Poloaiga

O upumoni paia e taiala ai i tatou i luga o le ala o feagaiga a le Atua

Pe ua e matauina ea le tele o faailoga o loo tuuina i luga o auala ma aualatele? O nisi faailoga e tuuina atu ai faatonuga e fesoasoani ai i avetaavale e malaga i le mea latou te mananao e o i ai. O isi faailoga e faalauiloa ai le saogalemu e ala i le faaalia o tapulaa saoasaoa po o savali lapatai e uiga i tulaga o le auala. Afai e filifili avetaavale e le amanaia faailoga o le auala, e mafai ona latou tuu i latou lava ma isi i se tulaga lamatia. O poloaiga a le Tama Faalelagi e pei lava o faailoga o le auala. Pe a usitaia, e taitai oe e poloaiga i luga o le ala e tau atu i le afioaga o le Atua. Latou te faatonuina oe i le auala e maua ai le filemu ma le olioli i lenei olaga. O poloaiga a le Atua e mafai foi ona fesoasoani ia te oe e aloese ai mai le tele o mea matautia faaleagaga ma faaletino i lenei lalolagi.

O poloaiga o se faamaoniga lea o le alofa o le Atua mo oe. O le filifili e tausi poloaiga e aumaia ai faamanuiaga ma le olioli i lou olaga. O le usiusitai i poloaiga o le a saunia ai foi oe e toe foi atu e mau faatasi ma le Atua e faavavau (tagai i le Mataupu Faavae ma Feagaiga 82:8–10). E pei ona aoao mai Peresitene Dallin H. Oaks, “O le alofa aoao ma le atoatoa o le Atua o loo faaalia i faamanuiaga uma o Lana fuafuaga o le talalelei, e aofia ai le mea moni faapea o loo faapolopoloina Ana faamanuiaga silisili mo i latou o e usiusitai i Ana tulafono.”¹

O A Poloaiga?

O poloaiga o tulafono mamana ia ma mea e manaomia e tuuina mai e le Atua mo lo tatou manuia. O le usiusitai i poloaiga a le Atua e manaomia mo lo tatou faaeaga. E ala i le tausia o poloaiga, tatou te faaali atu ai lo tatou alolofa i le Atua ma maua faamanuiaga faaleagaga ma faaletino.

Taiala fesootai mo le suesueina o le talalelei: Usiusitai, Faitalia, Faatuatua ia Iesu Keriso, Salamo

Vaega 1

O Poloaiga o se Vaega Taua o le Ola ai i le Talalelei

Na aoao mai Iesu Keriso o poloaiga silisili, o le alofa i le Atua ma ia alofa atu i isi. O isi poloaiga uma ua tuuina mai ai le taitaiga i le auala e faia ai na mea e lua. (Tagai Mataio 22:37–40.)

Ua faaalia i tusitusiga paia ua aoao mai e le Atua poloaiga e ala mai i perofeta talu mai aso o Atamu ma Eva (tagai Mose 5:4–5). E toatele tagata i le lalolagi atoa ua masani i Poloaiga e Sefulu ia na faaalia e Ieova ia Mose (tagai Esoto 20:3–17). O nei tulafono paia ua toe faamamafaina i o tatou aso faatasi ai ma isi upumoni taua (tagai Mataupu Faavae ma Feagaiga 42:19–29; 59:5–13). O poloaiga a le Atua e faasa ai amioga le mama, e pei o le le faamaoni, mulilua, ma le fasioti tagata. Ua tuuina mai foi e le Atua poloaiga e fai ai mea lelei, e pei o le tatalo, ² ia faamagalo atu, ³ ma ia tausia i latou e manaomia le fesoasoani.⁴

O lo tatou usiusitai i poloaiga o se faailoaga sili lea o lo tatou alofa mo le Tama Faalelagi ma Lona Alo, o Iesu Keriso. Pe a tatou tauivi ina ia usiusitai i poloaiga a le Atua, ua Ia valaaulia i tatou ia salamo ma toe foi atu ia te Ia.

