“22–28 Iuni. Alema 17–22: “O Le A Ou Faia Oe ma Meafaigaluega.” Sau, Mulimuli Mai ia te A’u—Mo Tagata Taitoatasi ma Aiga: Tusi a Mamona 2020 (2020)
“22–28 Iuni. Alema 17–22,” Sau, Mulimuli Mai ia te A’u—Mo Tagata Taitoatasi ma Aiga: 2020
Amona ma le Tupu o Lamonae, saunia e Scott M. Snow
22--28 Iuni
Alema 17–22
“O Le A Ou Faia Oe ma Meafaigaluega”
A e faitauina le Alema 17–22, tusifaamaumau ia lagona uunai e oo atu ia te oe ma faatinoina. O le faia o le a faaali atu ai i le Alii lou naunautaiga e maua ni faaaliga e sili ona patino.
Tusifaamaumau Ou Lagona Uunai
Mafaufau i mafuaaga uma e ono aumai e tagata mo le le faasoaina atu o le talalelei: “E le lava so’u iloa” po o le “Ou te le o mautinoa pe o le a fia faalogo mai” pe o le “E faapefea pe a ou faatausuai ia i latou?” Atonu e i ai taimi e te mafaufau ai oe lava i mea faapena. Sa i ai ia sa Nifae se mafuaaga faaopoopo o le le faasoaina atu o le talalelei ia sa Lamana: o i latou “o ni tagata aivao ma lotomaaa ma feai; o ni tagata e fiafia e fasioti sa Nifae” (Alema 17:14; tagai foi Alema 26:23–25). Peitai o atalii o Mosaea na i ai se mafuaaga e malosi atu na pogai ai ona latou lagonaina e tatau ona latou faasoa atu le talalelei ia sa Lamana: “Sa latou mananao ia talai atu le olataga i tagata uma, ona sa le mafai ona latou talitalia le fano o le agaga o soo se tagata” (Mosaea 28:3). O lea alofa sa musuia ai Amona ma ona uso e mafai foi ona musuia ai oe e faasoa atu le talalelei i lou aiga, uo ma paaga—e oo lava ia i latou o e atonu e foliga mai e taliaina.
Manatu mo Suesuega Faaletagata Lava Ia o Tusitusiga Paia
A o ou faamalosia lo’u lava faatuatua, e mafai ona ou faasoa lelei atu le talalelei.
Pe ua e toe faatasia ea ma ni uo ua leva ma lagonaina le ala na lagona ai e Alema—sa olioli tele ona sa tumau lo latou malolosi i le faatuatua? (tagai i le Alema 17:1–2). O le a se mea ua e aoao mai i atalii o Mosaea e uiga i le ala e tausisia ai lou faatuatua i le talalelei ma le tautinoga ia malosi? A o e manatunatu loloto i le malosi faaleagaga o atalii o Mosaea, o le a se mea ua musuia ai oe e fai?
Na faapefea e sauniuniga faaleagaga a atalii o Mosaea ona aafia ai la latou galuega i tagata sa Lamana? Atonu e mafai ona e faaaogaina lenei avanoa e iloilo ai au taumafaiga e aoao atu le talalelei “ma le mana ma le pule mai le Atua” (Alema 17:3).
E mafai ona avea a’u ma se meafaigaluega i aao o le Atua e aumaia le olataga i Ana fanau.
Na saunoa mai Peresitene Thomas S. Monson, “Ou te manao lava ia silafia e le Alii afai Na te manaomia se feau e fai, o le a tamoe Tom Monson e fai lena feau mo Ia” (“On the Lord’s Errand: The Life of Thomas S. Monson,” video, ChurchofJesusChrist.org). A o e faitauina le Alema 17:6–12, vaavaai mo mea na fai e atalii o Mosaea ina ia mafai ai ona avea ma meafaigaluega i aao o le Atua. “E mafai faapefea ona avea oe o se meafaigaluega i aao o le Atua e faamanuia ai isi? O le a se mea ua e aoao mai la latou faataitaiga e te maua ai le lototoa e faia mea e manaomia e le Alii oe e fai?
Tagai foi Dallin H. Oaks, “Faasoaina Atu o le Talalelei Toefuataiina,” Ensign po o le Liahona, Nov. 2016, 57–60.
E mafai ona ou fesoasoani i isi ia maua le talalelei.
O Lamonae o le taitai o “ni tagata aivao ma le lotomaaa ma le fe’ai” (Alema 17:14), ae na ia faatoilaloina le fia tausaga o tu masani ma sa taliaina le talalelei a Iesu Keriso. A o e faitau e uiga i fegalegaleaiga a Amona ma Lamonae, matau le mea na faia e Amona atonu na fesoasoani ia Lamonae ia talia gofie lana savali. Afai e oo atu ni mafaufauga ia te oe e uiga i mea e mafai ona e faia e faasoa atu ai le talalelei i isi, tusi i lalo na uunaiga.
