O Aneti-Nifae-Liae o loo Tanumia a Latou Auupega o le Taua, saunia e Jody Livingston

Iuni 29–Iulai 5

Alema 23–29

Latou “Te Lei Liliu Ese Lava”

Suesue ma le agaga tatalo le Alema 23--29, saili musumusuga e uiga i mea e manaomia e tamaiti ma pe faapefea ona fesoasoani ia i latou.

Tusi Faamaumau Ou Lagona Uunai

Valaaulia le Fefaasoaai

Tusi le foliga fiafia i se fasipepa, ma faataga tamaiti taitoatasi e uu. A’o latou uuina le pepa, valaaulia i latou e taʻu mai se mea o latou aoaoina mai le Tusi a Mamona lea e aumaia ai ia i latou le olioli.

Aoao atu le Aoaoga Faavae: Tamaiti Laiti

Alema 24:6--24

E faamanuiaina a’u pe a ou tausia a’u folafolaga.

O a mea na e aoaoina i lau suesuega o le Alema 24:6–24 lea e mafai ona fesoasoani i tamaiti ia malamalama i le taua o le tausia o se folafolaga amiotonu?

Gaoioiga e Mafai Ona Fai

• Faitau nisi fuaiupu po o fuaitau mai le Alema 24:6--24 e aoao ai tamaiti e uiga i Aneti-Nifae-Liae, o le folafolaga na latou faia, ma pe faapefea ona latou tausia le folafolaga. E mafai foi ona e faaaogaina le ata mai le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga po o le “Mataupu 26: O Tagata o Amona” (Tala o le Tusi a Mamona, 73--74 po o le vitio e fesootai i le ChurchofJesusChrist.org).

• Faamatala pe na faapefea ona tausia e Aneti-Nifae-Liae le latou folafolaga e ala i le tanumia o a latou auupega. Valaaulia tamaiti e tusi se pelu ona faafoliga lea o loo eliina se pu ma tanu a latou pelu. Fesoasoani i tamaiti e mafaufau i folafolaga latou te faia. Aisea e taua ai le tausia o folafolaga? Faamalamalama atu a tatou papatiso, ua tatou faia ni folafolaga i le Atua ma Ia faia foi ni folafolaga ma i tatou. O nei mea ua taʻua o feagaiga. Molimau atu e faamanuiaina i tatou pe a tatou tausia a tatou folafolaga ma le Atua.

Alema 26; 29

E aumaia e le talalelei ia te au le olioli, ma e mafai ona ou faasoa atu lenei olioli i isi.

O Amona, o le sa fesoasoani e aoao atu le talalelei ia Aneti-Nifae-Liae, na maua le olioli tele mai le talai atu o le talalelei. O Alema, o lē na aoaoina atu foi le talalelei i le tele o tagata, na ia mauaina lenei lava olioli. E mafai ona tatou maua le olioli tutusa pe a tatou faasoa atu a tatou molimau i isi.

Gaoioiga e Mafai Ona Fai

• Filifili ni fuaitau mai le Alema 26 po o le29 e talanoaina ai le olioli, ma faitau atu i tamaiti (mo se faataitaiga, tagai, Alema 26:11,13 po o le Alema 29:13--14). Valaaulia tamaiti e tutu i taimi uma latou te faalogo ai i upu “olioli” po o le “olioli” [rejoice]. Fesoasoani i tamaiti ia malamalama o le faasoa atu o le talalelei na maua ai e Alema ma Amona le fiafia. Faasoa atu se aafiaga na e mauaina ai le olioli ina ua e faasoa atu le talalelei.

• Valaaulia tamaiti e tusi ni ata o mea e aumai ai ia i latou le olioli. Valaaulia tamaiti taitoatasi e tuu lana ata tusi i se isi tagata o le vasega ma faamatala mai. Faamanino atu pe a aumaia e se mea ia i tatou le olioli-e pei o le talalelei-e faateleina lo tatou olioli pe a tatou fetufaai atu.

• Tuu atu i se tamaitiiti se kopi o le Tusi a Mamona, ma tuu atu ia te ia e faataitai ona faasoa atu lea i se isi tagata o le vasega. Uunai tamaiti e faamatala mai o latou lagona e uiga i le Tusi a Mamona. Aisea tatou te faasoa atu ai le Tusi a Mamona i isi?

Alema 27:20--30

E mafai ona ou fesoasoani i a’u uo ia ola i le talalelei.

Sa puipuia e sa Nifaē ia Aneti-Nifae-Liae mai o latou fili ma fesoasoani ia i latou e tausia feagaiga sa latou osia ma le Alii.

Gaoioiga e Mafai Ona Fai

• Tau atu i tamaiti le tala e uiga ia Aneti-Nifae-Liae i le faia o se folafolaga e le toe tau (tagai Alema 27:20–30). Faamatala atu ona o folafolaga a Aneti-Nifae-Liae, sa le mafai ai ona latou puipuia i latou lava mai o latou fili. Faitau le Alema 27:23, ma faamatala atu o a latou uo i Sa Nifae na filifili e puipuia ia Aneti-Nifae-Liae ina ia latou tausia la latou folafolaga. E faapefea ona tatou fesoasoani i a tatou uo ia tausia a latou folafolaga? Faamatala e uiga i se taimi na fesoasoani ai se uo ia te oe e tausia au folafolaga ma le Atua.

• Faataitai ma tamaiti tulaga e mafai ai, i se auala agalelei, fesoasoani i isi e filifili le mea saʻo. Mo se faataitaiga, o le a se mea e mafai ona tatou fai atu i se uo o loʻo manaʻo e pepelo pe faʻatau?