Mea e mafaufau i ai

Faitau le Mataio 22:37–40. Aisea e te manatu ai na fetalai Iesu o poloaiga silisili o le alofa i le Atua ma ia alofa atu i isi? O a ni auala o atagia mai ai i isi poloaiga le uiga o nei poloaiga e lua?
Vaai faalemafaufau e faapea, na fautua mai se tasi o le mulimuli i poloaiga taitasi a le Atua e le taua. E faapefea ona e tali atu i ai? O a ni aafiaga na e maua ua faateleina ai lou lotofaafetai mo poloaiga a le Atua?
Faitau le Mareko 10:17–22, ma vaavaai pe o a lagona o le taulealea mauoa e uiga i poloaiga. O le a se mea ua e aoaoina e uiga i le usiusitai i poloaiga mai ana fegalegaleaiga ma Iesu Keriso? Afai e te tuuina oe lava i le tulaga o lenei tagata, o le a se suiga e te lagona o le a valaaulia oe e Iesu e fai?

Gaoioiga mo le aoao faatasi ma isi

Matamata i le “Why Does God Give Us Commandments?” (0:39). A uma ona matamata le vitio, e mafai ona e faia se lisi o poloaiga sa e ola ai ma faamanuiaga ua e mauaina mo lou usiusitai. E mafai foi ona e talanoa e uiga i le mafuaaga e taua ai le vaai i poloaiga mai le silafaga a le Atua.

Aoao atili

Failauga 12:13; Mosaea 2:41; 12:33–37; 13:11–26; Mataupu Faavae ma Feagaiga 130:20–21
L. Whitney Clayton, “Soo Se Mea Lava E Fai Mai Ai O Ia Ia Te Outou, Ia Outou Faia,” Liahona, Me 2017, 97–99
“The Greatest Commandment” (vitio), Gospel Library

Vaega 2

O Poloaiga e Faalatalata Atili Atu ai i Tatou ia Iesu Keriso

Sa aoao e Iesu Ona soo, “Afai tou te alolofa mai ia te au, tausi a’u poloaiga” (Ioane 14:15; tagai foi fuaiupu 21). O laasaga taitasi o le usiusitai o se faaaliga lea o lou alofa mo le Atua ma e faalatalata atili atu ai oe ia Iesu Keriso. Ina ua papatisoina oe, sa e osia se feagaiga, po o se folafolaga, e tausi poloaiga a le Atua. Ae o nisi taimi atonu e te tauivi ai e faia lena mea. Ona e alofa le Atua ia te oe, ua Ia valaaulia ai oe ia salamo soo ma toe liliu atu ia te Ia. Atonu foi e i ai taimi e le o manino ai pe aisea ua tuuina mai ai e le Atua se poloaiga patino. I lena tulaga, e finagalo le Atua ia te oe e faatino le faatuatua ia te Ia. O le a galulue mea uma mo lou lelei pe a e faalagolago i le Atua ma taumafai ia usiusitai i Ana poloaiga (tagai Mataupu Faavae ma Feagaiga 100:15).

Mea e mafaufau i ai

Sa aoao mai Peresitene Harold B. Lee, “O le poloaiga e aupito sili ona taua a le Atua, o lena lea e sili ona faigata ona e tausia i le taimi nei.”⁵ O le a se mea e mafai ona e faia e taulai atu ai i le taumafai e usitai i lena poloaiga?
O nisi taimi o le usiusitai i poloaiga e mafai ona lagona ai e pei o se tofotofoga o lo tatou faatuatua. Faitau le 1 Nifae 3:7. E mafai faapefea ona fesoasoani lenei fuaitau pe afai e te tauivi e usitai i se tasi o poloaiga a le Atua, e pei o le totogiina o le sefuluai po o le tausia o le Upu o le Poto?

Gaoioiga mo le aoao faatasi ma isi

E mafai ona e faaaogaina le vitio “Following God” (1:25) e talanoaina ai pe faapefea ona avea le salamo e le aunoa ma se vaega taua o le taumafai ia usiusitai i poloaiga a le Atua.

Aoao atili

Mosaea 2:20–24, 41; 18:8–10; 3 Nifae 12:19–20
D. Todd Christofferson, “O Le Olioli o le Au Paia,” Liahona, Nov. 2019, 15–18
Carole M. Stephens, “Afai Tou Te Alofa Mai ia te A’u, ia Outou Tausi Mai i A’u Poloaiga,” Liahona, Nov. 2015, 118-20

Isi Punaoa i le Taua o Poloaiga a le Atua