Mataupu 12
O Le Tautoga ma le Feagaiga o le Perisitua
“O faamanuiaga a le Alii e foai mai i le Au Paia ma le lalolagi e ala mai le galuega a i latou e umia lana perisitua paia, o ē ua fai ma ona sui.”
Mai le Soifuaga o Iosefa Filitia Samita
Ia Aperila 9, 1951, ina ua tuanai lana auaunaga mo le 41 tausaga o se Aposetolo, sa lagolagoina ai Iosefa Filitia Samita o se Peresitene o le Korama a le Toasefululua. E le i leva ona sii o aao e lagolagoina ai o ia, ae laugaina e Peresitene Samita le faalapotopotoga. Sa ia faasoa mai teisi ona lagona e uiga i lona valaauga:
“Ua ou iloa o le tofiga ua valaauina i ai au o se tasi o tofiga sili ona taua. Ua ou lagona ai le lotomaulalo. …
“Ou te faafetai i le Alii mo le talalelei a Iesu Keriso, ma le avea ai o au o se tasi o le Ekalesia, mo le avanoa ua ou maua e auauna ai. E na o le tasi lou naunautaiga, e ui ina ou vaivai, o le faalauteleina lea i le mea e oo i ai lou iloa o lou valaauga.”1
E apoapoai atu pea lava pea ia Peresitene Samita ia i latou o umia le perisitua e faalautele o latou valaauga. E ui ina sa ia faasoa faalauaitele atu lona naunautaiga e faalautele ona valaauga i le perisitua,2 na seasea ona ia faamatalaina lana taumafaiga e faataunuu ai. Ae ui i lea, sa i ai se taimi e tasi na ia manatunatu ai i le auaunaga faaleperisitua sa ia faia ma lana uo o Siaosi F. Risati, o le sa ia sui ai o se Peresitene o le Korama a le Toasefululua:
“Mo le fasefulu tausaga sa ou i ai i le aufono, auai i konafesi, ma galue ai i auala eseese ma Peresitene Siaosi F. Risati. …
“Sa ma malaga faatasi mai le tasi itu o siteki o Siona i le isi itu. Mai le amataga, o i matou, o uso o le au pulega aoao, sa malaga taitoalua i asiasiga i siteki o Siona. I nofoaga sa le mafai ona oo i ai nofoaafi, ma e tele nei nofoaga, sa masani ona matou malaga i auala sa taua o ‘whitetops,’ o ni taavaletoso mama e ufiufi i tapoleni papae. O malaga mamao e aofia ai feiloaiga ma siteki e lua, ae masani lava o le tolu po o le fa.
“I nei malaga sa faia fonotaga i aso taitasi i le va o konafesi faalesiteki i le tele o nofoaga, po o uarota a siteki. O nei malaga sa alu i luga o auala omoomo, o nisi o taimi e na o ni auala savali, i le mamafa o le pefu i le taumafanafana ma le maati o le malulu i le tau malulu, i le tele o taimi i le mamafa o le palapala po o le kiona.”3
O Elder Francis M. Gibbons, o le sa galue o se failautusi i le Au Peresitene Sili, na ia faasoa maia se lagona e faatatau i le ala na faalautele ai e Peresitene Samita lona valaauga i le perisitua: “A o malamalama atoatoa i lona tiute faalepulega aoao, sa ia lotomaulalo pea ma aga filemu ao ia faataunuuina. O ona uiga e aunoa ma se faamaualuga, fiailoa, po o le fiasili. Sa le manatu mo ia lava, ma e lei faalialia i le mamalu o lona valaauga.”4
O le saunoaga a Peresitene Iosefa Filitia Samita, i le Konafesi a le Eria o Peretania, Aokuso 1971. Nonofo, mai le agavale i le taumatau: Elders Marion G. Romney, Richard L. Evans, ma Howard W. Hunter.
