma pe afai e salamo. …

Tatou te talitonu o le alofa tunoa ua faaolaina ai i tatou pe a uma mea uma tatou te mafaia [tagai 2 Nifae 25:23], ma atiae ai i luga o le faavae o le Togiola o Keriso, e tatau i tagata uma ona galulue i o latou faaolataga i le matau ma le gatete i luma o le Alii [tagai Filipi 2:12; Mamona 9:27].⁵

O le eseesega o lo tatou Faaola ma i tatou uma lava ona sa i ai o tatou tama na ola faaletino ma sa avea ma ala ua oo ai ia i latou le oti. O lo tatou Faaola sa leai sona tama faaletino ma sa avea ma ala ua le oo ai ia te ia le oti. Na ia te ia le mana e tuu mai ai lona soifua ma toe aveatu ai [tagai Ioane 10:17–18], ae e le o ia i tatou le mana e tuuina atu ai o tatou ola ma toe aumai ai. E ala i le Togiola a Iesu Keriso ua tatou maua ai le ola e faavavau, e ala i le toetutu o e ua maliliu ma le usiusitai i mataupu faavae o le talalelei.⁶

O ia lava o le Alo e toatasi o le Atua na fanaua, ma e ala i Lona alofa tunoa, ma le alofa tunoa o Lona Tama, ua togiolaina ai i tatou mai le agasala ae faamoemoe i lo tatou salamo. Tatou te iloa na toetu mai o Ia mai le tuugamau, ua Ia afio ae i le mea maualuga, na ia taitai faatagataotaua i le tafeaga [see Salamo 68:18], ma avea ma tupuga o le faaolataga mo i latou uma o e talitonu, o e salamo mai a latou agasala ma talia o Ia o le Togiola o le lalolagi [tagai Eperu 5:9]. O tagata o le Au Paia ua le tuua e masalosalo e uiga i nei mea.⁷

E ui ina faatulaga fuafuaga a tagata, faaaoga teori, amata galuega uiga ese, ma faaputuputu ma aoao atu le tele o aoaoga faavae uiga ese, e tasi le aoaoga e fai ma faavae, ma e mai lena e le mafai ona tatou o ese mai ai: o mea uma e taulai atu i le Alii o Iesu Keriso, le Togiola o le lalolagi. Tatou te talia o ia o le Alo e Toatasi na Fanaua e le Tama i le tino, ua na o ia lava na soifua i le tino o lona Tama e ola pea. Talu ai ona o lona soifua mai ma le tulaga e aafia ai lona afio mai i le lalolagi, na avea o ia ma Togiola o tagata; ma e ala mai le faamasaaina o lona toto ua maua ai e i tatou le avanoa e toe foi atu ai i le afioaga o lo tatou Tama, e faalagolago i lo tatou salamo ma le talia o le ata sili o le togiola ua avea ai o ia ma tupuga.⁸

Tatou te molimau atu o le talalelei a Iesu Keriso o le ata lea o le faaolataga; ma e ala i le taulaga togiola a lo tatou Alii o le a toetutu ai tagata uma i le tino ola pea, e faamasinoina e ia e tusa ai ma galuega na faia i le olaga; ma o e talitonu ma usiusitai i le atoatoaga o le tulafono o le talalelei o le a faatuina mai i le ola e faavavau i le malo o lo tatou Tama.⁹

Ua avea i tatou o ni atalii ma afafine o Iesu Keriso e ala i Lana Togiola ma e ala ia tatou feagaiga ma le usiusitai ia te Ia.

O lo tatou Tama oi le lagi o le Tama o Iesu Keriso, i le agaga ma i le tino. O lo tatou Faaola o le Ulumatua i le agaga, o le Alo e Toatasi na Fanaua i le tino.¹⁰

O Ia [Iesu Keriso] o lo tatou Uso Matua ma sa faamamaluina e lo tatou Tama i le atoatoaga o le pule ma le mana o se sui auai o le au peresitene autu, o le Tama, le Alo, ma le Agaga Paia.¹¹

Ua aoao mai a tatou tusitusiga paia o Iesu Keriso o ia o le Tama ma o ia foi o le Alo. O le upumoni faigofie o ia o le Alo o le Atua i lona fanau mai, i le agaga ma i le tino. O ia o le Tama ona o galuega sa ia faatinoina.¹²

