O Aneti-Nifae-Liae Ua Tanumia a Latou Auupega saunia e Jody Livingston

29 Iuni–5 Iulai

Alema 23–29

Latou Te “Le’i Liliu Ese Lava”

A’o e suesue i le Alema 23--29, o a ni savali e te maua ai mo oe lava ma lou aiga? O a ni mea e mafai ona e faasoa atu i au vasega i le Lotu?

Tusifaamaumau Ou Lagona Uunai

Pe e te mafaufau pea i nisi o taimi pe mafai ona sui moni ia tagata? Atonu e te popole i le pe e mafai ona e faatoilaloina ni faaiuga le lelei sa e faia po o ni mausa leaga ua e atinaeina, pe o i ai ni ou popolega faapena e faatatau i e pele ia te oe. Afai o lea, e mafai ona fesoasoani le tala ia Aneti-Nifae-Liae ia te oe. O nei tagata sa o ni fili na matuai itagia e sa Nifae. Ina ua tonu ia Amona ma ona uso e talai atu le talalelei ia i latou, sa “tōē [sa Nifae] faatauemu ia te i [latou].” O le fasiotia o sa Lamana sa foliga o se fofo na sili atu ona talafeagai nai lo o le faaliliuina o i latou. (Tagai Alema 26:23–25.)

Ae sa suia sa Lamana—e ala i le mana faaliliu o le Alii. O le mea sa masani ona ta’ua ai i latou o “se tagata lotomaaa ma feai” (Alema 17:14), sa oo ina “ilogaese foi i latou i lo latou finafinau i le Atua” (Alema 27:27). O le mea moni, latou te “le’i pauu ese lava” (Alema 23:6).

Atonu e i ai ni au tu ma aga sese e lafoai po o ni “auupega o … [le] fouvale” e tuu i lalo (Alema 23:7). Pe atonu foi ua na’o lou manaomia ona finafinau teisi i lau molimau ae tuuitiitia le ono liliu ese. E le afaina po o a suiga e te manaomia, e mafai e le Alema 23–29 ona tuu atu ia te oe le faamoemoe e faapea, e ala i le mana togiola o Iesu Keriso, e mafai ai ona tutupu suiga tumau.

Manatu mo Suesuega Faaletagata Lava Ia o Tusitusiga Paia

Alema 23:1-5

A talia e fanau a le Atua le talalelei, e tele faamanuiaga e mulimuli mai ai.

Ina ua tautino mai e le tupu o sa Lamana e faapea, e tatau ona “leai se puniala” o le afioga a le Atua i lona nuu (tagai Alema 23:1–5), ua na ia tatalaina le faitotoa i faamanuiaga e tele mo i latou. A o e faitau i le Alema 23–29, ia vaavaai mo faamanuiaga nei. E mafai faapefea ona e faamautinoa ia “leai se puniala” o le afioga a le Atua i lou olaga po o i lou aiga?

Alema 23–25; 27

O lo’u liua ia Iesu Keriso ma Lana talalelei ua suia ai lo’u olaga.

O sa Lamana o e na asa e Amona ma ona uso sa foliga mai e le ono avea ma ni tagata e liliu mai—sa taotaomia i latou i tu ma aga a o latou tamā ma lo latou lava amioleaga. Ae peitai, o le toatele o i latou na talia le talalelei a Iesu Keriso ma faia ni suiga faavae taua i o latou olaga. Ina ia avea o se faailoga o lo latou liuaina, sa faaigoa ai e nei sa Lamana i latou lava o Aneti-Nifae-Liae. (O le uiga o le “aneti” i le tulaga lenei e le tutusa ma le “aneti” i le “aneti-Keriso.”)

O le manatunatu ai i le liliuga o nei sa Lamana, e ono faaosofia ai oe e mafaufau loloto i lou lava liua “i le Alii” (Alema 23:6). O se tasi o auala e mafai ona suesue ai nei mataupu, o le faailoa lea o le ala na suia ai e le liua o Aneti-Nifae-Liae o latou olaga. E mafai ona e amata i fuaiupu nei.

A o e mafaufau loloto i suiga i Aneti-Nifae-Liae, mafaufau pe o faapefea ona suia oe lava e lou liua ia Keriso. O le a se mea o e lagona o loo manaomia pea ona e suia ina ia mafai ona i ai se mana tele atu o le talalelei i lou olaga?

Alema 23:6–7

Alema 23:17–18

Alema 24:11–19

Alema 25:13–16

Alema 27:26–30

Alema 24:7–19; 26:17–22

E alofa mutimutivale le Atua.

