Alofa Mutimutivale

Vaaiga Aoao

O le alofa mutimutivale o le taulimaina ma le agaalofa o se tagata e sili atu nai lo le mea e tatau ai, ma e mafai e ala i le Togiola a Iesu Keriso. Ua silafia e lo tatou Tama Faalelagi o tatou vaivaiga ma agasala. E faaali mai e Ia le alofa mutimutivale pe a Ia faamagaloina i tatou mai a tatou agasala ma fesoasoani ia i tatou ina ia toe foi atu e mau i Lona afioaga.

O le agaalofa o le Atua atonu e foliga mai e feteenai ma le tulafono o le faamasinotonu, lea e le faatagaina ai se mea eleelea ona mau faatasi ma Ia (tagai 1 Nifae 10:21). Ae ua mafaia e le Atua i le Togiola a Iesu Keriso ona “avea le Atua ma Atua ua atoatoa, faamasinotonu, ma se Atua alofa mutimutivale foi” (Alema 42:15).

Na faamalieina e le Faaola ia manaoga a le faamasinoga tonu ina ua Ia tulai e sui i tatou ma puapuagatia mo le tau o a tatou agasala. Ona o lenei faatinoga le manatu faapito, ua mafai ai e le Tama ona faaaoga le alofa mutimutivale e aveese ai le faasalaga mai ia i tatou, ma faafeiloai atu i tatou i Lona afioaga. Ina ia maua le faamagaloga a le Alii, e tatau ona tatou salamo atoatoa i a tatou agasala. E pei ona aoao mai le perofeta o Alema, “E faaaoga e le faamasinotonu ona manaoga uma, ma e maua foi e le alofa mutimutivale mea uma e ia lava; ma o lea, e leai se tasi ae ua nao e lava ua salamo moni e faaolaina” (Alema 42:24; tagai foi Alema 42:22–23, 25).

O le faamagaloga o agasala e le na o le pau lea o le meaalofa o le alofa mutimutivale mai le Tamā Faalelagi ma Iesu Keriso. O faamanuiaga uma tatou te maua o se faatinoga lea o le alofa mutimutivale, e sili atu nai lo mea tatou te mafaia e i tatou lava. Na aoao mai Mamona, “O mea uma ua lelei ua mai ia Keriso a na le o lea po ua pauu tagata, ma ua leai se mea lelei e mafai ona oo mai ia te i latou” (Moronae 7:24). Mo se faataitaiga, tatou te mauaina le alofa mutimutivale mamana pe a faafofoga ma tali mai le Tama Faalelagi ia tatou tatalo, pe a tatou maua le taitaiga mai le Agaga Paia, ma pe a faamaloloina i tatou mai ma’i e ala i le mana o le perisitua. E ui lava o na faamanuiaga e oo mai o ni taunuuga o lo tatou usiusitai, e le mafai lava ona tatou mauaina e ala mai ia tatou lava taumafaiga. O ni meaalofa o le alofa mutimutivale mai se Tama alofa ma agaalofa.

Ao fetalai atu i Ona soo, na poloai atu le Faaola: “O lenei … ia mutimuti vale lo outou alofa, pei ona alofa mutimuti vale o lo outou Tama” (Luka 6:36). E mafai ona tatou mulimuli i le faataitaiga a lo tatou Tamā Faalelagi o le alofa mutimutivale ia tatou sootaga ma isi. E mafai ona tatou tauivi e tuuese lo tatou manatu faapito, faamaualuga, ma le manatu maualalo i isi. E mafai ona tatou saili ala e agaalofa ai, faaaloalogia, faamagaloina, agamalu, ma onosai, e tusa lava pe tatou te vaaia vaivaiga o isi.

Tusifaamaumau Ou Lagona Uunai