Mataupu 15
Faaipoipoga e Faavavau
“O le atoatoaga ma faamanuiaga o le Perisitua ma le Talalelei e tupuga mai le faaipoipoga Faaselesitila. O le palealii lea o sauniga o le Talalelei ma o le palealii foi o sauniga o le malumalu.”
Mai le Soifuaga o Iosefa Filitia Samita
Na tau atu ia Iosefa Filitia Samita e sefuluvalu ona tausaga, e i ai se tamaitai talavou e igoa ia Louie Emily Shurtliff o le a malaga mai e nofo i le aiga o Samita a o aoga o ia i le kolisi. Ae sa ofo pea o ia—ma fiafia—ina ua sau o ia i le fale mai le galuega i se tasi aso ma maua mai Louie o loo taina se pese i le piano a lo latou aiga. Na amata mai i lena aso, i le faaiuga o le taumafanafana o le tausaga e 1894, na amata ai e Iosefa ma Louis se faigauo na faasolo atu lava ina loloto seia lagona le alofa o le tasi i le isi. Sa faamauina i laua i le malumalu i Sate Leki i le aso 26 o Aperila, 1898.1
Sa fiafia Louie ma Iosefa i se faatasiga matagofie. Ina ua valaauina o ia [Iosefa] e auauna i se misiona mo le lua tausaga i Egelani a o le i leva ona tuanai la laua faaipoipoga, sa faigaluega o ia [Louie] mo lona tama e lagolago ai o ia i mea tautupe. Sa ia [Louie] lagolagoina foi o ia [Iosefa] i lagona ma le faaleagaga e ala lea i tusi faamalosiau na te lafoina atu mo ia. Ina ua foi mai o ia, sa la faavaeina se aiga fiafia ma maua ni afafine se toalua i lo latou aiga. Ae ina ua tuanai le 10 tausaga o le la faaipoipoga, sa mai tigaina Louie i le taimi o lona maitaga lona tolu ma maliu ai i le 31 o ona tausaga.
Na lagona e Iosefa le mafanafana i lona mautinoa ua alu ese atu Louie “mo se nofoaga sili,” ma sa ia tusia i lana api talaaga se tatalo ina “ia agavaa o ia e feiloai ai ma ia i le mamalu e faavavau, ina ia toe faatasia ma ia.”2 Ae ui i le filemu ma le faamoemoe ua ia maua i le talalelei, sa ia matua misia lava Louie. Sa ia popole foi i ona afafine ua aunoa ma se tina i le aiga. E le i pine ona maliu Louie, ae feiloai atu Iosefa ia Ethel Georgina Reynolds. E ui o lona alofa ia Louie e le i faaitiitia, ae sa ia alofa ia Ethel, faapea foi i ona afafine. Ina ua talia e ona matua, matua o Louie, ma matua o Ethel, na talosaga atu Iosefa ia Ethel e la te faaipoipo. Sa faamauina i laua ia Novema 2, 1908. Sa maua e i laua se olaga fiafia ma le tumu i gaoioiga fai faatasi ma sa maua nisi fanau e toaiva. O lo latou aiga sa faamatalaina i le faatulaga lelei, galulue malosi, faaaloalo, mama, aoaoina i le filemu, alofa, ma gaoioiga malie lelei.3
Ina ua tuanai le 29 tausaga o la la’ua faaipoipoga, na maliu Ethel i se gasegase matautia ua alu ai lona malosi mo le 4 tausaga. O lenei foi, ua toe nofo toatasi Iosefa ae sa faamafanafanaina i le mautinoa o le faaipoipoga e faavavau.4 Ma o lea foi, na ia feiloai ai i se tasi sa avea ma se e faasoa i ai lona olaga. Na faamauina o ia ma Jessie Evans ia Aperila 12, 1938. “I le 33 tausaga o la laua faatasiga sa la feoai faatasi ai toeitiiti lava o taimi uma, lata mai po o le mamao. Sa ia fesoasoani foi ia te ia e fai le faatau o meaai, solo ipu, ma tuufagu fualaau aina i le taimi o le tautoulu. Sa leai sona popole e tusa ai o ia o se aposetolo o faaaogaina se talieleele.”5 E masani ona faasoa mai Jessie e uiga i lona toalua: “O ia o se tama sili ona agalelei ua ou iloa. Ou te le i faalogo lava o tautala o ia i se upu e tiga ai se isi.” Sa ia tali mai i le ata, “Ou te le iloa lava se upu faatiga loto.”6
