Mataupu 7

Faatuatua i Taimi o Tofotofoga: “Mai Ata Lafoia i le La Susulu Mamalu”

“O alii ma tamaitai taitasi o e auauna i le Alii, pe o le a lava le malosi o i ai lona faatuatua, e i ai o latou taimi pogisā; ae, afai ua latou ola faatuatua, o le a pasae mai le malamalama i o latou luga, ma o le a tuuina mai le fesoasoaniga.”

Mai le Soifuaga o Lorenzo Snow

Ia Fepuari 1846, sa faamalosia ai le Au Paia o Aso e Gata Ai e tuua o latou fale i Navū, Ilinoi. A o latou sauni e faia le faigamalaga agai i sisifo, i lo latou nuu fou folafolaina, sa latou mulimuli i le fautuaga a Peresitene Polika Iaga e faatutuina nai nuu laiti i le ala. Na latou nonofo i fale lē tumau ma totoina nai faatoaga mo le Au Paia o e na mulimuli mai i a latou. Ina ua mae’a ona faaaluina sina taimi puupuu i le setete o Iowa, i se nuu na faaigoaina o Garden Grove, na siitia atu ai Lorenzo Snow ma longa aiga i se nofoaga na faaigoa e le Au Paia o Mauga Peseka, i totonu foi o Iowa. O lenei nuu sa faaigoa i le mauga lea na vaaia ai e le perofeta o Mose le nuu folafolaina mo ona tagata.

I nai masina talu ona taunuu i le Mauga o Peseka, sa valaauina Lorenzo e pulefaamalumalu i le nuu. “E o’o mai i le taimi lea,” na ia faamauina ai mulimuli ane, “o le Au Paia i Peseka sa i se tulaga sili ona pagatia, sa lē gata i meaai ma lavalava, a’o manu ma taavale toso, ina ia faaauau ai la latou malaga. E tele aiga sa matuā leai lava ni mea, ma sa faalagolago i le fesoasoani a o latou tuaoi, o e, i le tele o taimi, na lē lava saunia foi e faatinoina lena uiga lelei. Peitai, i luga o nei mea uma, sa asiasia le nuu uma i se faamai tele, lea na lē lava nisi e malolosi e tausia le au mama’i; ma o’o mai ai le maliu ona o le faama’i, ma o tamā, tinā, fanau, uso, tuafafine ma uo mamae, na maliliu ai, ma sa tanumia i latou i le mae’a ai o sina sauniga puupuu, ma o nisi sa aunoa ma ni laei tatau mo falelauasiga. O le mea lena, sa faaopoopo atu ai le faanoanoaga ma le faavauvau i le pagatia.”

Sa silafia lelei e Lorenzo nei tofotofoga e ala i mea na tutupu ia te ia. Sa o’o ia te ia ma lona aiga ni ma’i, lagona lē fiafia, ma le loto tigā, e aofia ai le maliu o lona afafine faato’a fanau mai o Leonora. Sa ia tusia, “O Leonora le itiiti sa o’o ina ma’i ma maliu ai, ma, faatasi ma le faanoanoa sili, na matou tanumia lona tino i lona nofoaga mau lē leoa, ma tuua ai na o ia, e mamao ese mai lona tamā ma lona tinā na fanauina o ia.”

I nei tulaga uma, sa fesoasoani Lorenzo i le Au Paia e faafetaiaia o latou tofotofoga e ala i le faatuatua. Na tusia e lona tuafafine o Eliza, “Faatasi ai ma se taumafaiga naunautai—se mafaufau e faatino, ma se faamoemoega mausalī lea sa lē tuuina atu lava i le lotovaivai, na ia faamaonia ai o ia ua agavaa lelei ma se faalavelave faafuase’i, lea atonu e faamata’uina ai tagata, o ē i ai agavaa masani.” Na manatua e Eliza, “Na muamua ona ia galue e faaosofia ma tuufaatasia taumafaiga a tagata.” Na ia faatulagaina alii i ni vaega e galulue ai. O nisi na o atu i aai lata ane, ina ia maua mai ai ni tupe mo meaai ma lavalava. O isi sa nonofo i le tolauapiga, lea na latou vaaia ai aiga iinā, totō togalaau aina, ma fausia ma lipea oloa lea atonu e mafai ona faaaogaina e nuu lata ane.

