Ata na tusia e Joshua Dennis

20--26 Iulai

Alema 36--38

“Tepa atu i le Atua ma e Ola Ai”

Ao e suesue ma le agaga tatalo le Alema 36–38, atonu e oo mai ia te oe ni uunaiga e uiga i tamaiti o loo e aoaoina. Faamaumau nei lagona; atonu latou te ono faaosofia ni manatu mo gaoioiga e aʻoa’o ai.

Tusi faamaumau Ou Lagona Uunai

Valaaulia le Fefaasoaai

Valaaulia tamaiti uma e faasoa mai se mea na aoaoina ai i latou e o latou matua. Fesili atu ia i latou pe latou te iloa mea na aoao atu e Alema i ona atalii.

Aoao atu le Aoaoga Faavae: Tamaiti Laiti

Alema 36:6, 20, 24

O le salamo na te aumaia ia te a’u le olioli.

Aoaoina o fanau e uiga i le olioli o le salamo ao laiti i latou e mafai ona musuia i latou ia salamo ao latou tuputupu a’e.

Gaoioiga e Mafai Ona Fai

• Faitau le Alema 36:20 i tamaiti, ma fai atu ia i latou e faalogo pe o le a le lagona o Alema. Valaaulia i latou e taʻu mai nisi o mea e aumaia ai ia i latou le olioli. Faaali atu se ata o le Faaola, ma faamatala atu na lagona e Alema le olioli aua na faamagaloina e Iesu Keriso ana agasala.

• Tuu atu i tamaiti taitasi se fasipepa o loo i ai foliga fiafia i le tasi itu ma foliga faanoanoa i le isi itu. Fai atu ia i latou e faalogo ao e faitauina le Alema 36:6 ma filifili po o fea foliga e tatau ona latou uu i luga. Faamalamalama atu sa salamo Alema ma lagonaina le olioli aua na faamagaloina o ia e Iesu Keriso mai le faia o filifiliga leaga. Fai atu i tamaiti e faalogo ao e faitau i le Alema 36:24 e uiga i filifiliga lelei na ia faia mulimuli ane ma ia uu i luga le foliga saʻo.

• Usu faatasi se pese e faatatau ia Iesu Keriso, e pei o le “Na Ia Auina Mai Lona Alo” (Tusipese a Tamaiti,20--21). Ia tuuina atu lau molimau na afio mai Iesu i le lalolagi e laveaiina i tatou mai le agasala ma aumai ia i tatou le olioli.

Alema 37:6–7

“O mea laiti ma faatauvaa e faataunuu ai mea tetele.”

E mafai faapefea ona e aoaoina tamaiti ina ia latou iloa e faaaoga e le Alii mea laiti pe faatauvaa e faataunuu ai Lana galuega?

Gaoioiga e Mafai Ona Fai

• Faitau le Alema 37:6–7, ma valaaulia tamaiti e ifo i lalo i taimi uma e te faitauina ai le upu “laiti.” Faʻaali atu ia i latou ni nai mea laiti e mafai ona tutupu ai ni mea tetele pe minoi ai mea tetele, e pei o se ma’a taavale po o se ki o le taavale. O a mea tetele e tupu pe minoi ona o nei mea laiti? Fesoasoani i tamaiti e mafaufau i nisi mea laiti pe faatauvaa e finagalo le Atua tatou te faia. O a mea tetele e mafai ona tupu ona o nei poloaiga laiti pe faatauvaa?

• Faaali atu se ata po o ni mea laiti se lua e faaputuputu i mea tetele, e pei o le lau o le mutia ma se fanua, po o se timu ma se vaituloto. Molimau atu e tusa lava pe laiti, o faatinoga faatauvaa e mafai ona faia ai se eseesega tele i o tatou olaga ma olaga o isi. Uunai tamaiti e talanoa e uiga i nisi mea faatauvaa, mea lelei latou te faia i aso uma, pe fefaasoaaʻi au lava faataitaiga. Valaaulia tamaiti e filifili se mea faigofie, mea lelei e mafai ona latou faia i lenei vaiaso ma tusi se ata o i latou ma a latou faatinoga. Ia uunaia tamaiti e ave a latou ata i le fale ma fetufaai atu ai i o latou aiga.

Alema 37:38–47

E mafai ona fesoasoani tusitusiga paia ia i tatou i aso uma.

E ui o le toatele o tamaiti laiti e le mafai ona faitau, e mafai ona e fesoasoani ia latou maua se molimau o le mana o tusitusiga paia e taialaina ai o latou olaga i aso uma.

Gaoioiga e Mafai Ona Fai

• Tuu i luga se ata o le Liahona (e pei o le Tusiata o le Talalelei, nu.68), pe valaaulia tamaiti e tusi se ata ao latou faasoa mai mea latou te manatua e uiga i ai (tagai 1 Nifae 16:10, 28–29). Uu i luga tusitusiga paia, ma fai atu i tamaiti e faasoa mai pe faapefea ona pei tusitusiga paia o le Liahona. Faaaoga le Alema 37:38-47 ma le itulau o gaoioiga o lenei vaiaso e faaopoopo atu i lenei talanoaga.