Na tusia e le tusitala o Ioane J. Stewart e uiga ia Peresitene Samita ma lona agamalu ma le alofa ia Jessie: “Mai le pulelaa na ia apoapoai atu i tane ina ia alolofa ma tuuina atu o latou taimi mo a latou ava. Ae o le lauga na pa’i mai ia te au o lona a’e i le iva o poloka e agai atu i le Aai o Sate Leki i auala tafato i matu i le Falemai o le Au Paia o Aso e Gata Ai i le vevela o se aso o Iulai i le 1971 ma faamanatu ai le 95 tausaga o lona soifua e nofonofo ai i autafa o le moega o lona faletua gasegase o Jessie. A o faasolo ina tigaina lona gasegase, sa ia nofo ai ma ia i le ao ma le po mo ni nai vaiaso e vaavaaitu ma le popole, ma tuuina atu ia te ia mea na te mafai ona fai e faamafanafana ma faamalosiau ai o ia seia oo i le iuga.”7
Na maliu Jessie i le aso 3 Aokuso, 1971. Ina ua tuanai le lua masina, na tuuina atu e Peresitene Samita le saunoaga amata o le konafesi aoao. O lana molimau na faaalia ai o lona faanoanoaga ua faamafanafanaina e ala lea i le talitonu i le Alii ma le faamoemoe mo le ola e faavavau:
“Ua ou lagona e tautala atu e pei o Iopu o anamua, o lona malamalama na sau mai le sosia lava e tasi na sau ai lo’u malamalama: ‘Aua ua ou iloa o lo o soifua le na togiolaina au, o aso amuli foi e tulai mai ai o ia i luga o le fogaeleele,’ ma ‘ou te iloa atu le Atua i lo’u tino: ou te iloa atu ia te ia mo au lava, e vaai atu foi ou mata ia te ia. …’ (Iopu 19:25–27.)
“Ma a o ou tuuina atu lau molimau faatasi ma le molimau a Iopu, ou te fia faatasi foi ma ia i le agaga faafetai, mo le tagi atu, ua tuuina atu i le tiga ma le faanoanoa o lona loto: ‘… na foaiina mai e le Alii, ma e aveeseina foi e le Alii; ia faamanuina le suafa o le Alii.’ (Iopu 1:21.)
“Ou te tatalo ina ia mafai ona taitaiina i tatou uma e le mana o le Agaga Paia, ina ia tatou savavali ma le amiotonu i luma o le Alii, ma ina ia tatou maua le ola e faavavau i afioaga ma malo ua saunia mo i latou o e usiusitai.”8
Ina ua maea le saunoaga a Peresitene Samita, na saunoa Peresitene Harold B. Lee, o le sa taitai i le sauniga e faapea: “Ou te talitonu o tagata uma o le Ekalesia i soo se mea, ua iloa le tulaga sa ia tuuina atu ai lenei feau mamana, ua siitia maualuga e le mana ma le malosi ua ia faaalia i o tatou luma iinei i lenei taeao. Faafetai, Peresitene Samita, mai le taele o o matou loto.”9
Aoaoga a Iosefa Filitia Samita
1
O le faaipoipoga faaselesitila o le palealii lea o sauniga o le talalelei a Iesu Keriso.
E leai se sauniga e faatatau i le Talalelei a Iesu Keriso e sili ae lona taua, sili ae lona mamalu ma paia, ma sili ae lona talafeagai mo lo [tatou] olioli e faavavau… nai lo le faaipoipoga.10
O le atoaga ma faamanuiaga o le Perisitua ma le Talalelei e tupuga mai le faaipoipoga faaselesitila. O le palealii lea o sauniga o le Talalelei ma o le palealii o sauniga o le malumalu.11
Ou te manao e talosaga atu i ou uso ma tuafafine lelei, tagata lelei o le Ekalesia, e o i le malumalu e faaipoipo ai mo le taimi nei ma le faavavau.12
2
I se faatusatusaga i faiga a le lalolagi, o le faaipoipoga e tumau e faavavau i le fuafuaga a le talalelei.