I le avea ai o se Peresitene o le Ekalesia, na saunoa Iosefa Filitia Samita i sauniga perisitua o le konafesi aoao e lima, ma faamalosiau atu i alii ia faalautele o latou valaauga i le perisitua. O aoaoga i lenei mataupu o loo sii mai le fa o nei lauga, ma le faamuamua faapitoa i le lauga na tuuina atu e Peresitene Samita ia Oketopa 3, 1970. Ona o nei lauga sa tuuina atu i sauniga perisitua, o faamatalaga i lenei mataupu ua tuuina sao atu mo alii. Ae ui i lea, o nei upu o loo aofia ai se malamalamaaga, o le pule o le perisitua o se faamanuiaga sili mo tagata uma o le Ekalesia. I se tasi o lauga, na saunoa Peresitene Samita: “Ou te manatu ua tatou iloa uma o faamanuiaga o le perisitua ua le mo na o alii. O nei faamanuiaga ua liligi ifo foi i luga o o tatou taitoalua ma afafine ma luga o tuafafine faatuatua uma o le Ekalesia. O nei tuafafine lelei e mafai ona saunia i latou, e ala lea i le tausia o poloaiga ma auauna atu i le Ekalesia, mo faamanuiaga i le maota o le Alii. Ua ofoina atu e le Alii i ona afafine meaalofa faaleagaga uma ma faamanuiaga e mafai ona maua e ona atalii, aua e leai se tane e aunoa ma le fafine, e leai foi le fafine e aunoa ma le tane i le Alii [tagai 1 Korinito 11:11].”5
Aoaoga a Iosefa Filitia Samita
1
E ao i alii ona maua le malamalama manino i feagaiga latou te osia ina ua faauuina i latou i tofi o le perisitua
Ou te manao ina ia outou silasila i le tautoga ma feagaiga o le Perisitua Mekisateko. Ou te manatu afai ua i ai so tatou malamalamaaga manino i feagaiga tatou te osia ina ua faauuina i tatou i le perisitua, ma folafolaga ua tuuina mai e le Alii pe afai tatou te faalautele o tatou valaauga, ona tatou maua lea o le uunaiga sili e faia mea uma e tatau ona tatou faia ina ia maua le ola e faavavau.
Sei ou faapea atu foi o mea uma e fesootai ma lenei perisitua maualuga ua fuafuaina ma faamoemoeina e saunia ai i tatou ia maua le ola e faavavau i le malo o le Atua.
I le faaaliga e uiga i le perisitua, na tuuina atu ia Iosefa Samita ia Setema 1832, na fetalai le Alii o le Perisitua Mekisateko e faavavau; e na te taitaiina le talalelei, ua maua i le ekalesia moni i augatupulaga uma, ma o loo umia ki o le malamalama i le Atua. Ua ia faapea mai e mafai ai ona faaeaina tagata o le Alii, e vaai atu i fofoga o le Atua, ma ulufale atu i le malologa o le Alii, “o lea malologa o le atoatoaga o lona mamalu.” (Tagai MF&F 84:17–24.)
Ma, i lana saunoaga e faatatau i le Perisitua Arona ma le Perisitua Mekisteko, na fetalai le Alii: “Aua ai se tasi e faamaoni i le mauaina o ia perisitua e lua ua ou tautala atu ai, ma le faalauteleina o o latou valaauga, e faapaiaina e le Agaga i le faafouina o o latou tino.
“E avea i latou ma atalii o Mose ma Arona ma fanau a Aperaamo, ma le ekalesia ma le malo, ma le au filifilia a le Atua.
“O lenei foi o i latou uma o e e talia lenei perisitua ua latou talia au, ua fetalai mai ai le Alii”
“Aua o ia o lē talia a’u auauna ua ia talia a’u;
“Ma o ia o lē talia a’u ua ia talia lo’u Tamā;
“Ma o ia o le e talia lo’u Tama e maua e ia le malo o lou Tama; o lea, o mea uma ua i ai i lou Tama o le a tuu atu ia te ia.” [MF&F 84:36–38.]
“Ma o lenei ua tusa ma le tautoga ma le feagaiga e ou le perisitua.
“O le mea lea, o i latou uma o e e maua le perisitua, e mauaina lenei tautoga ma le feagaiga a lou Tama, e le mafai ona soli e ia, pe mafai ona aveesea.”
O le faasalaga mo le solia o le feagaiga ma liliu ese atoa mai ai o le a maua, faatasi ai ma lenei poloaiga: “… ia outou faaeteete e faatatau ia te outou lava, ia outou gauai ma le filiga i upu o le ola e faavavau.
