Ata o Alema and Amoleka ua laveai mai le falepuipui, saunia e Andrew Bosley

15–21 Iuni

Alema 13–16

“Ulu atu i le Malologa o le Alii”

O le musumusuga e te maua a o e manatunatu loloto i tusitusiga paia e taua. E mafai ona e faaali atu e te faatauaina i lou tusifaamaumauina ma faatinoina.

Tusifaamaumau Ou Lagona Uunai

I le tele o itu, sa lelei le olaga i Amonaea mo Amoleka ma Seseroma. O Amoleka “o se tagata e le itiiti se taualoa,” sa “toatele aiga ma uo” ma “oa e tele” (Alema 10:4). O Seseroma sa “sili ona atamai” i loia ma sa “tele ana pisinisi” (Alema 10:31) Ona taunuu lea o Alema i Amonaea ma se valaaulia faalelagi ia salamo ma “ulu atu i le malologa o le Alii” (Alema 13:16). Mo Amoleka, Seseroma, ma isi, o le taliaina o lenei valaaulia e manaomia ai le ositaulaga ma e oo lava ina tau atu i se mafatiaga e le mafuatiaina.

Ae o le mea moni e le uma ai iina le tala. I le Alema 13–16, tatou te aoao ai i le mea moni na tupu ia i latou o e talitonu “i le mana o Keriso i le faaolataga” (Alema 15:6). O nisi taimi e i ai le laveaiga, o nisi taimi o le faamalologa—a o nisi foi taimi e matua le faigofie mea i lenei olaga. Ae o taimi uma lava, “e aveina a’e e le Alii [Lona nuu] ia te ia lava, i le mamalu” (Alema 14:11). O taimi uma foi, e tuu mai ai e le Alii le “mana, e tusa ai ma [lo tatou] faatuatua [ua] ia Keriso” (Alema 14:28). Ma o taimi uma foi, o lena “faatuatua i le Alii” e maua ai e i tatou le “faamoemoe o le a [tatou] maua le ola e faavavau” (Alema 13:29). A o e faitauina nei mataupu, e mafai ona e maua le faamafanafanaga i nei folafolaga, ma e mafai ona e malamalama atili i le uiga na ta’ua ai e Alema “le malologa o le Alii.”

Manatu mo Suesuega Faaletagata Lava Ia o Tusitusiga Paia

Alema 13:1–19

O sauniga o le perisitua ua fesoasoani ia te au e maua le togiola e ala ia Iesu Keriso.

Atonu e te manatua i le Alema 12, na aoao mai ai e Alema e uiga i le fuafuaga a le Atua o le togiola (tagai Alema 12:24–27). I le mataupu 13, na ia talanoa ai e uiga i faitaulaga sa faauuina e le Atua “e aoao atu nei mea i tagata” (Alema 13:1). O upu a Alema ua faaalia ai le tele o upumoni mamana e uiga i le perisitua. Atonu e mafai ona outou taumafai e faailoa mai pe tasi se upumoni i fuaiupu taitasi o le Alema 13:1–9. O ni nai manatu nei e te amata ai:

Fuaiupu 1:Ua ta’ua foi le perisitua “o le faatulagaga a le Alo o le [Atua] (tagai foi MFF 107:1–4).

Fuaiupu 2:Ua faauuina e le Atua ia faitaulaga e fesoasoani i tagata e vaavaai atu i Lona Alo mo le togiola.

Fuaiupu 3:Sa saunia e umia le perisitua mo o latou tiutetauave “mai le faavaega o le lalolagi.”

O a isi mea ua e maua? O le a sou lagona e uiga i le perisitua a o e manatunatu loloto i nei upumoni? Ua faapefea ona fesoasoani sauniga o le perisitua ia te oe e te vaavaai atu ai ia Keriso mo le togiola?

E malie le matauina o le toatele o tagata i Amonaea o i latou na mulimuli ia Neoa (tagai Alema 14:18; 15:15). Na eseese faapefea ia faitaulaga o le faatulagaga a Neoa (tagai Alema 1:3–6) mai faitaulaga na faauuina “le Faatulagaga a le Alo o le Atua” (MFF 107:3), ia na faamatala e Alema? (Tagai Alema 13:1–19).

Tagai foi Dale  G. Renlund, “O Le Perisitua ma le Mana Togiola o le Faaola,” Ensign po o le Liahona, Nov. 2017, 64–67.

O sauniga o le perisitua e fesoasoani ia i tatou e vaavaai atu ai ia Iesu Keriso mo le togiola.

Alema 13:3

Pe ua na o e umia le perisitua ua “valaauina ma saunia mai le faavaega o le lalolagi”?