Aoao atu le Aoaoga Faavae: Tamaiti Matutua

Alema 24

O feagaiga o folafolaga ou te osia ma le Atua ma Na te faia ma au.

Na tanumia e Aneti-Nifae-Liae a latou auupega ma folafola atu e le toe fasioti tagata. E faapena foi, o tamaiti e te aoaoina e mafai ona tausia a latou feagaiga.

Gaoioiga e Mafai Ona Fai

• Tuu atu i tamaiti tama’i ma’a, ma valaaulia i latou e tusi le upu feagaiga i luga o latou ma’a. Faamatala atu o se feagaiga o se folafolaga i le va o le Tama Faalelagi ma Ana fanau. E faapefea e a tatou feagaiga ona faamalosia i tatou pe “mausali” e pei o se maa? (Alema 24:19). Faitau faatasi le Alema 24:16–25 e aoao po o le a le feagaiga na osia e tagata o Amona ma faapefea ona latou faamamaluina la latou feagaiga. Valaaulia i latou e ave a latou ma’a i le fale e fai ma faamanatu o a latou feagaiga.

• Faitau ma tamaiti le Alema 24:16–19, ma talanoaina mea na faia e Aneti-Nifae-Liae e faaali ai i le Atua ua latou salamo. O le a le mea na latou osifeagaiga e le toe faia? Faamalamalama atu o feagaiga tatou te faia o le “molimau i le Atua” tatou te mananao e mulimuli i poloaiga a le Atua (fuaiupu 18). O a feagaiga ua osia e tamaiti?

• Valaaulia tamaiti e tusi ni ata o auupega a Aneti-Nifae-Liae. Ona valaaulia lea o i latou e tusi, i tua o auupega, se mea latou te lagona e tatau ona latou suia ina ia mulimuli atili ai ia Iesu Keriso. Tuu atu ia i latou e faafoliga e tanu a latou auupega ma fai se fuafuaga e faatino mea na latou tusia.

Alema 24:7–10; 26:23–34; 27:27–30

Ona e alofa mutimutivale le Tama Faalelagi, e mafai ai ona tatou salamo ma suia.

Talu ai nei na aoaoina ai tamaiti e uiga ia Alema, Amona, ma Aneti-Nifae-Liae. E faapefea ona e faaaogaina nei tala e faailoa ai e alofa mutimutivale le Tama Faalelagi ia i latou o e salamo faamaoni?

Gaoioiga e Mafai Ona Fai

• Tusi Muamua ma Mulimuli i luga o le laupapa. Fai atu i nisi o tamaiti e faitau ia fuaiupu nei e saili ai po o le a le tulaga sa i ai sa Lamana a’o le’i aoaoina i latou e Amona ma ona uso: Alema 17:14–15; 26:23–24. Fai atu i isi tamaiti e faitau ia fuaiupu nei e saili ai pe na faapefea ona sui Sa Lamana: Alema 26:31–34; 27:27–30. Valaaulia tamaiti e lisi i lalo o ulutala mea na latou mauaina. Ona valaaulia lea o i latou e saili, i le Alema 24:7–10, le ala na mafai ai e nei sa Lamana ona suia atoatoa. Tuu atu lau molimau e uiga i le mana o le Atua e faamagalo ai i tatou ma fesoasoani ia tatou salamo ma suia.

• Valaaulia tamaiti e faitau faatasi le Alema 26: 21-22, vaavaai mo faamanuiaga e oo mai ia i latou e salamo. Valaaulia tamaiti e faamatala nisi o nei faamanuiaga i a latou lava upu.

Alema 26; 29

E aumaia e le talalelei ia te au le olioli, ma e mafai ona ou faasoa atu lenei olioli i isi.

O nei mataupu ua tumu i faataitaiga o le olioli lea e sau mai le ola ma le faasoaina atu o le talalelei. E mafai faapefea ona e faʻaaogaina le Alema 26 ma le 29 e musuia ai tamaiti e saili lenei olioli?

Gaoioiga e Mafai Ona Fai

• Fesoasoani i tamaiti e saili upu ia “olioli” ma le “olioli” [rejoice] i le Alema 26 ma le29. Faitau faatasi nisi o fuaiupu latou te mauaina, ma talanoaina mea o loo aoao mai e nei fuaiupu e uiga i le olioli. O le a le mea na maua ai e Amona ma Alema le olioli? Faasoa atu se aafiaga na e lagonaina ai le olioli mai le ola ai po o le faasoaina atu o le talalelei, ma uunaia tamaiti e faasoa mai o latou lava aafiaga.

• Valaaulia ni tamaiti se toalua e faafesagai ma vaai po o ai e mafai ona faaataina muamua le isi tamaitiiti. O a nisi o auala e mafai ai ona tatou faʻalauiloa atu le olioli i isi? E faapefea e le faasoaina atu o le talalelei ona faasalalauina le olioli? Fesoasoani i tamaiti e mafaufau i ni auala e mafai ona latou faasoa atu ai le olioli o le talalelei i a latou uo ma aiga.

Fautuaina le Aoaoina i le Aiga

Valaaulia tamaiti e tausia a latou folafolaga e pei ona faia e Aneti-Nifae-Liae.

Faaleleia o Lo Tatou Aoao Atu

Aoao se mau. Filifili se fuaitau o se mau po o se fuaitau puupuu e te manatu e mafai ona fesoasoani i tamaiti i lau vasega, ma fesoasoani latou te taulotoina. O fesoasoani vaaia ma le faaaogaina o lima e mafai ona fesoasoani.