O le faaipoipoga ua manatu le toatele o tagata ua na o se konekarate faalemalo po o se maliega i le va o le tane ma le fafine o le a laua nonofo faatasi i le sootaga o le faaipoipoga. O le mea moni, o se mataupu autu e faavavau e faalagolago atoa i ai le i ai o le tagata soifua. Na tuuina mai e le Alii lenei tulafono i le tagata i le amataga lava o le lalolagi o se vaega o le tulafono o le Talalelei, ma o le uluai faaipoipoga e tumau e faavavau. E tusa ai ma le tulafono a le Alii o faaipoipoga taitasi uma e ao ona tumau e faavavau. Afai e ola tagata soifua uma i le usiusitai faamaoni i le Talalelei ma i lena alofa ua maua mai le Agaga o le Alii, o le a faavavau faaipoipoga uma. …
… O le faaipoipoga e pei ona malamalama i ai le Au Paia o Aso e Gata Ai o se feagaiga faauuina e faavavau. O le faavae mo le faavavau faaeaina aua a aunoa ma lea, o le a leai se alualu i luma e faavavau i le malo o le Atua.13
“O le faaipoipoga e pei ona malamalalma i ai le Au Paia o Aso e Gata Ai o se feagaiga faauuina e faavavau.”
E manino ia i tatou uma e faitau i nusipepa, o e faalogologo i talafou i le leitio ma e matamata i le televise, ua tele naua ua le manatu i le faaipoipoga ma le iunite o le aiga i le tulaga ua finagalo i ai le Alii.14
O le faaipoipoga o le feagaiga paia, ae ui i lea i le tele o tulaga ua avea ma mataupu autu o talasua masoā, o se meaula faavaitaimi, e ala i le taufaaleaga ma le le mama, ma, o lea foi, e le toatele o e manatu i le faaleleia o i latou lava ae le manatu i le paia o lenei mataupu faavae autu sili.15
Ua tuuina mai e le Alii ia i tatou lana talalelei e faavavau e fai ma malamalama ma tagavai mo i tatou, ma o lenei talalelei e aofia ai lana faatulagaga paia o le faaipoipoga, e faavavau lona natura. E le tatau ona tatou mulimuli i le faiga o faaipoipoga a le lalolagi. E tele atu lo tatou malamalama nai lo le lalolagi, ma e sili atu le faamoemoe o le Alii mo i tatou nai lo mo i latou.
Ua tatou iloa le faatulagaga sao o le faaipoipoga. Ua tatou iloa le taua o le iunite faaleaiga i le ata o le faaolataga. Ua tatou iloa le tatau ona tatou faaipoipo i le malumalu, ma ia tausia lo tatou mama ma le le pona ina ia maua le faamaufaailoga faamaonia a le Agaga Paia o le Folafolaga i luga o a tatou faatasiga o le faaipoipoga.
O i tatou o fanau faaleagaga a lo tatou Tama i le Lagi, ua faapaiaina le fuafuaga o le faaolataga ina ia mafai ai ona tatou o mai i le lalolagi ina ia alualu i luma ma faaleleia ina ia faapei o ia; o lenei, ua ia saunia le fuafuaga o le talalelei ina ia mafai ai ona maua o tatou lava iunite faaleaiga e faavavau ma olioli ai i le ola e faavavau.16
O le faaipoipoga sa le i faamoemoeina lava e le Alii e faamuta i le oti o le tino faaletino ae ia faaopoopo i ai le mamalu, puleaga, mana i tagata na osia feagaiga, ma le tuufaatasiga e faavavau o le aiga i le malo o le Atua. O nei faamanuiaga o lo o faapolopolo mo i latou o e naunau e tausi i lenei feagaiga e pei ona faailoa mai e le Alii. Ua le na o le faatasiga i le va o le tane ma le fafine, aua ua fetalai mai le Alii, i le faaipoipoga ua avea ai i laua ma tino e tasi ma ulufale atu ai i se faigapaaga ma le Atua.17
3
O le faamaoni i le feagaiga o le faaipoipoga e maua ai le fiafia ma taitai atu ai i faamanuiaga o le mamalu e faavavau.