E ui o agasala sa tatau ona faatoilaloina e Amona ma Aneti-Nifae-Liae atonu na eseese teisi mai soo se mea i lou olaga, ae tatou te faalagolago uma lava i le alofa mutimutivale o le Atua. O a ni mea e te maua i le Alema 24:7–19 ma le 26:17–22 e fesoasoani e te malamalama ai i Lona alofa mutimutivale? A o e faitau, atonu e te mafaufau i mea nei: o auala ua valaauliaina ai oe e salamo, o ou aafiaga i le salamo, o auala sa e taumafai ai e aloese mai le toe agasala, ma faamanuiaga ua oo mai ia te oe e ala i le salamo. Pe a e faitau i fuaiupu i le ala lenei, o a ni mea ua e aoaoina e uiga i le alofa mutimutivale o le Alii i lou olaga?

Alema 26; 29

O le auauna atu i le Alii e aumaia ai le olioli.

E ui lava i le eseese o o laua aafiaga, sa faaalia e Amona ma Alema ni lagona tutusa e faatatau i a laua galuega faafaifeautalai. Mafaufau e faitau ma faatusatusa le Alema 26 ma le 29 . O a ni mea e tutusa ai ua e matauina? O a upu po o fasifuaitau o loo fai ma toe fai? O le a se mea e mafai ona e aoaoina mai ia Amona ma Alema e uiga i le auala e maua ai le olioli moni e ui lava i ou luitau? (Ina ia toefaamanatu luitau sa feagai ma Alema, tagai i le faaulutala o le mataupu mo le Alema 5–16. Ina ia toefaamanatu luitau o Amona ma ona uso, tagai i faaulutala o le mataupu mo le Alema 17–28.)

Alema 26:5–7

O a mea e ta’u o fusisaito ma falesaito?

I le taimi o le seleselega, e masani ona faaputu ai saito i faaputuga e ta’ua o fusisaito ma tuu i totonu o faleteuoloa, o nisi taimi e ta’ua o falesaito. Sa faasoa mai e Elder David A. Bednar se faauigaga o le faafaailoga o loo i le Alema 26:5: “O fusisaito o loo i le faataoto lenei ua faatusa i tagata fou faatoa papatisoina o le Ekalesia. O falesaito o malumalu paia” (“Taofia ma le Mamalu o se Igoa ma Tulaga,” Ensign po o le Liahona, Me 2009, 97). Mafaufau po o le a le mea o aoao mai e le faataoto i le Alema 26:5–7 ia te oe e uiga i le taua o feagaiga o le malumalu.

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.

Alema 24:6–19

Aisea na tanumia “loloto ai i le eleele” e Aneti-Nifae-Liae a latou auupega? (Alema 24:16). Atonu o le a fiafia tagata o lou aiga e tusi i ni fasipepa ia mea latou te mananao e faatoilalo pe lafoai. Ona latou eliina lea o se pu ma tanu ai pepa.

Alema 24:7–12

O le suesueina o fuaiupu nei e mafai ona fesoasoani ai i tagata o lou aiga ia malamalama i le meaalofa matagofie o le salamo. O a mea na fai e Aneti-Nifae-Liae ia salamo ai i a latou agasala? Na faapefea ona fesoasoani le Alii ia i latou ia salamo? O le a se mea tatou te aoao mai lenei faataitaiga?

Alema 24:20–27

O a ni mea ua tatou vaai i ai ua molimau mai i le moni o le folafolaga a Mamona: “ua faapea ona tatou vaai ai e tele auala e galue ai le Alii e aumai ai le olataga i ona tagata”? (Alema 24:27).

Alema 26:2

O le a faapefea ona tali atu lou aiga i fesili a Amona o loo i le Alema 26:2? Atonu e mafai ona e faia se lisi o a latou tali i luga o se fasipepa tele ma tautau i se nofoaga e mafai ona vaai uma i ai tagata. Ia uunai tagata o le aiga e faaopoopo atu i ai a o latou mafaufau i isi faamanuiaga ua “tuuina mai ia i tatou” e le Atua.

Alema 29:9

Na faapefea ona avea Amona ma Alema ma ni meafaigaluega i aao o le Atua? Mafaufau e vaavaai mo ni meafaigaluega po o ni masini faigaluega i lou fale ma talanoa i auala e aoga ai na mea taitasi i lou aiga. E faapefea ona fesoasoani lenei mea ia tatou malamalama ai i auala e mafai ona avea ai i tatou taitoatasi ma “se tufugaaao o le Atua”?

Mo nisi manatu mo le aoaoina o tamaiti, tagai i le otootoga o le vaiaso lenei i le Sau, Mulimuli Mai ia te Au—Mo le Peraimeri.

Faaleleia o Lo Tatou Aoao Atu

Faaaoga mea eseese. O le eseese o lou faiga o suesuega faaleaiga o tusitusiga paia e mafai ona fesoasoani i tagata o le aiga ia tumau ai pea le naunau ma le aafia ai. Mo se faataitaiga, a uma ona faitau e se tagata o le aiga se fuaiupu, e mafai ona ia fai atu i isi tagata o le aiga e toe ta’u mai ia latou lava upu le mea na faatoa uma atu ona faitau.

Ata tusi o Aneti-Nifae-Liae o loo tanumia a latou auupega na tusia e Dan Burr