Mataupu 20
Alofa ma le Popolega mo Fanau Uma a lo Tatou Tama
“Ou te iloa ua iloa ma malamalama uma tagata pe o ai i latou, ma malamalama i le paia o le amataga o le mea na o mai ai, … e i ai o latou lagona o le agalelei ma le mafutaga o le tasi i le isi e suia ai o latou soifuaga uma ma aumai ai le filemu i le lalolagi.”
Mai le Soifuaga o Iosefa Filitia Samita
Na matauina e Iosefa Filitia Samita Jr. ma Ioane J. Stewart, “O lo o i ai i le mafaufau loloto i mea laiti o le olaga, e mafai ona matuai manino le vaai ia Iosefa Filitia Samita moni.” Ona la faasoa mai lea o faataitaiga e tolu o “mea laiti mafaufau loloto” sa ia faia:
“I se tasi aso i se Konafesi a le Ekalesia i le Tapeneko i le Lotoa o le Malumalu, sa vave taunuu ane ai se alii e 12 ona tausaga, ua fiafia e i ai iina mo se taimi muamua, ina ia mautinoa sona nofoaga e latalata i luma. … A o le i amataina le sauniga, ma ina ua tumu nofoa uma, na ta’u atu e le faasino nofoa i le tamaitiiti e faaavanoa lona nofoa e nofo ai se Senate o le Iunaite Setete ua tuai mai. Ma le lotomaulalo na usitai le tamaitiiti, ma sa tutu i le va o nofoa, ua le fiafia, ua maasiasi, ma ua tagi.” Na “silafia e Peresitene Iosefa Filitia Samita le alii laitiiti lea ma talo atu i ai e sau i luma [i luga o le tulaga]. Ina ua ta’u atu i ai e le tamaitiiti le mea ua tupu na ia fai mai, ‘E leai se aia a lena faasino nofoa na te fai ai lena mea ia te oe. Ae sau, e te nofo i ou tafatafa,’ ma sa faasoa lona nofoa ma ia, i le lotolotoi o aposetolo o le Ekalesia.
“I se tasi aso a o ia faatalanoaina se vaega o ni alii talavou e malaga atu mo le lua tausaga i le misiona mo le Ekalesia, na [ia] matauina ai se alii faifaatoaga ua valaauina i le itu i sasae o Kanata. ‘Atalii, e malulu iina. E i ai sou ofu mafanafana lelei?’ ‘Leai lau susuga, e leai sou ofu.’ Sa ia ave le alii i le isi itu o le auala i se faleoloa ma faatau mo ia le ofu sili ona mafanafana sa i ai.
“O le aso na lagolagoina ai o ia i le konafesi e avea o se Peresitene o le Ekalesia na sau ai se teineitiiti ina ua maea le sauniga ma aapa atu i lona aao. Sa ootia lona lagona i lenei mea sa ia punou ifo i lalo ma sii ae le teineitiiti i ona aao. Na ia iloa o lona igoa o Venus Hobbs, … toeitiiti fa tausaga lona matua. I lona aso fanau na faateia ai Venus i se telefoni: Ua telefoni mamao mai Iosefa Filitia Samita ma lona faletua e usu mai le pese ‘Manuia lou aso fanau’ mo ia.”1
O le faaalia o le agalelei e le o ni mea na tutupu tai tasi tasi ae o se mamanu o le soifuaga atoa. O Peresitene Samita o se “tamalii e tumu i le agamalu ma le agaalofa. O lona soifuaga e faaalia ai mea na ia faia pea lava pea e fesoasoani atu ai i e matitiva, faamafanafana i e loto momomo, fautua i e ua le mautonu ma le faaalia o le alofa moni ‘o le alofa mama lava lea o Keriso.’ [Moronae 7:47.]”2
Aoaoga a Iosefa Filitia Samita
1
I le iloa ai o le Atua o le Tama o tagata uma, ua tatou naunau ai e alolofa ma faamanuia i isi.
Ou te manatu afai e iloa ma malamalama tagata uma pe o ai i latou, ma iloa le paia o le amataga o le mea na o mai ai, ma le agavaa e le gata o se vaega o lo latou tofi, o le a ia i latou lagona o le agalelei ma le alofa faaleuso o le tasi i le isi o le a suia ai lo latou ala atoa e ola ai ma aumaia le filemu i le lalolagi.
Tatou te talitonu i le mamalu ma le paia o le foafoaga o le tagata. O lo tatou faatuatua o loo faavae i luga o le talitonuga o le Atua o lo tatou Tama, ma o i tatou o ana fanau, ma o tagata uma o uso ma tuafafine i le aiga e tasi e faavavau.