Ou te faafetai i le Alii mo le malamalama i le faavavau i le feagaiga o le faaipoipoga, e tuu atu ai i le tane le aia e faatasi ai ma lana ava, ma le ava le aia e faatasi ai ma lana tane i le olaga a sau, pe a faapea ua ulu atu i le Maota o le Alii ma faamauina ai mo le taimi nei ma le faavavau e se tasi o umia le mana faamau, aua e leai lava se isi auala e mafai ai ona maua lenei faamanuiaga sili. Ou te faafetai foi mo le malamalama e faapea, o sootaga faaleaiga, ma le tuufaatasia o le aiga, e faaauau pea, e faatulaga lelei, i le amiotonu i le olaga a sau.18
Ou te manao e aioi atu ia i latou ua malaga atu i le malumalu ma faaipoipo ai ina ia faatuatua ma faamaoni ia latou feagaiga ma a latou tautinoga, aua o le Maota o le Alii ua latou osia ai feagaiga paia.19
E leai se mea e saunia ai le tagata mo le mamalu i le malo o le Atua e tusa ai o le faamaoni i feagaiga o le faaipoipoga. …
Afai e taliaina faalelei, e avea lenei feagaiga o se auala o le fiafiaga sili. O le mamalu sili i lenei olaga, ma le olaga a sau, mamalu, puleaga ma le mana o le alofa atoatoa, o faamanuiaga na e maua mai ai. O nei faamanuiaga o le paia e faavavau ua faapolopolo mo i latou ua naunau e ola ai i lenei feagaiga ma isi feagaiga uma o le Talalelei.20
O le sootaga ma le tuufaatasia o aiga, o le a faaauau pea, i lona tulaga aloaia, i le amiotonu i le olaga a sau.”
O le a le uiga o le faaipoipoga i tagata o le Ekalesia? O lona uiga ua latou maua i ia sauniga faamanuiaga silisili, ma le faapaleina, o faamanuiaga o le ola e faavavau. O lenei o le auala lena ua tuuina mai e le Alii, “ola e faavavau,” o lona uiga e le gata ina o le a ulufale atu le tane ma le fafine i le ola e faavavau, ae o a la fanau na fananau mai i lalo o le feagaiga e faapea foi e ala i lo latou faatuatua ona maua le ola e faavavau. E le gata i lea, o le tane ma le fafine pe a tuanai le toetutu o e ua oti o le a le faamutaina. O lona uiga e finagalo le Alii ina ia faaauau pea a la fanau e faavavau, ma o le faatulagaga o le aiga e le i ai sona gataaga. [Tagai MF&F 132:19–24.]21
Ina ia mafai ona faataunuuina faamoemoega o lo tatou Tama e Faavavau, e tatau ona i ai se tuufaatasiga, o tane ma fafine e maua faamanuiaga ua folafola mai ia i latou ua faatuatua ma faamaoni e faaeaina i latou i le tulaga Faale-Atua. E le mafai e se tane ona maua le atoatoaga o faamanuiaga o le malo o le Atua na o ia lava, e le mafai foi e le fafine, ae o laua faatasi e mafai ona maua faamanuiaga uma ma aia e faatatau i le atoatoaga o le malo o le Tama.22
4
O agaga taitasi e tonu o latou loto o le a i ai le avanoa e maua ai faamanuiaga o le faaipoipoga e faavavau, i lenei olaga po o le isi olaga.
I le fuafuaga sili o le faaolataga e leai se mea e le i vaai totoa i ai. O le talalelei a Iesu Keriso o se mea aupito sili lona matagofie i le lalolagi. Na te talia agaga taitasi uma o e tonu o latou loto ma e saili ma le filiga ia te ia ma naunau e usiusitai i ana tulafono ma feagaiga. O lea, afai e i ai se tasi po o le a lava le tulaga ua faafitia le aia tatau e usiusitai ai i se tasi o feagaiga, o le a faamasinoina o ia e le Alii e faatatau i le mea o i ai lona loto. E afe ma afe tagata o le Ekalesia [e le mafai ona ulu atu i le malumalu] o e ua faaipoipo ma atinae o latou aiga i le Ekalesia, o e ua le maua le avanoa e “faamau” ai mo le taimi nei ma le faavavau. O le toatele o nei tagata ua maliliu, ma e maua o latou faamanuiaga ona o galuega e faia e isi. O le talalelei o se galuega e mafai ona fai ai nisi ma sui o e ua le mafai ona latou faia. Sa fai Iesu ma sui e faataunuuina se galuega mo i tatou uma ona e le mafai ona tatou faia mo i tatou lava. E faapena foi, ua ia faamatuu atu i tagata o le Ekalesia o lo o soifua ina ia mafai ona fai i latou ma sui mo e ua maliliu ae le i maua se avanoa e galulue ai mo i latou lava.