Faatasi ma le fesoasoaniga i le Au Paia e galulue faatasi, sa uunaia e Lorenzo i latou e faafailele i latou lava faaleagaga, ma ia fiafia i faafiafiaga lelei. “I masina uumi o le taumalulu,” na ia faapea mai ai, “Na ou saili ai e faatumauina uiga lelei ma le lototele o le Au Paia i Peseka, e le gata i le faatulagaina o fonotaga mo tapuaiga faalelotu ma gaoioiga i vaega eseese o le nuu, ae, sa faapea foi e ala i le sauniaina o avanoa mo i latou, ma le uunaiina e faia faafiafiaga tatau o ituaiga eseese uma. …

“Mo se faataitaiga, o le a ou tuuina atu se faamatalaga o se tasi o faafiafiaga, lea na ou fetuutuunaia mo le faafiafiaina o se vaega toatele na mafaia ona ou faapotopotoina faatasi i si o’u tama’i fale, o se tama’i fale e tasi le fogafale, pe tusa ma le sefulu-lima i le tolu sefulu futu [e tusa ma le fa ma le afa mita i le iva mita], na fausiaina i ogalaau, faatasi ma se taualuga o le palapala ma le fola o le palapala, sa i ai i le tasi itu se ala asu ua talafeauga lona maualuga, na fausia i vaovao na sasaina mai le siosiomaga. I le saunia faapitoa ai mo le faafiafiaga, na matou folaina le fola i sina vaega manifinifi o lauvao mamā, ma teuina ona puipui i ie afu papa’e na tatoso ese mai i o matou moega ua leai ni vavae.

“Ina ia malamalama lelei lo matou fale faafiafia mo le gaoioiga, sa manaomia ai se taumafaiga tele lava faalemafaufau, ma o se tulaga na manaomia ai se tuufaatasiga tele o o matou tomai eseese. Ae, na faamanuiaina a matou taumafaiga. Mai le lua sa tanumia ai, na matou filifilia ni tunipa sili ona lapopo’a ma papa’e—sali ese ogatotonu, ma faatutu ai molī ga’o pupu’u i totonu, ma tuuina faavāvā faataamilo i le puipui, faatautau ifo isi mai le taualuga i o matou luga, lea sa faia i palapala ma ofe. O na molī, na tuuina maia se aafiaga sili ona filemū, … ma o le malamalama na lafoia mai e pa’u pito i tua o na tunipa, na tuuina maia se vaaiga faatosina sili ona matagofie.

“I le faagasologa o gaoioiga o le afiafi, o le toatele o a’u uo, i le faailoaga sili ona faamomoiloto na mafai ai, sa latou faamalō mai ia te a’u ma lo’u aiga mo le mamanu tulaga ese ma le poto na faaalia i na teuga ese ma taugofie.”

Sa manatuaina e Lorenzo e faapea “na aoga itula, ma sa mou ese atu fiafia.” O ia ma ana malo, sa faafiafiaina e le tasi le isi e ala i tautalaga, pese, ma tauloto. Sa ia faapea mai, “I le faaiuga, na foliga mai na faamalieina tagata uma, ma foi atu i aiga, ma le lagona fiafia e pei lava e le o ni tagata ua faaaunuua.”¹ [Tagai fautuaga 1 i le itulau 124.]

Aoaoga a Lorenzo Snow

O tofotofoga ma puapuaga e fesoasoani ia i tatou ina ia faaleleia atili ai faaleagaga, ma saunia mo le mamalu selesitila.

E faigata mo i tatou ona galueaiina lo tatou faaolataga ma faataunuuina faamoemoega o le Atua e aunoa ma tofotofoga, pe, aunoa ma osigataulaga.²

Ua masani le Au Paia o Aso e Gata Ai ma tofotofoga ma puapuaga. Na mamanuina faapena e le Atua, ina ia faapea. Ou te talitonu e faapea i le [muai] lalolagi o agaga, ina ua tuuina mai ia i tatou e o mai i lenei olaga faataitai, ma uia le tulaga ua faapea ona tatou mauaina, sa lē lelei ma solo lelei mea uma; o faamoemoega sa lē matuā matagofie i ona tulaga uma, e pei ona sa tatou manana’o ai. Peitai, e lē taumate sa tatou vaaia ma malamalama lelei i le muai olaga, e faapea, ina ia mafai ona ausia lo tatou faaeaga ma le mamalu, sa tatau ona tatou o’o i lenei tulaga; ma e ui i le foliga mai sa tatou lē malilie i ai, sa tatou naunau e faia le finagalo o le Atua, ma o le mafuaaga lea ua tatou i ai iinei.³