I le avea ai o ni tagata o lona aiga, sa tatou mau faatasi ma ia a o lei faavaeina lenei lalolagi, ma sa ia faauuina ma amataina le fuafuaga o le faaolataga tatou te maua ai le avanoa e alualu ai i luma e pei ona tatou taumafai i ai.
O le Atua o lo o tatou tapuai i ai o se Tamalii ua faamamaluina ma ua i ai le mana uma ma le atoatoaga, ma ua ia fausia le tagata i lona lava faatusa ma foliga, ma na uiga uma o loo ia te ia.
Ma o lo tatou talitonuga i le mamalu ma le iuga o le tagata o se vaega taua i la tatou ekalesia ma lo tatou olaga. O le faavae lava lea o aoaoga a lo tatou Alii e faapea “o le poloaiga muamua ma le sili” o le: “Ia e alofa atu i le Alii lou Atua ma lou loto atoa, ma lou agaga atoa, ma lou manatu atoa”; e faapea foi i le poloaiga sili lona lua: “E te alofa atu i le lua te tuaoi ia pei o oe lava ia te oe.” (Tagai Mataio. 22:37–39.)
Ona o le Atua o lo tatou Tama, ua ia i tatou ai le naunautai faalenatura e alofa ma auauna ai ia te ia ma avea o ni tagata agavaa o lona aiga. Tatou te lagona o se tautinoga le faia o mea ua ia finagalo tatou te fai, e tausi i ana poloaiga ma ola e tusa ai ma tulaga faatonuina o lana talalelei—o ia mea uma o vaega taua o le tapuai ma le faamaoni.
Ona o tagata uma o o tatou uso, o lea ua i ai lo tatou naunautaiga e alolofa ma faamanuia ma faaaumea i latou—ma e tatou te talia foi o se vaega taua o le tapuai ma le faamaoni.
O lea, o mea uma lava tatou te fai i le Ekalesia e ogatotonu i le tulafono paia o lo tatou alolofa ma tapuai i le Atua ma auauna i o tatou uso a tagata.
E le tioa, i le avea ai o se ekalesia ma o ni tagata e i ai lo tatou popolega loloto ma le tutumau mo le manuia mo fanau uma a lo tatou Tama. Tatou te saili mo lo latou manuia faaletino ma le faaleagaga faatasi ai ma i tatou foi. Tatou te tatalo mo i latou e pei ona tatou faia mo i tatou, ma tatou te taumafai e ola ina ia latou iloa a tatou galuega lelei, ma latou vivii atu ai i lo tatou Tama o i le lagi. [Tagai Mataio 5:16 .]3
“Ona fai atu lea o Peteru, e leai sau ario po o sau auro; a o le mea ua ia te au ou te avatu lea ia te oe: I le suafa o Iesu Keriso le Nasareta ina tu ae ia i luga ma savali” (Galuega 3:6).
2
A o tatou alolofa ma lagolagoina e le tasi le isi i le Ekalesia, e avea i tatou ma malosiaga i le lalolagi mo le lelei.
“Afai tou te alolofa mai ia te au, ia outou tausi mai i au poloaiga.” [Ioane 14:15.]
