Faigata

Vaaiga Aoao

I le avea ai o se vaega o le fuafuaga o le faaolataga a le Tama Faalelagi, e fetaiai ai tagata uma ma faigata i le taimi o o latou olaga. O tofotofoga, o mea e le fiafia ai, faanoanoaga, ma’i, ma le loto tiga, o ni vaega faigata o le olaga, ae faatasi ai ma le fesoasoani a le Alii, e mafai ai ona latou oo atu i le tuputupu ae faaleagaga, faaleleia atili, ma le alualu i luma.

O le manuia ma le fiafia o tagata taitoatasi, i le taimi nei ma le faavavau, e faalagolago tele lea i lana tali atu i faigata o le olaga.

O puapuaga e eseese mafuaaga e oo mai ai. O tofotofoga e mafai ona oo mai o se taunuuga o le faamaualuga ma le le usiusitai o le tagata lava ia. O nei tofotofoga e mafai ona aloese mai ai e ala i le ola amiotonu. O isi tofotofoga o ni vaega faanatura o le olaga ma e ono oo mai i taimi o loo ola amiotonu ai tagata. Mo se faataitaiga, e mafai ona oo tagata i tofotofoga i taimi o ma’i, po o le le mautonu, po o le oti foi o e pele. E mafai ona oo mai faigata i nisi o taimi ona o filifiliga le lelei ma upu ma gaoioiga faatiga a isi. E ono oo mai foi puapuaga e ala mai i se Tama Faalelagi agaalofa e avea o se aafiaga e aoao ai.

A fetaiai nisi o tagata ma faigata, latou te sa’i ma loto tiga. Latou te fesili faapea, “Aisea ua tupu ai lenei mea ia te au? Aisea ua tatau ai ona ou mafatia i lenei mea, i lenei taimi? O le a se mea na ou faia ua oo ai lenei mea ia te au?” Ae o nei fesili o loo i ai le mana e pulea ai o latou mafaufauga. O fesili faapena e mafai ona punitia ai la latou vaaiga mamao, alu uma ai lo latou malosi, ma faoa ai mai ia i latou ni aafiaga e finagalo le Alii latou te maua. Nai lo o le tali atu i lenei ala, e tatau i tagata ona mafaufau e fai atu fesili e pei o le, “O le a se mea ou te faia? O le a se mea e mafai ona ou aoao mai lenei aafiaga? O le a se mea e tatau ona ou suia? O ai e tatau ona ou fesoasoani i ai? E mafai faapefea ona ou manatua le tele o o’u faamanuiaga i taimi o tofotofoga?”

O ituaiga o faigata eseese e manaomia ai ni tali eseese. Mo se faataitaiga, o tagata o tigaina i gasegase atonu e manaomia le tau lava o le onosai ma faatuatua. O tagata e puapuagatia ona o upu po o amioga a isi, e tatau ona galulue agai i le faamagalo atu o i latou o e na faatiga ia i latou. O tagata e afaina i le sauaina, e tatau ona sailia vave se fesoasoani. Afai e oo mai tofotofoga o se tagata ona o le le usiusitai, e tatau ona ia faasa’oina le amioga ma saili ma le lotomaualalo se faamagaloga.

E ui ina o le a eseese nisi o tali i faigata, e tasi le tali e tatau lava ona tumau pea—ia faalagolago i le Tama Faalelagi ma Iesu Keriso. Na aoao mai le perofeta o Alema, “O ai lava e tuu atu lo latou faalagolago i le Atua e lagolagoina i o latou tofotofoga, ma o latou faalavelave, ma o latou puapuaga, ma o le a sii ae i latou i luga i le aso gataaga” (Alema 36:3).

Tusifaamaumau Ou Lagona Uunai