“Ina ia outou ola ai i afioga uma e tulei mai le fofoga o le Atua.” (MF&F 84:33–44.)6
O outou o loo umia le Perisitua Arona e le i maua le tautoga ma feagaiga e faatatau i le Perisitua Maualuga, ae ua ia te outou le pule ma le mana tele ua tuuina mai e le Alii. O le Perisitua Arona o le perisitua sauniuni e aoao ai i tatou ina ia agavaa mo nei faamanuiaga sili o loo mulimuli mai.
Afai e te auauna faamaoni o se tiakono, o se aoao, ma o se faitaulaga, e faateleina lou poto masani ma maua le iloa ma le agavaa e mafai ai ona e maua le Perisitua Mekisateko ma faalauteleina ai lou valaauga.7
2
E folafola mai e i latou e umia le perisitua e faalauteleina o latou valaauga ma ola ai i afioga uma e tulei mai i le fofoga o le Atua.”
O i tatou uma ua iloa, o le feagaiga o se konekarate ma o se maliega i le va o ni vaega se lua. E tusa ai o feagaiga i le talalelei, o ia vaega o le Alii i le lagi ma tagata i le lalolagi. Ua malilie tagata e usitaia poloaiga ma ua folafola mai e le Alii e tauia i latou e tusa ai ma lo latou usiusitai. O le talalelei lava ia o le feagaiga fou e faavavau ma e aofia ai maliega uma, folafolaga, ma taui ua foai mai e le Alii i ona tagata.
Ma o lea pe a tatou maua le Perisitua Mekisateko tatou te maua e ala i feagaiga. Tatou te folafola atu ma le faamaoni e talia le perisitua, e faalautele o tatou valaauga i le perisitua, ma ola ai i afioga uma e tulei mai i le fofoga o le Atua. I le vaega a le Alii na te folafola mai afai tatou te tausi i poloaiga, tatou te maua mea uma a le Tama, o le ola e faavavau lea. Pe i ai se tasi o i tatou e manatu e i ai se maliega sili ma le paia e pei o lenei?
O nisi o taimi e mama la tatou tautala e uiga i le faalauteleina o o tatou perisitua, ae o faaaliga o loo tautala e faatatau i le faalauteleina o o tatou valaauga i le perisitua o ni toeaina, fitugafulu, faitaulaga sili, peteriaka, ma aposetolo.
O le perisitua o loo umia e alii o le pule ma le mana a le Atua ua faamatuu mai i le tagata i le lalolagi e galue ai i mea uma mo le faaolataga o tagata. O tofi o le Perisitua po o valaauga o tofiga faaletaitai e fai ai auaunaga faapitoa i le perisitua. Ma o le auala e faalautele ai nei valaauga o le faia lea o galuega fuafuaina e faataunuu e i latou o lo o umia lena tofi o lo o aofia ai.
E le afaina le tofiga o loo tatou umia ae ia tatou amiotonu ma faamaoni ia tatou matafaioi. E le sili ae le tasi tofiga i lo le isi, e ui ona o mafuaaga faaletaitaiga atonu e valaauina ai le tasi o umia le perisitua e pulefaamalumalu ma taitaiina le galuega a le isi.
O lou tama, o Peresitene Iosefa F. Samita, na saunoa: “E leai se tofi e auala mai lenei perisitua e sili ae nai lo le perisitua lava ia. O le perisitua e auala mai ai le pule ma le mana mo lena tofi. E leai se tofi e aumai ai le pule i le perisitua. E leai se tofi e faaopoopo i le pule o le perisitua. Ae o tofi uma i le Ekalesia e maua mai lo latou mana, la latou amiomama, la latou pule, mai le perisitua.”
Ua valaauina i tatou ina ia faalautele o tatou valaauga i le perisitua ma fai galuega e ogatasi ma le tofi ua tatou maua. Ma ua fetalai le Alii, i le faaaliga e uiga i le perisitua: “O lea ia tuu atu i tagata taitoatasi e tu i lona lava tofi, ma galue i lona lava valaaulia; … ina ia mafai ona tausi i le atoatoa le faatulagaga.” (MF&F 84:109–10.)