Ua avea le Faaola ma o tatou Tama, i le tulaga o loo faaaogaina ai lenei faaupuga i tusitusiga paia, aua na ia ofoina mai mo i tatou lona soifua, ola e faavavau, e ala i le togiola na ia saunia mo i tatou. I le aoaoga matagofie na tuuina mai e le Tupu o Peniamina ua tatou maua ai lenei: “Ma o lenei, ona o le feagaiga ua outou faia, o le a taʼua ai outou o le fanau a Keriso, o ona atalii, ma ona afafine; aua faauta, o le aso ua fanauina ai e ia outou faaleagaga; ona ua outou fai mai ua liua o outou loto e ala i le faatuatua i lona suafa; o lea, ua fanauina ai outou e ia ma ua avea ai outou ma ona atalii ma ona afafine.” [Mosaea 5:7; tagai foi fuaiupu 8–11.]

O lea, ua avea i tatou ma fanau, o atalii ma afafine o Iesu Keriso, e ala ia tatou feagaiga o le usiusitai ia te ia. Ona o lana pule mamana ma le togiola i luga o le satauro, ua avea ai i tatou ma ona atalii ma afafine faaleagaga, ma o ia o lo tatou Tama.¹³

Jesus Christ depicted preparing the sacrament for the Last Supper. — “Ua avea i tatou ma fanau, atalii ma afafine o Iesu Keriso, e ala ia tatou feagaiga o le usiusitai ia te ia.”

E faapei o Sa Nifae i aso o le Tupu o Peniamina, o i tatou o tagata o le Au Paia o Aso e Gata Ai ua faapea foi ona tatou ave i o tatou luga le suafa o Keriso [tagai Mosaea 5:1–9; 6:1–2]. I vaiaso taitasi i le sauniga faamanatuga, e pei ona poloaiina ai i tatou e fai, tatou te ave i o tatou luga lona suafa ma manatua pea o ia o lea foi na osi ai e Sa Nifae le feagaiga ina ia latou faia.¹⁴

Ua faaalia mai e le Faaola lava Ia i lenei tisipenisione, ma e mafai e i tatou taitoatasi ona i ai se molimau mausali ia te Ia.

Ua tatou talia Iesu o le Togiola o le lalolagi. Tatou te iloa … na Ia faaali mai o Ia lava i lenei tisipenisione. Tatou te le faalagolago i luga o molimau a e … agavaa anamua, o e na ola mai i Ona aso ma talanoa ma Ia i Lana galuega, ma e na Ia faaali i ai ina ua mavae Lona toetu. E i ai e na molimau na ola mai i o tatou lava taimi, o e na vaai ia te Ia, o e na iloa o lo o soifua o Ia ma molimau mai ia i tatou ma le lalolagi i nei mea. Tatou te iloa le moni o a latou molimau. E le i tuua na o Iosefa Samita e molimau i lenei tisipenisione o le misiona a Iesu Keriso, aua na faatuina e le Alii isi molimau o e, faatasi ma le Perofeta o Iosefa Samita, na vaai i le na Togiola, na maua faatonuga mai ia te Ia ma vaai ia te Ia i le lagi o lo o afio i le itu taumatau o le Tama ma faataamilomilo ai agelu paia. Ua latou tuuina mai ia i tatou a latou molimau o le a tulai atu i le lalolagi ma tausalaina i latou e le faalogo i ai.

Ae i le avea ai o i tatou o nisi o le Ekalesia, tatou te le faalagolago i luga o molimau a Iosefa Samita, Oliva Kaotui, Sini Rikitone po o nisi ua maliliu, o e na maua i lenei tisipenisione faaaliga matagofie ma faaaliga vaaia mai le Alii ua latou iloa ai o lo o soifua Iesu ma o ia o le Togiola o le lalolagi. E i ai lava a tatou molimau taitoatasi e ala mai i le Agaga o le Alii ia i latou na ola e tusa ai ma le Talalelei. Afai na tatou ogatasi ma le upumoni ina ua maea ona papatisoina mo le faamagaloina o a tatou agasala, ma faamauina i le faaeeina o lima mo le meaalofa a le Agaga Paia, ua faaali mai e le Alii ia i tatou taitasi o nei mea e moni. Tatou te le faalagolago i luga o molimau a se isi lava mo le malamalama aua ua tatou iloa e ala i le Agaga o Iesu o le Keriso, ma le Togiola o le lalolagi.¹⁵