I le ma lenei, e afe ma afe alii ma tamaitai talavou, o e ua maliliu ma ua i ai i le lalolagi o agaga e aunoa ma se avanoa mo nei faamanuiaga. O le toatele o i latou ua maliliu i taua; o le toatele ua maliliu a o talavou i latou; ma o le toatele ua maliliu a o laiti lava. O le a le faagaloina lava e le Alii se tasi o i latou. O faamanuiaga uma mo le faaeaina o le a maua e i latou, aua o le ala lea o le faamasinoga tonu ma le alofa mutimutivale. O lea mo i latou o lo o ola i siteki o Siona ma faapaologa o malumalu; afai ua latou le maua nei faamanuiaga i lenei olaga, o le a tuuina atu ia i latou nei faamanuiaga i le meleniuma.23
E leai se tasi e taofia mai le faaeaga pe afai e tumau le faamaoni. … O se tane le agavaa e le mafai ona taofia se tamaitai faamaoni mai lona faaeaga ma e faapena foi i le fafine i le tane.24
5
E saunia fanau ma le autalavou mo le faaipoipoga e faavavau a o latou aoao e uiga i le feagaiga o le faaipoipoga, atiina ae le faatuatua tumau, ma tausia lo latou mama ma le le pona.
Ia mafai ona vaai tama ma tina uma o le Au Paia o Aso e Gata Ai ua latou aoao a latou fanau i le paia o le feagaiga o le faaipoipoga. Ia latou uunaia a latou fanau e leai lava se isi ala nai lo le faamamaluina o feagaiga a le Atua, o iina o le feagaiga o le faaipoipoga e faavavau o se tasi lea ala silisili ma le aupito taua, e mafai ona latou maua ai faamanuiaga o le ola e faavavau. 25
O lenei olaga e puupuu, ma o le faavavau e umi. A tatou manatunatu o le feagaiga o le faaipoipoga o le a tumau e faavavau, e onomea le tatau ona mafaufau loloto i ai. … O le timaiga talafeagai mo le autalavou o le mafaufau ma le faaeteete ma le manatu e filifili lelei ai se soa e i ai se faatuatua tumau i le Talalelei. O lenei tagata o le a faigofie ona iloa lana amiotonu i tulafono ma feagaiga uma. Afai o le alii talavou ma le tamaitai talavou ua faavaeina lelei i le misiona paia a lo tatou Alii ma talitonu o le Talalelei na faaalia mai e ala ia Iosefa Samita, le Perofeta, e mautinoa lava e i ai se faatasiga fiafia o le a tumau e faavavau.26
Ou te aioi atu ia te outou, le autalavou a Siona i nuu uma, ina ia tausia lo outou mama ma le le pona ina ia outou agavaa e ulufale atu i le maota o le Alii ma, faatasi ai ma soa o a outou filifiliga, e olioli ai i nei faamanuiaga sili uma ua ofoina mai e le Alii ia te outou.27
E tasi le mea … ou te manao ia matau e—tagata talavou, a latou faaipoipo, ma ua le fiafia i se amataga laitiiti ma le maulalo, ae ua mananao e maua mea e pei ona maua e o latou matua i le taimi ua faaipoipo ai i latou. … Ua latou mananao e amata i mea uma e mafai ai ona faafaigofie ina ia maua ai e i latou le fiafia. Ou te lagona o se mea sese lena. Ou te manatu e ao ona latou amata i lalo i mea faatauvaa, tuu atu lo latou faatuatua i le Alii, atiina ae sia mea itiiti ii ma sia mea itiiti i o e tusa ma lo latou mafai, ma faaputuputu mea taitasi, seia iu ina latou oo i le tulaga o le tamaoaiga e pei ona latou moomia ia maua.28
6
A o tausia ma le faamaoni e le tane ma le ava ia sauniga ma mataupu faavae uma o le talalelei, o le a faatupulaia le suamalie o lo latou olioli i le faaipoipoga.
