Perisitua

O le upu perisitua e lua ona uiga. Muamua, o le perisitua o le mana ma le pule a le Atua. Na foafoaina ma pulea e le Atua le lagi ma le lalolagi e ala i le perisitua. Lona lua, i le olaga faitino, o le perisitua o le mana ma le pule ua tuu mai e le Atua i le tagata e faia ai mea uma e tatau ai mo le faaolataga o fanau a le Atua. O loo i ai faamanuiaga o le perisitua mo i latou uma o e taliaina le talalelei.

Vaaiga Aoao

O le upu perisitua e lua ona uiga. Muamua, o le perisitua o le mana ma le pule a le Atua. Na i ai pea lava e le aunoa ma o le a faaauau pea ona i ai e leai se iuga (tagai i le Alema 13:7–8; Mataupu Faavae ma Feagaiga 84:17–18). Na foafoaina ma pulea e le Atua le lagi ma le lalolagi e ala i le perisitua. E ala i le mana lenei, Na te faaeaina ai Ana fanau usiusitai, ma aumaia ai le “tino ola pea ma le ola faavavau o le tagata” (Mose 1:39; tagai foi i le Mataupu Faavae ma Feagaiga 84:35–38).

Lona lua, i le olaga faitino, o le perisitua o le mana ma le pule ua tuu mai e le Atua i le tagata e faia ai mea uma e tatau ai mo le faaolataga o fanau a le Atua. O loo i ai faamanuiaga o le perisitua mo i latou uma o e taliaina le talalelei (“Pule o le Perisitua,” Tusitaulima 2, Taitaiina o le Ekalesia).

Tusifaamaumau Ou Lagona Uunai

Igoa o le Perisitua

I le tautotogo o le 1835, na maua ai e Iosefa Samita se faaaliga ua faamalamalama mai ai le igoa o le perisitua: “Ua i ai, i le ekalesia, perisitua e lua, ua ta’ua, o le Mekisateko ma le Arona, e aofia ai le Perisitua faa-Levi. O le pogai ua taʼua ai le muamua o le Perisitua Mekisateko ona o Mekisateko sa avea o se faitaulaga sili maoae. Ao lei oo mai i ona aso sa taʼua ai o le Perisitua Paia, e tusa ma le Faatulagaga a le Alo o le Atua. Ae ona o le faaaloalo po o le ava i le suafa o Lē Silisili, e aloese ai mai le taʼu soo o lona suafa, o lea na faaigoa ai e i latou, o le ekalesia, i aso anamua, lena perisitua ia Mekisateko, po o le Perisitua Mekisateko. O isi pule uma po o tofi i le ekalesia o ni faaopoopoga i lenei perisitua. … O le perisitua lona lua ua taʼua o le Perisitua o Arona, ona sa faaeeina i luga o Arona ma lana fanau, i o latou tupulaga uma. O le pogai ua taʼua ai o le perisitua maualalo ona o se faaopoopoga lea i le perisitua maualuga, po o le Perisitua Mekisateko, ma ua i ai le mana e taulimaina ai sauniga o fafo” (Mataupu Faavae ma Feagaiga 107:1–5, 13–14).

Toefuataiga o le Perisitua

Sa aveesea le pule a le Atua e faatulaga ai Lana Ekalesia ma faatino ai sauniga o le faaolataga ona o le liliu ese ina ua mavae le maliu o Iesu Keriso ma Ona Aposetolo i le seneturi muamua T.A. Peitai, sa toefuatai mai e le Alii ia Iosefa Samita e ala i avefeau faalelagi i le vaitaimi o le seneturi 19.

Ki o le Perisitua

O ki o le perisitua o le aia tatau lea e pulefaamalumalu ai ma faatonutonu mataupu o le Ekalesia i totonu o se puleaga. O Iesu Keriso o loo umia ki uma o le perisitua e faatatau i Lana Ekalesia. Na Ia faaee atu i luga o Ana Aposetolo taitasi ki uma e faatatau i le malo o le Atua i le fogaeleele. O le Aposetolo sinia o loo soifua, o le Peresitene o le Ekalesia, ua na o le pau lea o le tagata i luga o le fogaeleele ua faatagaina e faaaogaina ki uma o le perisitua.