E mafai foi ona fesoasoani le maka pe tusi i lalo ia upumoni na aoao atu e Amona ia Lamonae (tagai Alema 18:24–39) ma upumoni na aoao atu e Arona i le tama o Lamonae (tagai Alema 22:1–16). O a ni mea o fautua mai e nei fuaiupu ia te oe e uiga i upumoni e mafai ona e faasoa atu i isi e fesoasoani ai ia te i latou e saili se molimau o le talalelei?
Minerva K. Teichert (1888–1976), Sefeina e Amona le Lafu a le Tupu, 1935-1945, suauu i luga o le laupapa, 35 x 48 inisi. Falemataaga mo Faatufugaga a le Iunvesite a Polika Iaga
E mafai ona i ai se faatosinaga loloto o la’u molimau.
E ui o tala o liuga tatou te faitau i ai e uiga i tusitusiga paia e tele ina aofia ai ni mea maoae e tutupu, i lo latou autu e masani ona tatou maua ai tagata taitoatasi sa i ai le lototoa e tautala atu ma faasoa atu a latou molimau i isi. O se tasi ala e suesue ai mea na tutupu i le Alema 18–22 o le vaavaai mo aafiaga loloto o se tagata e toatasi o tuuina atu lana molimau. Atonu e mafai ona e tusifaamaumauina mea e te mauaina i se atatusi faapea:
|
Sa faasoa atu e Amona le talalelei ia , o le sa faasoa atu le talalelei ia , ma o le taunuuga o le . |
E faaloaloa mai le aao o le Alii ia te au pe a ou salamo.
I le faaiuga o le tala i le liuaina o Lamonae, sa aoao mai ai e Mamona se mea e taua i le uiga o le Alii. O le a se mea o fautuaina mai e le Alema 19:36 ia te oe e uiga i uiga o le Alii? O anafea na e lagonaina ai le faaloaloa mai o le aao o le Alii ia te oe? E mafai faapefea ona e fesoasoani ia i latou e te alofa i ai ia lagonaina Lona alofa mutimutivale?
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.
Alema 17–19
E mafai faapefea ona e faia ia tala i nei mataupu ia olaola i lou aiga? E mafai ona outou faatinoina le tala ia Amona o puipuia ia mamoe po o le tala ia Apiso sa faapotopotoina le motu o tagata e molimauina le mana o le Atua. Atonu e mafai e tagata o le aiga ona tusia ata o vaega eseese o le tala ma faaaoga ia ata e faamatala ai le tala. O le a se mea o le a faia e lou aiga e mulimuli ai i faataitaiga a Amona ma Apiso?
Alema 18:24–39
Atonu e mafai e tagata o lou aiga ona faitau faatasi le Alema 18:24–39 ma faailoa mai upumoni na aoao atu e Amona ia Lamonae. Aisea tatou te manatu ai na aoao atu muamua e Amona nei upumoni ia Lamonae? Aisea e taua ai mo i tatou ona i ai se molimau i nei upumoni?
Alema 20:8–15
O le a se mea e mafai ona tatou aoao mai le ala na tali atu ai Lamonae i lona tama? E mafai faapefea ona tatou mulimuli i le ala na tali atu ai Lamonae i lona tama? (Mo ni nai faataitaiga, tagai i le vitio “Dare to Stand Alone” on ChurchofJesusChrist.org.)
Alema 22:15–18
Toe iloilo le Alema 20:23 e vaai ai po o le a le mea sa naunau le tama o Lamonae e lafoai ina ia faasaoina ai lona ola. Ona toe iloilo lea o le Alema 22:15 e vaai ai po o le a le mea sa ia naunau e lafoai ina ia maua ai le olioli i le talalelei. O le a se mea na ia naunau e lafoai ina ia iloa ai le Atua? (tagai i le fuaiupu 18). Atonu e mafai e tagata o le aiga ona tofu tusia se fuafuaga e lafoai se mea ina ia mafai ai ona iloa atili le Atua.
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Faaleleia o Suesuega Faaletagata Lava ia
Faailoa ma faaaoga mataupu faavae E ui o faamatalaga o tala o tusitusiga paia atonu e le faatatau ia te oe, ae o mataupu faavae o nei tala e tele lava ina aoga. A o e faitau e uiga ia Amona ma Arona, o a mataupu faavae e uiga i le faasoa atu o le talalelei ua e maua?
Sa tulai ae le faletua o le Tupu o Lamonae mai le eleele, ma vivii atu ia Iesu. Iesu Paia e, saunia e Walter Rane