Tamaitai i le Ekalesia

Vaaiga Aoao

O tamaitai o se vaega taua o le fuafuaga o le fiafia, ma e le mafai ona faagaoioia lena fuafuaga e aunoa ma i latou. E auai tamaitai i le galuega o le faaolataga, lea e aofia ai galuega faafaifeautalai, faatumauina o tagata liliu mai, faamalosia o tagata ua le o toe toaaga mai, galuega o le malumalu ma talafaasolopito o aiga, aoao atu o le talalelei, ma le tausiga mo e matitiva ma le tagolima. I le avea ai ma soo o Iesu Keriso, ua tuuina atu ai i tamaitai uma o le Ekalesia le tiutauave ia iloa ma puipui ia matafaioi paia o tamaitai, lea e aofia ai matafaioi o le avā, tinā, tama teine, uso, tauaiga tinā, ma uo. Latou te tutu malosi ma le le maluelue i le faatuatua, i le aiga, ma i le faamama avega. Ua auai tamaitai i aufono ia e vaaia ai gaoioiga a faapotopotoga i le lalolagi atoa. Ua i ai foi ia i latou le natura paia, le meaalofa maoae ma le tiutetauave mo le tausia o le aiga ma le fanau ma faafailele iina ma i isi nofoaga.

O tamaitai o Le Ekalesia a Iesu Keriso o le Au Paia o Aso e Gata Ai ua auai i ma auauna atu o ni taitai i le Aualofa. O tamaitai foi e auauna ma taitai i faalapotopotoga a Tamaitai Talavou mo teineiti o le 12 i le 18 tausaga le matutua ma le faalapotopotoga o le Peraimeri mo tamaiti uma o vaitausaga 18 masina e oo i le 11 tausaga le matutua. O tamaitai foi e faiaoga i le Aoga Sa. O tamaitai ua tuuina atu i ai le avanoa e tatalo i fonotaga a le Ekalesia ma lauga i fonotaga i tulaga i le lotoifale ma le Ekalesia aoao.

A auauna atu tamaitai o se peresitene o le Aualofa, Tamaitai Talavou po o le Peraimeri, latou te auai i fonotaga ma faaiuga a aufono e faia e faatatau i tagata o le Ekalesia i a latou iunite.

Tusifaamaumau Ou Lagona Uunai