Pule ma le Mana o le Perisitua

E i ai se eseesega i le va o le pule o le perisitua ma le mana o le perisitua. O le pule o le perisitua e maua mai le faaeega. O le mana e sau mai le amiotonu o le tagata lava ia.

E Manaomia e le Lalolagi le Perisitua

Ua saunia e le Ekalesia le faalapotopotoga ma auala mo le aoaoina atu o le talalelei a Iesu Keriso i fanau uma a le Atua. O le perisitua e aofia ai le pule e faatautaia ai sauniga o le faaolataga i tagata uma o e ua loto ma agavaa e talia ia sauniga. A aunoa ma le perisitua ma sauniga faaola o i ai, “o le a faama’umauina atoa le lalolagi” (tagai i le Mataupu Faavae ma Feagaiga 2:1–3; tagai foi i le Mataupu Faavae ma Feagaiga 84:21–22).

O Iesu Keriso o le faataitaiga sili lea o le ala e faaaoga ai le pule ma le mana o le perisitua e auauna ma faamanuia ai isi. Na aoao mai Peresitene M. Russell Ballard, “E le gata o le mana o le perisitua sa foafoaina ai lagi ma le lalolagi, ae o le mana lava lea na faaaogaina e le Faaola i Lana misiona i la le tino e faatino ai vavega, e faamanuia ai ma faamalolo ē mamai, e faaola ai e na oti, ma, i le avea ai ma Alo e Toatasi na Fanaua a lo tatou Tama, na onosaia ai tiga lematatalia i Ketesemane ma Kalevario—o lea na faataunuuina ai tulafono o le faamasinotonu i le alofa mutimutivale ma le sauniaina o le Togiola le i’u ma faatoilalo ai le oti faaletino e ala i le Toetu” (“O La’u Galuega ma Lo’u Mamalu Lenei,” Ape. 2013 konafesi aoao).

O Le Perisitua e Faamalosia le Aiga

O le aiga ua faauuina e le Atua. O le iunite e aupito sili ona taua i le olaga nei ma le faavavau. O se vaega o le fuafuaga a lo tatou Tama Faalelagi, na tatou fananau mai ai i aiga. Na Ia faavaeina ia aiga ia tatou maua ai le fiafia, e fesoasoani ia i tatou e aoaoina mataupu faavae sa’o i se siosiomaga alofa, ma ia sauniuni ai i tatou mo le ola e faavavau. Ua i ai i matua le tiutetauave taua e fesoasoani i a latou fanau e sauniuni e toe foi atu i le Tama Faalelagi.

O tane ma tama taitasi i le Ekalesia, e ao ina taumafai ia agavaa e umia le Perisitua Mekisateko. Faatasi ma lana avā e avea o se paaga tutusa, e pulefaamalumalu o ia i le amiotonu ma le alofa, ma avea ma taitai faaleagaga o le aiga.

E Auai Tamaitai i le Galuega o le Perisitua

Na aoao mai Peresitene M. Russell Ballard: “I le fuafuaga sili a lo tatou Tama Faalelagi o le faaeeina i le perisitua, ua i ai i alii le tiutetauave tupito e faatautai ai le perisitua, ae e le o i latou o le perisitua. O alii ma tamaitai e eseese matafaioi ae tutusa lava le taua. E pei lava ona le mafai e se tamaitai ona fanauina se tamaitiiti e aunoa ma se alii, e faapena foi, e le mafai e se alii ona faaaogaina atoa le mana o le perisitua e faavae ai se aiga e faavavau e aunoa ma se tamaitai. I se isi faaupuga, i se vaaiga e faavavau, o le mana foafoa atoa ai ma le mana o le perisitua e tausoa uma e se tane ma se ava” (“O La’u Galuega ma Lo’u Mamalu Lenei,” Ape. 2013 konafesi aoao).