O nei upu sa tuuina atu e le Matai i ona soo i ni nai itula a o lumanai lona maliu, a o ia faatasi ma i latou e taumamafa i le tausamaaga, ma tuuina atu ia i latou faatonuga mulimuli a o le i mafatia o ia mo agasala a le lalolagi. I lena lava faatasiga, ma a o le i faia nei saunoaga, sa ia faasino atu i le mataupu lava e tasi ina ua ia fetalai:
“Lau fanau e, e toeitiiti nai aso ou te i ai ia te outou. Tou te saili mai ia te au; ae pei ona ou fai atu ia Iutaia, O le mea ou te alu i ai e le mafai ona outou o mai i ai; e faapea foi ona ou fai atu nei ia te outou. O le poloaiga fou ou te tuu atu ai ia te outou, Ia outou fealofani; faapei ona ou alofa atu ia te outou, ia fealofani foi outou.” [Ioane 13:33–34.] …
… Ua le na o ni uo i tatou; o i tatou o uso ma tuafafine, o fanau a le Atua, na o mai, e pei ona ou fai atu, mai le lalolagi e osi feagaiga, e usiusitai i ana tulafono ma ola i mea uma ua tuuina mai e ala i musumusuga. Ua poloaiina i tatou e alolofa le tasi i le isi. “O le poloaiga fou lenei,” ua fetalai mai ai le Alii, ae pei o isi lava foi poloaiga ua leva ma faavavau. Na leai lava se taimi sa le i iai lena poloaiga ma le taua mo le faaolataga, ae e fou pea lava. E le pasiā lava, aua e moni lea.4
Ou te talitonu o lo tatou tiute paia o le alofa o le tasi i le isi, talitonu o le tasi i le isi, faatuatua o le tasi i le isi, o lo tatou tiute le faagalo i masei ma aleu o le tasi i le isi, ma aua nei faasalalauina i ou lava luma po o le vaaiga a le lalolagi. E le tatau ona i ai se sailiili masei, leai se taumuimui, leai se tau faaleaga, o le tasi i le isi, i le Ekalesia a Iesu Keriso o le Au Paia o Aso e Gata Ai. E ao ona tatou faamaoni le tasi i le isi ma i mataupu autu taitasi o lo tatou talitonuga ma aua nei mataua le tasi i le isi. E le tatau ona tatou loto eleelea le tasi i le isi, pe ita le tasi i le isi, ma e le tatau ona oo mai lagona i o tatou loto e aua le faamagalo le tasi i le isi ia tatou solitulafono. E le tatau ona i ai se lagona i loto o le fanau a le Atua o le le faamagalo i soo se tagata, e le afaina po o ai lava. …
… E le tatau ona nana o tatou lagona o le tasi i le isi, ae ia maua le lagona faamagalo ma le alofa faaleuso ma faaletuafafine, o le tasi i le isi. Ia tatou manatua taitoatasi faaletonu ma vaivaiga o le tagata lava ia ma le taumafai e faaleleia. Tatou te le i taunuu i se tulaga o le atoatoa, e faigata ona faamoemoe o le a tatou mafaia i lenei olaga, ae o lea, e ala i le fesoasoani a le Agaga Paia, e mafai ona tatou tutu faatasi fevaaiai ma faatoilalo ia tatou agasala ma faaletonu. Afai tatou te faia o lea, faaaloalogia poloaiga uma a le Alii, o le a ia i tatou le malosiaga i le lalolagi mo le lelei; o le a lofituina i tatou ma faatoilalo leaga uma, o feteenaiga uma i le upumoni, ma ia faataunuuina le amiotonu i luga o le fogaeleele. Aua o le a salalau le Talalelei ma o le a lagona e tagata o le lalolagi uunaiga o le a liligi atu mai tagata o Siona, ma o le a latou liliu atu i le salamo mai a latou agasala ma talia le upumoni.5
3
Tatou te faaali atu le alofa mo o tatou uso a tagata e ala i le auauna atu mo i latou.
Na afio mai lo tatou Faaola i le lalolagi e aoao tatou ia alofa le tasi i le isi, ma ina ua molimau mai lena lesona tele e ala i le tiga sili ma le oti ina ia tatou ola ai, pe tatou te le faaali atu ea lo tatou alofa mo o tatou tagata soifua i auaunaga e fai mo i latou? …
O galuega auauna e tatau ona faia mo isi. E tatau ona faaloaloa atu lima fesoasoani mo e manaomia, mo i latou ua le i faalogo i le upumoni ma o loo i ai i le pogisa faaleagaga, mo e matitiva, o e ua sauaina. Pe ua e toilalo? Tatou mafaufau i upu a le tusisolo, Will L. Thompson. … O le solo e amata faapenei:
“Ua ou faia ea se lelei i le aso?
Ua ou fesoasoani ea?
Ua ou faafiafia ea,
I se ua faanoanoa?
A leai, ua le aoga.(Viiga, nu. 136)]6
Pe a tatou faaloaloa atu le aao fesoasoani i isi, ua tatou faaalia lo tatou alofa mo i latou,
O la tatou misiona e mo le lalolagi uma—mo le filemu, ma le faamoemoe, ma le fiafia, ma le faaolataga faaletino ma le faavavau o fanau uma a lo tatou Tama. … I lo’u malosi uma o uunaiga ou te uunaia ai nei tagata e faaauau ona aapa atu ma faamanuia olaga o fanau uma a lo tatou Tama i soo se mea.7
4
E ao ona tatou faafetai ma alolofa i tagata mo i latou lava.