Afai e i ai se mea se tasi e aumai ai le fiafia ma le filemu ma le faamalieina o le loto o le tagata, nai lo se isi lava mea ou te iloa, o le molimau ola lea o lo o ia te au, ma o lo o ia te oe, o Iesu Keriso o le Alo o le Atua. O le mea moni lena e le mafai ona suia. Atonu e osofaia e tagata; atonu latou te faifai i ai; atonu latou te faapea mai e le o ia o le Togiola o le lalolagi, o lana misiona e le moni, po o lona faamoemoega, e ala i le faamaligiina o lona toto, e le tuuina atu ai i tagata uma le faamagaloina o a latou agasala e faalagolago i lo latou salamo. Atonu latou te le fia talitonu i le toetu mai le oti, pe o Keriso lava ia na afio mai, e pei ona folafola mai e Tusitusiga Paia, ina ua maea ona fasiotia o ia e ona fili; e ui i lea e le suia ai lava le upumoni. Na maliu o Ia mo agasala a le lalolagi, na ia aumaia le togiola mai le oti, na ia tuuina atu i tagata le avanoa o le salamo, ma le faamagaloina o agasala e ala i lo latou talitonu ma le taliaina o mataupu faavae o le talalelei, ma lana misiona. O nei upumoni o faavae ia ma o le a tumau pea; e le mafai ona faaleagaina po o le a lava le mea e fai mai ma mafaufau i ai tagata.¹⁶

Ia avea ma mea silisili i o outou mafaufau, nei ma taimi uma, o Iesu le Keriso, le Alo o le Atua soifua na afio mai i le lalolagi e tuuina atu lona soifua ina ia tatou ola ai. O le upumoni lena, ma e faavaea. I luga o lea e atiae ai lo tatou faatuatua.¹⁷

E tatau ia i tatou uma ona mamanu o tatou olaga i le soifuaga o Iesu Keriso.

O le faataitaiga aupito sili ua faatuina mo tagata o le Alo lea o le Atua lava ia. O lona soifuaga e atoatoa. Sa ia faia mea uma i le atoatoa ma sa mafai ona fetalai mai i tagata uma, “Mulimuli mai ia te au,” [2 Nifae 31:10] ma e tatau ia i tatou uma ona mamanu o tatou olaga i lea.

O le a ou aveatu se faataitaiga mai lona soifuaga. Sa ia aoao tagata i le ala e tatalo ai ma faapea mai: “E moni, e moni, ou te fai atu ia te outou, e ao ina outou mataala ma tatalo e le aunoa, nei faaosoosoina outou e le tiapolo, ma taitai ese atu ai outou faatagataotaua e ia. Ma e pei ona sa ou tatalo faatasi ma outou ia faapea lava ona outou tatalo i lau ekalesia, faatasi ma ou tagata o e e salamo ma ua papatiso i lou igoa. Faauta, o au o le malamalama; ua ou faatuina se faataitaiga mo outou. … O lea, ia tuu i luga lo outou malamalama ina ia susulu atu i le lalolagi. Faauta, o au o le malamalama lea e tatau ona outou tuu i luga — o mea ia na outou vaai ua ou faia. …” [3 Nifae 18:15–16, 24.]

Atonu o lana apoapoaiga e sili ona atoatoa i le tulaga lenei sa tuuina atu i soo sa Nifae. “O lea, o a ituaiga o tagata e tatau ona outou i ai? na ia fesili ai, ona tuuina atu lea o lenei tali: “E moni ou te fai atu ia te outou, e pei lava o au nei.” [3 Nifae 27:27.]¹⁸

E tatau ona tatou talitonu ia Keriso ma mamanu o tatou olaga ia te ia. E tatau ona papatisoina i tatou e faapei ona papatisoina o ia. E tatau ona tatou tapuai i le Tama e faapei ona ia faia. E tatau ona tatou faia le finagalo o le Tama e faapei ona ia faia. E tatau ona tatou saili e fai mea lelei ma galulue amiotonu e faapei ona ia faia. O ia o lo tatou Faaa’oa’o sili, o le uluai Faataitaiga sili o le faaolataga.¹⁹

Afai e i ai so outou faafitauli ma ua manaomia ona fai se filifiliga, ia fai e ala i le fesili ia te oe lava, “O le a se mea e faia e Iesu?” Ona fai lea e pei ona ia faia.