O le tasi lenei o faamoemoega sili o lo o tatou galulue agai i ai i le polokalama o le perisitua a le Ekalesia, ia faia e toeaina o tiute o toeaina, fitugafulu o tiute o fitugafulu, faitaulaga sili o tiute o faitaulaga sili, ma isi, ina ia mafai e i latou uma o umia le perisitua ona faalautele o latou lava valaauga ma selesele le oa o faamanuiaga ua folafola mai mo lenei galuega.8
O i tatou o sui o le Alii o Iesu Keriso. O la tatou misiona o le fai ma ona sui. Ua faatonuina i tatou e talai lana talalelei, ia fai sauniga o le faaolataga, ia faamanuia i tagata, ia faamalolo i e mamai ma atonu e fai vavega, ia fai le mea na te faia pe a na o iinei o ia —ma nei mea uma ona ua tatou umia le perisitua paia.
I le avea ai ma sui o le Alii ua saisaitia i tatou e lana tulafono e fai lona finagalo tusa lava po o a o tatou lagona po o faaosoosoga a le lalolagi. Ia i tatou lava e leai sa tatou feau o le faaolataga, leai se aoaoga faavae e ao ona talia, leai se pule e papatiso pe faamanuia pe faaipoipo ai mo le faavavau. O ia mea uma e mai le Alii, ma soo se mea tatou te fai e faatatau i ai, e afua ona o le pule ua faamatuu mai.9
3
O le folafolaga o le faaeaga e tuuina atu ia i latou taitoatasi o umia le Perisitua Mekisateko o e faamaoni i le tautoga ma le feagaiga o le perisitua.
O lenei ou te fia fai atu ni nai upu e uiga i le tautoga e o faatasi ma le talia o le Perisitua Mekisateko.
O le tauto i se tautoga o le ituaiga o tautalaga e sili ona mamalu lea ma noatia e pei ona iloa i le gagana a le tagata; ma o le ituaiga gagana lenei sa filifilia e le Tama e faaaoga i le valoaga faale-Mesia e uiga ia Keriso ma le perisitua. E uiga ia te ia o loo faapea mai: “Ua tauto le Alii e le salamo lava o ia, o Oe lava o le ositaulaga e faavavau e uiga faatasi ma le Mekisateko.” (Salamo 110:4.)
I le faamatalaina o lenei perofetaga faale-Mesia, fai mai Paulo o Iesu e i ai le “faiva [perisitua] e tumau,” ma e mafua mai lena ona oo mai ai le “pule o le ola e le uma.” (Tagai Eperu 7:24, 16.) Na saunoa Iosefa Samita “o i latou uma ua faapaiaina i le perisitua ua faia e faapei o le Alo o le Atua, ma tumau ai o se faitaulaga e faavavau,” pe afai, latou te faatuatua ma faamaoni [tagai Faaliliuga a Iosefa Samita, Eperu 7:3].
Ma o lea o Keriso o le faataitaiga sili e tusa ai ma le perisitua, ona e faatatau o ia i le papatisoga ma isi mea uma. Ma o lea, e tusa pe tauto le Tama ma se tautoga o lona Alo o le a fai mona tofi mea uma e ala i le perisitua, ua faapena foi ona ia tauto ai ma le tautoga o i tatou uma lava e faalautele o tatou valaauga i lena lava perisitua o le a maua mea uma a le Tama.
O le folafolaga lenei o le faaeaga ua ofoina mai i tagata taitasi o umia le Perisitua Mekisateko, ae o le folafolaga e i ai ona tuutuuga, o se folafolaga e faamoemoe i luga o lo tatou faalauteleina o o tatou valaauga i le perisitua ma ola i afioga uma ua tulei mai i le fofoga o le Atua.
E manino atoatoa le le toe i ai o nisi folafolaga mamalu sa faia pe tatau ona faia nai lo ia na oo mai ia i tatou ina ua tatou talia le avanoa ma tauaveina le tiute o le umia o le perisitua paia ma le tutu atu ai o ni soo o Keriso.
O le Perisitua Arona o le perisitua sauniuni ina ia agavaa ai i tatou e faia le feagaiga ma maua le tautoga e tusa ai ma lenei perisitua maualuga.10
4
O faamanuiaga a le Alii e ofoina atu i tagata uma e ala i le sauniga a i latou o umia Lana perisitua paia.