A o ou tamaitiiti, sa i ai la matou solofanua e igoa ia Junie. O se tasi o manu sili ona poto sa ou vaai i ai. E foliga mai toetoe lava o se tagata i lona tomai. Sa le mafai ona ou lokaina i totonu o le fale o manu aua sa ia tatalaina pea lava pea le fusi i le faitotoa o lona pa. Sa masani ona ou tuu le fusi nonoa i le afa o le faitotoa o le mea sa ia nofo ai i luga ae o le tumutumu o le pou, ae sa faigofie ona ia susue i luga i lona isu ma ona nifo. Ona alu lea i fafo i le malae.
Na i ai se paipa i le malae e faaaoga e faatumu ai le suavai mo a matou manu. Sa ki e Junie le paipa i ona nifo ma tuu le suavai e alu pea. Sa masani ona fai mai lou tama ia te au ona sa ou le mafai ona taofi le solofanua i totonu o le fale o manu. Sa le sola ese lava o ia; sa ia ki faaalu le suavai ona savalivali faataamilo lea i le malae po o luga o le vao po o totonu o le togalaau. I le vaeluaga o le po, ou te faalogo ai o lo o alu le suavai ona ou ala lea i luga ma tape ma toe loka Junie.
Na fai mai lou tama e foliga mai e poto atu le solofanua i lo au. I se tasi aso na ia manao na te lokaina le solofanua i totonu ina ia le mafai ona alu i fafo. Na ia ave le fusipau e masani ona faataamilo i luga o le pou ma loka faataamilo i le pou ma lalo o le uamea faalava, ona ia fai atu lea, “Tamaitai, sei tatou vaai la pe e te alu i fafo nei!” Na ma tuua ma lou tama le fale o manu ma savavali agai atu i le fale; ae ma te le i oo i le fale, ae ua oo mai Junie i o ma tafatafa. Ona alu lea ma toe ki foi le suavai.
Sa ou faapea atu nei, masalo, ua poto lava o ia nai lo se isi o i ma’ua. Sa le mafai ona ma taofia Junie mai le aluese mai lona pa. Ae le faapea ua leaga o ia, aua e le faapena lava. E le manao lou tama e faatau atu pe fesuiai foi, aua e tele isi ona uiga lelei e sui ai lenei sese laitiiti.
O le solofanua e faatuatuaina ma faalagolago i ai i le tosoina o la matou taavale toso e faapei foi o lona poto e alu ai i fafo ma le pa. Ma e taua lenei mea, aua o Tina o le faatosaga e fai lona laisene. Pe a valaauina o ia i se nofoaga i se mea o le vanu, e masani ai lava o le vaeluapo, ou te ala i luga, ave le moli matagi mai le fale o manu, ma faagutu Junie i le taavaletoso.
Ua na o le sefulu pe sefulutasi tausaga o lou matua i le taimi lea; ma o lena solofanua sa filemu ae malosi naua na te feaveai maua ma Tina i le vanu atoa, i ituaiga tau eseese. Peitai, e tasi le mea e le mafai ona ou malamalama ai o le, pe aisea o le toatele o pepe e fananau i le po ma o le toatele o i latou e fananau i le taumalulu.
O le tele o taimi ou te faatali ai i le taavaletoso mo Tina, ma sa manaia lo ma toalua ai ma si tamaitaimatua filemu o Junie. O lenei aoaoga ma lenei solofanua sa lelei tele mo au, aua i le amataga mai o lou olaga sa ou aoao e alofa ma faafetai i ai mo ia lava. O ia o se solofanua lelei na o nai amio faaletonu iti lava. E faapei foi o tagata. E le atoatoa se tasi o i tatou; ae o tatou taitasi o lo o taumafai e atoatoa, e faapei o lo tatou Tama i le lagi. E manaomia lo tatou faafetai atu ma alolofa atu i tagata mo i latou lava.
Atonu e tatau ona e manatua lenei mea pe a e faia se iloiloga o ou matua po o faiaoga po o taitai o le uarota ma le siteki po o uo—po o uso ma tuafafine. O lenei lesona ua nofo mau ia te au—e vaai i mea lelei i tagata e ui o lo o tatou taumafai e fesoasoani ia latou foia nai amio faaletonu e tasi pe lua. …
Sa vave ona ou aoao mai le amataga o le olaga e alofa ae aua le faamasino i isi, ma taumafai lava e foia o’u lava faaletonu.8
5
A tatou alolofa i le Alii ma o tatou loto atoa ma o tatou tuaoi e faapei o i tatou lava, ua tatou ogatasi ma le tulafono paia.