E mafai ona outou lagona le olioli i lona faatasi mai ma lana musumusuga e taitai ia te outou i aso taitasi o o outou olaga pe a outou saili i ai ma ola agavaa ai. O le alofa o Iesu ma le malosi faalaeiau o lona Agaga Paia e mafai ona moni ia te outou e faapei foi o fanau na ia faalatalata atu ia te ia a o soifua ai i le lalolagi.²⁰

Sei ou fai atu e faapea o i latou e mulimuli i ana faataitaiga o le a faapei o ia ma faamamaluina faatasi ma ia i le malo o lona Tama; ia maua le mamalu, le mana, ma le pule. I nisi o soo sa Nifae o e sa mulimuli ia te ia ma le atoatoaga o le faamoemoega o le loto na ia fetalai: “… o le a avea outou e pei lava o au, ma ua pei lava au o le Tama; ma o le Tama ma au ua tasi.” [3 Nifae 28:10.] …

Ou te tatalo ina ia mafai ona tatou savavali uma i ona tulagaaao ma tausi i ana poloaiga ina ia tatou faapei o ia. O lou naunautaiga lenei. Ou te faamoemoe e faapea foi oe.²¹

Fautuaga mo Suesuega ma le Aoaoina Atu

Fesili

E te manatu na faapefea ona uunaia le fanau a Peresitene Samita i lana molimau ma lona faaalia o le alofa mo le Faaola? (Tagai “Mai le Soifuaga o Iosefa Filitia Samita.”) Manatu i ni mea e mafai ona e fai e faateleina ai lou alofa mo le Faaola ma faasoa atu lau molimau e uiga ia te Ia.
Na folafola mai e Peresitene Samita e faapea “e taulai ma mea uma i le Alii o Iesu Keriso” (vaega 1). O a ni auala e mafai ai e lenei upumoni ona uunaia o tatou olaga taitoatasi? O a ni auala e mafai ai ona uunaia o tatou aiga?
O a ni auala e fesoasoani ai aoaoga i le vaega 2 e te malamalama ai i lau sootaga ma le Faaola? O le a le uiga ia te oe o le ave o le suafa o Keriso i ou lava luga?
Na apoapoai mai Peresitene Samita o nisi o tagata o le a osofaia ma faifai i le upumoni e uiga ia Keriso ma Lana Togiola (tagai vaega 3). E faapefea ona tatou faamalosia a tatou molimau ina ia tatou tatalia nei luitau? E mafai faapefea e matua ona fesoasoani i fanau e faamalolosia a latou molimau?
Manatunatu loloto i le fautuaga a Peresitene Samita e fesili: “Mata o le a le mea e faia e Iesu?” (vaega 4). O a ni auala faapitoa tatou te mamanu ai o tatou olaga i le soifuaga o Iesu Keriso? Afai tatou te mulimuli i Ana faataitaiga, e faapefea ona tatou uunaia olaga o isi?

Mau Fesootai

Ioane 14:6; 1 Nifae 10:6; Mosaea 3:5–7; Helamana 5:12; 3 Nifae 11:3–7; MF&F 34:1–3; 76:22–24; Iosefa Samita—Talafaasolopito 1:17

Fesoasoani mo le Aoaoina Atu

“[Aloese] mai le faaosoosoga o le faaaoga uma o le mau anomea. … O loo tatou aoao atu tagata, ae le o le mataupu lava ia; ma … o auivi o lesona taitasi ua ou vaai i ai, e matua tele atu mea o i ai nai lo le mea e mafai ona tatou faaaogaina i le taimi faatulagaina” (Jeffrey R. Holland, “Aoao Atu ma le Aoaoina i le Ekalesia,” Liahona, Iuni 2007, 91).