O aoaoga a Alema i le Alema 13:3 e faasino patino lava i e umia le perisitua. Peitai, o le mataupu faavae na ia aoao mai—faapea sa maua e tagata taitoatasi ia tofitofiga ma sa saunia e faataunuuina “mai le faavaega o le lalolagi”—e faatatau ia i tatou uma lava. Sa saunoa mai Peresitene Spencer W. Kimball: “I le lalolagi sa tatou i ai, ae tatou te lei o mai iinei, sa tuuina atu i tamaitai faamaoni ni tofiga faapitoa, a o alii faamaoni sa muai faauuina i galuega faapitoa i le perisitua. E ui ina ua tatou le manatuaina nei ia auiliiliga, ae le avea lena ma mea e suia ai le paia moni o le mea sa tatou malilie i ai” (Aoaoga a Peresitene o le Ekalesia: Spencer W. Kimball [2006], 241; tagai foi MFF 138:55–56).

Alema 14

O nisi taimi e faataga ai e le Atua le au amiotonu ia puapuagatia.

Alema 14 o loo faamatala mai ai tagata amiotonu sa puapuagatia ma na oo lava ina maliliu ai ona o o latou talitonuga. Atonu e te taumanatunatu, e pei ona faia e le toatele, pe aisea e tutupu ai mea matautia i tagata o loo taumafai e ola amiotonu. Atonu e te le maua uma tali i lenei fesili faigata i le Alema 14, ae e tele mea e tatau ona aoao mai le ala na tali atu ai Alema ma Amoleka i tulaga sa la fetaiai. O a mea o aoao mai e a la upu ma faatinoga e uiga i le ala e faataga ai e le Alii i nisi taimi ia tagata amiotonu e mafatia? O a ni mea ua e aoao mai ia i la’ua e uiga i le fetaiai ma sauaga?

Tagai foi Mataio 5:43–44; Mareko 14:55–65; Roma 8:35–39; 1 Peteru 4:12–14; Mataupu Faavae ma Feagaiga 122:5–9.

Alema 15:16, 18

O le avea ma soo e manaomia ai le ositaulaga.

Atonu e manaia foi ae faia se lisi o mea na ositaulaga ai Amoleka ina ia talia le talalelei (tagai Alema 10:4–5; 15:16) ma faatusatusa i se lisi o mea na ia maua (tagai Alema 15:18; 16:13–15; 34:8). O a ni mea ua e naunau e ositaulaga ina ia avea ai o se soo ua sili atu le faamaoni?

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.

Alema 13

E mafai ona manuia lou aiga mai le matauina o taimi uma o loo ta’u mai ai i le upu “malologa” i le Alema 13. O a isi upu ma manatu o ta’ua faatasi mai ai? E fesoasoani faapefea lenei mea ia tatou malamalama ai i le uiga “o le malologa o le Alii”? E ese faapefea mai le malologa faaletino?

Alema 13:10–12

Ina ia fesoasoani i lou aiga e vaai faalemafaufau po o a mea o aoao mai e nei fuaiupu, atonu e mafai ona outou faamamaina faatasi se mea—pei o se ofu paepae. O a ni o tatou lagona pe a tatou palapala? O a ni o tatou lagona pe a tatou toe mama? E tutusa faapefea nei lagona i mea tatou te lagonaina pe a tatou agasala ona salamo ai lea ma mama e ala i le Togiola a le Faaola?

Alema 15:1–12

O le a se mea tatou te aoaoina mai le aafiaga o Seseroma e uiga i le mana o le Alii e faamalolosia ma faamalolo i tatou, e oo lava pe a tatou faia ni mea sese? O le a le matafaioi e mafai ona tauave e le au perisitua i lo tatou mauaina o Lona malosiaga ma le faamalologa?

Alema 16:1–10

A uma ona faitau nei fuaiupu, e mafai ona e faitauina le Alema 9:4. O le a se mea tatou te aoao mai le faatusatusa o le eseesega o lagona o Sorama e uiga i upu a le perofeta ma le ala na lagona ai le nuu o Amonaea? O le a se mea o tatou faia e faamaoni ai i upu a o tatou perofeta soifua?

Mo nisi manatu mo le aoaoina o fanau, tagai i le otootoga o le vaiaso lenei i le Sau, Mulimuli Mai ia te Au—Mo le Peraimeri.

Faaleleia o Lo Tatou Aoao Atu

Ia sauniuni i taimi uma. O avanoa faafaiaoga e vave lava ona sopoloa, o le mea lea ia faaaoga tatau pe a tulai mai. O se mala i le lalolagi, mo se faataitaiga, e mafai ona avea ma avanoa e faasoa atu ai ni mataupu faavae mai le Alema 14 e uiga i le pogai e faataga ai e le Alii i nisi taimi ia e ta’umamaina ia pagatia. (Tagai Aoao Atu i le Ala a le Faaola, 16

Alema ma Amoleka i le Falepuipui, saunia e Gary L. Kapp