“E te alofa atu i le Alii lou Atua ma lou loto atoa, ma lou agaga atoa, ma lou manatu atoa.
“O le poloaiga muamua lena ma le sili.
“E faapena foi le lona lua, E te alofa atu i le lua te tuaoi, ia pei o oe lava ia te oe.
“O na poloaiga e lua ua autu ai le tulafono uma ma le au perofeta.” Mataio 22:37–40
I se isi faaupuga, o mea uma lava ua faaalia mo le faaolataga o le tagata mai le amataga seia oo mai i lo tatou taimi ua puipuia, ua aofia ai, ma o se vaega o nei tulafono tetele e lua. Afai tatou te alolofa i le Alii ma o tatou loto atoa, ma o tatou agaga atoa, ma o tatou manatu atoa, ma o tatou tuaoi e pei o i tatou lava, ona leai lea o se isi mea e toe manaomia. Ona tatou ogatasi lea ma le tulafono paia atoa. Afai tatou te naunau e ola ogatasi ma nei poloaiga sili e lua—ma e ao ona tatou faia pe a tatou fia agavaa e ola ai i le afioaga o le Atua—ona aveesea lea o le amioleaga, loto leaga, fiasili, manumanu, faamasaa toto, ma agasala uma o natura taitasi mai le lalolagi. Ona oo mai lea o le aso o le filemu ma le fiafia e faavavau. O se aso matagofie lea aso! Ua faamanuiaina i tatou i mafuaaga e tele e iloa ai o lenei tulaga e silisili ona manaomia ma o le a faatuina ai i tagata le tulaga Faatamā o le Atua ma le usoga atoatoa a tagata.
… Pe mafai ona tatou faapea atu tatou te alolofa i le Alii ma le agaga atoa? Pe mafai ona tatou faapea atu tatou te sailia le soifua manuia o o tatou tuaoi e pei ona tatou faia mo i tatou lava?9
Ia tatou alolofa i le Alii aua o le faavae lea o mea uma. O le poloaiga muamua lenei, ma o le poloaiga e lua, o le alofa i o tatou tuaoi e pei o i tatou lava, e pei o le muamua, ma pe a maea ona fai ua tatou faataunuuina le tulafono, aua e leai se mea o totoe e le i faia.10
Fautuaga mo Suesuega ma le Aoaoina Atu
Fesili
-
Manatu i le “mafaufau loloto i mea laiti” na faia e Peresitene Iosefa Filitia Samita mo isi (tagai “Mai le Soifuaga o Iosefa Filitia Samita”). O a mea e tatau ona tatou fai e fausia ai mamanu faapena o le agalelei i o tatou olaga?
-
E faapefea e mataupu faavae i le vaega 1 ona fesoasoani ia i tatou ina ia agalelei ma alolofa ia i latou o loo siomia ai i tatou?
-
O a ni mea na faagaeetia ai oe e uiga i fautuaga a Peresitene Samita i le vaega 2? Aisea e te manatu ai o le a avea i tatou “o se malosiaga i le lalolagi mo le lelei” a o tatou mulimuli i lenei fautuaga?
-
O a mea na fai e Iesu Keriso e “aoao ai i tatou e alofa le tasi i le isi”? (Tagai vaega 3.) O a auala tatou te mulimuli ai i Ana faataitaiga?
-
Iloilo le tala ia Junie le solofanua (tagai vaega 4). Aisea e te manatu ai e taua le “faafetai ma alofa i tagata mo i latou lava”? O a ni mea e mafai ona tatou fai ina ia iloa ai mea lelei i isi e ui o lo o tatou taumafai e fesoasoani e foia o latou mausa leaga?
-
O le a le uiga ia te oe o le tausia o poloaiga i le Mataio 22:37–40? (Mo ni faataitaiga, tagai vaega 5.) Aisea ua tatou “aga faatasi ai ma le tulafono paia atoa” pe a tatou tausia nei poloaiga?
Mau Fesootai
Galuega 17:28–29; Roma 8:16–17; 1 Ioane 4:18–21; Mosaea 2:17; 18:8–10; Moronae 7:45–48
Fesoasoani mo le Aoaoina Atu
Manatu e valaaulia nisi e faitau ia soaulutala i mataupu ma filifili se vaega e ‘anoa ia i latou po o o latou aiga. Valaaulia i latou e suesue aoaoga a Peresitene Samita i lena vaega, e aofia ai fesili e faatatau i ai i le faaiuga o le mataupu. Ona fesili lea i tagata o le vasega e faasoa mea ua latou aoaoina.