O le faaipoipoga ua faauuina e le Atua. O se mataupu faavae amiotonu pe a mauaina ma faatino i lona paia. Afai e ulu atu alii ma tamaitai o aso nei i lenei feagaiga i le agaga o le lotomaulalo, alofa ma le faatuatua, e pei ona poloaiina ai i latou e fai, ma savavali i le amiotonu i ala o le ola e faavavau, o le a leai ni faaipoipoga e tatala, leai ni aiga malepelepe; ae o se fiafia, ma se olioli, e le mafai ona faamatalaina.29
Ou te manao e faailoa atu i ou uso ma tuafafine lelei o e ua faaipoipo i le malumalu ina ia aua lava nei galo ia i latou faamanuiaga sili na faaee atu ia i latou: Ua tuuina atu e le Alii ia te i latou e ala i lo latou faatuatua, o le aia e avea ai o ona atalii ma ona afafine, o suli faatasi ma Iesu Keriso, ma umia ai, e pei ona taua iinei, mea uma ua i ai i le Tama [faasino i le Roma 8:13–19 ma le MF&F 76:54–60].
E ui i lea, e i ai tagata o le Ekalesia ua le mafai ona malamalama i lenei mea ina ua maea ona faaipoipo mo le taimi nei ma le faavavau, … maua le folafolaga o le atoatoaga o le malo o le Tama, ua latou faataga mea e oo mai i o latou olaga e aumai ai feteenaiga ma ua feeseeseai ai i latou. Ma ua galo ia i latou ua latou osia feagaiga mo le taimi nei ma le faavavau o le tasi ma le isi; ae le gata i lea, ua latou osia le feagaiga ma lo latou Tama i le lagi.30
A o tausia faatasi e se tane ma le ava i le faatuatua le talalelei, o lo la olioli ma le fiafia i le faaipoipoga o le a “faateleina le suamalie.”
Afai ua tausia i le faamaoni ma le faatuatua e le tane ma le ava sauniga uma ma mataupu autu o le talalelei, o le a le toe tupu ae se isi mafuaaga e tetea ai. O le olioli ma le fiafia e faatatau i le faatasiga i le faaipoipoga o le a sili lona suamalie, ma o le tane ma le ava o le a faatupulaia le vavalata o le tasi ma le isi a o gasolosolo aso. E le gata o le a alofa le tane i le ava o le ava foi i le tane, ae o fanau ua fanaua e i laua o le a ola i se siosiomaga o le alofa ma le lotogatasi. O le alofa o le tasi mo isi o le a le faaitiitia, ae le gata i lea o le alofa o tagata uma i lo tatou Tama e Faavavau ma lona Alo o Iesu Keriso o le a matua mauaa i o latou loto.31
Fautuaga mo Suesuega ma le Aoaoina Atu
Fesili
-
O lenei mataupu e amata i faataitaiga o le olioli ma le faanoanoa e mafai ona avea o se vaega o le faaipoipoga ma le olaga o le aiga. E faapefea e le mataupu faavae o le faavavau o aiga ona faatumauina i tatou i le taimi o le fiafia ma le faanoanoa i o tatou olaga?
-
O le a le uiga o le faaipoipoga faaselesitila ua avea ai ma “palealii o sauniga o le malumalu”? (tagai vaega 1.)
-
Sa faatusatusa e Peresitene Samita le silasila a le Alii i le faaipoipoga ma le vaai a le lalolagi (tagai vaega 2). O le a se mea taua ia te oe e faatatau i lenei faatusatusaga? E faapefea ona tatou puipui ma faamalosia le faaipoipoga ma le aiga i le lalolagi i aso nei?
-
I le vaega 3, na lisi ai e Peresitene Samita e le itiiti ifo i le lima faamanuiaga e oo mai ia i latou e “faatuatua ma faamaoni” i le feagaiga o le faaipoipoga. O le a le uiga ia te oe o le faatuatua ma faamaoni i le feagaiga o le faaipoipoga?
-
O a ni mea e mafai e matua ona fai e “aoao ai a latou fanau e uiga i le paia o le feagaiga o le faaipoipoga”? (mo ni manatu, tagai i le vaega 5.)
-
I le vaega 6, ua faamatala ai e Peresitene Samita le ala e mafai ai e le faatasiga i le faaipoipoga ona “sili ona suamalie.” O a ni faataitaiga o lenei mataupu faavae ua e vaai i ai? Afai ua e faaipoipo, mafaufau i mea e mafai ona e fai e aumai ai le olioli sili ma le alofa i lau faatasiga i le faaipoipoga
Mau Fesootai
Fesoasoani mo le Aoaoina Atu
“O fesili e tusi i luga o le laupapa a o lei amataina le vasega, o le a fesoasoani i le au a’oa’o e amata ai ona mafaufau i autu a o le’i amataina le lesona” (O Le Aoao Atu, E Leai Se Isi Valaauga E Sili Ai, 93).