Liua

Vaaiga Aoao

O le liua e aofia ai se suiga i le amio, ae e oo i tua atu o le amio, o se suiga i lo tatou lava natura. O se suiga taua lea e faatatau i ai le Alii ma Ana perofeta o se toe fanauina, o se suiga o le loto, ma se papatisoga i le afi. Na fetalai le Alii:

“Aua e te ofo e ao i le fanauga uma a tagata, ioe, o tane ma fafine, o atunuu uma, ituaiga, gagana eseese ma nuu, ona toe fanauina; ioe, fananauina i le Atua, ma suia mai lo latou tulaga faaletino ma paʼū, i se tulaga o le amiotonu, ua togiolaina e le Atua, ma avea ma ona atalii ma afafine.

“Ma faapea ona avea ai o i latou ma tagata fou; ma vagana ai ua latou faia lenei mea, e leai se ala latou te mafai ai, ona fai mo o latou tofi le malo o le Atua.” (Mosaea 27:25–26).

O le liua o se faagasologa, e le o se mea e tupu i se taimi e tasi. E oo mai le liua o se taunuuga o taumafaiga amiotonu e mulimuli i le Faaola. O nei taumafaiga e aofia ai le faaaogaina o le faatuatua ia Iesu Keriso, salamo i agasala, papatiso, mauaina o le meaalofa o le Agaga Paia, ma le tumau i le faatuatua e oo i le iuga.

E ui lava o le liua e ofoofogia ma suia ai olaga, ae o se vavega e le leoa. O asiasiga a agelu ma isi mea matautia e tutupu e le aumaia ai le liua. E oo lava ia Alema na vaai i se agelu, na liua ina ua uma ona ia ‘anapogi ma tatalo i aso e tele’ mo se molimau o le mea moni (Alema 5:46). Ma o Paulo, o le na vaai i le Faaola toetu, na aoao mai ‘e leai foi se tasi na te mafaia ona ta’ua o Iesu o le Alii, a le seanoa le Agaga Paia’ (1 Korinito 12:3).

Ua saunia e le Tusi a Mamona faamatalaga o tagata ua liua i le Alii:

Ua ia i latou le manao ia faia mea lelei. Na folafola mai e le nuu o le Tupu o Peniamina, “O le Agaga o le Alii Mamana Aoao, lea ua ia faia se liuga tele i totonu o i matou, po o i totonu o o matou loto, ua le toe i ai so matou manao e fai mea leaga, ae ia faia mea lelei e le aunoa” (Mosaea 5:2). Na tautala atu Alema i tagata o e “sa le mafai ona vaai atu i le agasala e aunoa ma le inoino i ai” (Alema 13:12).

Latou te le tetee atu i le Alii. Sa faamatala e Mamona se vaega o sa Lamana na amioleaga ma fiainu i le toto ae na “liua i le Alii” (Alema 23:6). Na suia e nei tagata lo latou igoa ia Aneti-Nifae-Liae ma “sa avea i latou ma tagata amiotonu; sa latou tuu i lalo auupega o lo latou fouvale, sa latou le toe tau faasaga i le Atua, pe faasaga i soo se tasi o o latou uso”(Alema 23:7).

Ua latou faasoa atu le talalelei. O Enosa, Alema le Matua, Alema le Itiiti, o atalii o Mosaea, Amoleka, ma Seseroma na tuuto atu i latou lava i le talaiga o le talalelei ina ua latou liua i le Alii (tagai Enosa 1:26; Mosaea 18:1; 27:32–37; Alema 10:1–12; 15:12).

Ua faatumulia i latou i le alofa. Ina ua mavae le asiasiaga a le Faaola toetu i tagata o Amerika, “sa liliu tagata uma i le Alii, i luga o le laueleele atoa, o sa Nifaē uma ma sa Lamanā, ma sa leai ni finauga ma ni feteenaiga i totonu ia te i latou, ma sa faamaoni tagata uma o le tasi i le isi i fealoaiga na latou fai. …

“Ma sa oo ina leai se finauga i le laueleele, ona o le alofa o le Atua sa mau i loto o tagata.

“Ma sa leai se mataua, po o ni feeseeseaiga, po o ni faanunununu, po o ni faitaaga, po o ni pepelo, po o ni fasiotiga tagata, po o soo se mea faamataaitu; ma e moni e le mafai ona i ai o ni tagata e sili atu ona fiafia i totonu o tagata uma na foafoa e le aao o le Atua.

“Sa leai ni faomea, po o ni fasioti tagata, sa leai ni sa Lamanā, po o soo se ituaiga o tagata; ae sa tasi i latou, o le fanau a Keriso, ma o suli i le malo o le Atua.” (4 Nifae 1:2, 15–17).

Tusifaamaumau Ou Lagona Uunai