E leai se mea oi lenei lalolagi atoa e tutusa lona taua ia te i tatou taitasi e pei o le faamuamua i o tatou olaga o mea o le malo o le Atua, e pei o le tausia o poloaiga, o le faalauteleina o o tatou valaauga i le perisitua, o le malaga atu i le malumalu o le Alii ma maua ai le atoatoaga o faamanuiaga o le malo o lo tatou Tama.11
“O le perisitua … o le pule ma le mana a le Atua ua faamatuu mai i tagata i le lalolagi e galulue ai i mea uma mo le faaolataga o uso a tagata.”
O faamanuiaga a le Alii ua ofoina mai i le Au Paia ma le lalolagi e ala i sauniga a i latou o umia le perisitua paia, o e fai ma ona sui, o ana auauna ma sui ma ua naunau e auauna ia te ia ma tausia ana poloaiga.12
O lau tatalo o i tatou uma ua valaaulia e fai ma sui o le Alii ma o loo umia lona mana e ao ona manatua pe o ai i tatou ma amio e tusa ai.
… Ua ou taumafai i ou aso uma e faalautele lou valaauga i [le] perisitua ma faamoemoe e tutumau e oo i le iuga o lenei olaga ma maua le fiafia i le faaaumea a le au paia faatuatua i le olaga a sau.13
O ou lagona o le faamanuia ia i latou, o e laiti ma e matutua, o e o lo o faalautele o latou valaauga o le perisitua, ma fesili atu i le Alii ina ia liligi ifo i o latou luga mea lelei a lona Agaga i lenei olaga ma faamautinoa ia i latou oa o le faavavau i le olaga a sau. …
O se mea ofoofogia le iloa ua ofoina mai e le Alii mo i tatou taitoatasi le atoatoaga o le perisitua, ma ua ia folafola mai ia i tatou afai tatou te maua lenei perisitua ma faalautele o tatou valaauga, o le a tatou maua le tofi e faavavau ma ia i lona malo!14
Fautuaga mo Suesuega ma le Aoaoina Atu
Fesili
-
Na aoao mai Peresitene Samita e faapea e auala mai i le perisitua, “ua ofoina mai e le Alii i ona afafine meaalofa faaleagaga uma ma faamanuiaga e mafai ona maua e ona atalii” (“Mai le Soifuaga o Iosefa Filitia Samita”). O a ni ou manatu a o e mafaufau loloto i lenei faaupuga?
-
Na saunoa Peresitene Samita e faapea o i latou o umia le perisitua e sili atu ona faaosofia e taumafai mo le ola e faavavau pe a latou malamalama ia latou feagaiga ma le folafolaga a le Alii (tagai vaega 1). E faapefea ona moni lenei mea mo tagata uma o le Ekalesia?
-
E faapefea e le saunoaga a Peresitene Samita i le faalauteleina o se valaauga (tagai vaega 2) ona ese mai le faaaogaaga e isi o le upu faalautele? E faapefea ona faamanuiaina oe e ala i le auaunaga a tagata o le Ekalesia o e faalautele o latou valaauga?
-
Na aoao mai Peresitene Samita, “O Keriso o le faataitaiga sili e tusa ai ma le perisitua” (vaega 3). O le a le mea tatou te fai e mulimuli ai i le faataitaiga a Iesu Keriso i la tatou auaunaga mo isi?
-
I le vaega 4, iloilo upu a Peresitene Samita e faatatau i faamanuiaga e maua i le malumalu. E faapefea ona fesoasoani matua ia latou fanau e saunia ai mo faamanuiaga o le perisitua o loo maua i le malumalu?
Mau Fesootai
Eperu 5:4; Alema 13:1–2, 6; MF&F 20:38–60; 84:19–22; 107:99–100; Mataupu Faavae o le Faatuatua 1:5
Fesoasoani mo le Aoaoina Atu
“O se faiaoga atamai e le mafaufau faapea, ‘O le a la’u mea o le a fai i le vasega i le aso?’ ae fesili, ‘O a mea o le a fai e au tamaiti i le vasega i le aso?’ e le o le, ‘O le a la’u mea o le a aoao atu i le aso?’ ae faapea, ‘E faapefea ona ou fesoasoani i au tamaiti ia iloa mea latou te manaomia ona iloa?’” (Virginia H. Pearce, “O le Potu Aoga Masani—O Se Nofoaga Mamana mo le Ola Agai Pea i Luma,” Ensign, Novema. 1992, 12; tagai foi O Le Aoao Atu, E Leai se Valaauga e Sili Ai [1999], 61).