• Usu se pese faatasi ma tamaiti e faatatau i le suesueina o tusitusiga paia, e pei o le “Saili, Mafaufau Loloto, ma Tatalo” po o le “A Ou Su‘esu‘e i Mau Pa‘ia” (Tusipese a Tamaiti,66; Viiga, nu. 174). O a faamanuiaga o le suesueina o tusitusiga paia o loo taua i le pese?

  

  O loo aoaoina i tatou e tusitusiga paia i le auala e mulimuli ai i le Atua.

Aoao atu le Aoaoga Faavae: Tamaiti Matutua

Alema 36

E mafai ona ou “fanauina i la le Atua” pe a ou mulimuli ia Iesu ma salamo i a’u agasala.

“O le liua … o se suiga i lo tatou lava natura. O se suiga taua tele lea e faatatau i ai le Alii ma Ana perofeta o se toe fanauina” (“Conversion,” Gospel Topics, topics.ChurchofJesusChrist.org).

Gaoioiga e Mafai Ona Fai

• Toe faamanatu faatasi ma tamaiti le tala o le liuaina o Alema le Itiiti i le Alema 36:6--21. Tusi i luga o ni fasi pepa ni upu po o fuaitau mai nei fuaiupu o faamatala ai le lagona o Alema, ma tuu i luga o le laupapa. Fai atu i tamaiti e faatulaga fasi pepa i ni vaega se lua: mea na lagona e Alema ae na te le’i manatuaina mea na aoao e lona tama e uiga i le Faaola ma mea na ia lagonaina ina ua uma ona ia manatuaina. Faitau faatasi le Alema 36:17--20, ma molimau atu i tamaiti e faamagalo i tatou e Iesu Keriso pe a tatou salamo.

• Tusi le Fanau i la le Atua ma faasino mau nei i luga o le laupapa: 1 Ioane 4:7; Mosaea 5:7; 27:25–26; Alema 5:14; 22:15. Fesoasoani i tamaiti e faitau fuaiupu ma vaai mo fuaitau o loo faamatala mai ai le uiga o le fanau i la le Atua. E faapefea le amio a se tagata ua uma ona fanau i la le Atua? E mafai faapefea ona tatou faaalia ua fanauina i tatou i la le Atua?

Alema 37:6–9, 38–47

“O mea laiti ma faatauvaa e faataunuu ai mea tetele.”

Fesoasoani i tamaiti o loo e aoaoina ia iloa o le faitauina o tusitusiga paia e tusa lava pe mo sina taimi puupuu i aso taitasi e mafai ona aumaia ia i latou faamanuiaga tetele.

Gaoioiga e Mafai Ona Fai

• Tusi pe faaali atu se pakete. E fia ni mataua o vai o le a manaomia e faatumu ai le pakete? Fesoasoani i tamaiti ia iloa o le a manaomia le tele o mataua laiti e faatumu ai le pakete. E faapefea ona fesootai lenei mea i le Alema 37:6–7? E faapefea e le faitauina o tusitusiga paia ona pei o le faaopoopoina o mataua laiti i se pakete?

• Valaaulia tamaiti e tagai i le Alema 37:6--9 mo faamanuiaga e maua mai i “faamaumauga,” po o tusitusiga paia. Fai faatasi o se vasega se lisi o mea latou te maua. Na faapefea e le faitauina o tusitusiga paia ona faamanuiaina o tatou olaga? Faasoa atu lau molimau e uiga i tusitusiga paia, ma uunaia tamaiti ia faia foi faapea.

• Tuu i luga se ata o le Liahona (e pei o le Tusiata o le Talalelei, nu.68), ma fai i tamaiti e toe faamanatu mea latou te manatua e uiga i le Liahona mai le 1 Nifae 16:10, 28. Fesoasoani i tamaiti e faitau le Alema 37:38--42. Na faapefea ona galue le Liahona? E faapefea ona tutusa lenei mea ma le auala o loo galue ai tusitusiga paia? Faitau faatasi fuaiupu 43--47 e fesoasoani e tali lenei fesili. Valaaulia tamaiti e faauma le itulau o gaoioiga o se vaega o lenei gaoioiga.

Fautuaina le Aoaoina i le Aiga

Uunaia tamaiti e faasoa mai se mafuaaga se tasi latou te faafetai ai mo tusitusiga paia ma valaaulia tagata o o latou aiga e faia foi faapena.

Faaleleia o Lo Tatou Aoao Atu

Fesoasoani i tamaiti ia avea ma tamaiti aoao sili atu. O lou faamoemoega i le aoao atu o tamaiti e le na o le avatu o le upumoni ia i latou. E ao foi ona e fesoasoani ia i latou e avea i latou lava o ni e tutoatasi i le sailia o le upumoni. Mo se faataitaiga, nai lo le taʻuina atu i tamaiti o upumoni o loo maua i le tala o le liua o Alema, e mafai ona e fuafuaina gaoioiga i taimi e mafai ai ona latou iloa upumoni i le tala mo i latou lava.