Ua tonu i le finagalo o le Alii faapea o le a ia tofotofoina tatou seia o’o ina Ia silafia le mea e mafai ona Ia faia ia i tatou. Sa Ia tofotofoina Lona Alo o Iesu. … A o le’i afio mai o Ia [le Faaola] i le lalolagi, sa matauina e le Tamā Lona ala, ma silafia ai e mafai ona Ia faalagolago i Lona Alo, pe a i ai i se tulaga matautia le faaolataga o lalolagi; ma sa le’i to’atama’i ai o Ia. O le mea lea, e faatatau ia i tatou. O le a Ia tofotofoina tatou, ma faaauau ona tofotofoina tatou, ina ia mafai ona Ia tuuina i tatou i tulaga sili ona maualuluga o le olaga, ma tuuina mai i o tatou luga tiutetauave sili ona paia.⁴

Afai e faamanuiaina i tatou i le feagai ai ma tofotofoga faigata faatasi ma lo tatou tuutō ma le faamaoni atoatoa, atonu e mafai ona tatou faamoemoe i le faaiuga o o tatou tofotofoga, o se lofituina sili ma mausalī o le Agaga ma le mana o le Atua—o se faamanuiaga sili i luga o i latou o ē o le a tumau i le faamaoni i a latou feagaiga. …

O nisi o ō tatou uso ua fesiligia pe o le mavae ai o lenei olaga, atonu latou te mafai ai ona lagonaina e i latou lava le agavaa mo le mafutaga faatasi ma Perofeta ma le Au Paia ua mavae, o e na manumalo i tofotofoga ma sauaga; ma, faatasi ma le Au Paia … o e na mafatia i Katelani, i Misuri ma Ilinoi. O nei uso, o e na fesili ifo ia i latou lava lenei fesili, ua faaalia le faanoanoa e faapea latou te le’i i ai i na taimi o mafatiaga. Afai e i ai nisi o auai mai i le asō, ou te faapea atu, mo le faamafanafanaga o nei tagata, e puupuu lava se taimi tou te faatali ai, ona outou mauaina lea o avanoa tutusa, seia faamalieina ai outou. E lē mafai ona faaatoatoaina outou ma a’u, vagana ua tatou o’o i mafatiaga: Sa le’i mafaia e le Faaola [tagai i le Eperu 2:10]. I Lana tatalo ma lana augani i le Faatoaga i Ketesemane, na Ia faaataata ai le faagasologa o le tulaga faamamāina lea e manaomia i olaga o i latou, o ō latou faanaunauga ua uunaia ai i latou e maua le mamalu o se malo faa-selesitila. E leai se tasi e tatau ona sola ese ai, e ala i le faia o nisi faiga e suitulaga ai.⁵

E leai se isi auala e mafai ai e le Au Paia ona faia ni faaleleiga faaleagaga ma saunia ai mo se tofi i le malō selesitila, nai lo le uia o faigata. O le faagasologa lea e faateleina ai le malamalama, ma, o le filemu o le a o’o lava ina i ai i le lalolagi atoa. Ua faapea mai, afai o ō tatou siosiomaga uma ua filemu ma faamanuiaina i le taimi nei, o le a avea tatou ma tagata tulaga ese. Atonu o se tulaga na pau le mea o le a manana’o i ai, se vaega tele o tagata; o le a latou lē aapa atu i mea o le faavavau.⁶

Ia mafaufau i ai taitoatasi, po o tatou uma, e ao ona tatou tigaina ma e tatau ona tatou toe tigaina, ma aisea? Aua, ua manaomia mai e le Alii mai ia i tatou mo lo tatou faapaiaina.⁷ [Tagai fautuaga 2 i le itulau 124.]

Pe a tatou tumau i le faatuatua i taimi o ō tatou tofotofoga ma faaosoosoga, tatou te faaali atu le sili atu o lo tatou alolofa i le Atua, nai lō lo tatou alolofa i le lalolagi.

Faatasi ma o tatou tofotofoga, ua i ai foi faaosoosoga, ia e mafai ai ona tatou faaalia le tele o lo tatou faatauaina o la tatou tapuaiga. Ua outou masani i le mea na tupu ia Iopu, e tusa ma lena tulaga. Na tuuina atu ia te ia se malamalama i le toetu, ma le Togiola, ma sa ia iloaina lena mea e ui lava o le a oti o ia, ae i aso e gata ai, o le a ia vaai i lona Togiola i le lalolagi [tagai i le Iopu 19:25–26]. O faaosoosoga ia na feagai ma ia, na faaalia ai lona faatauaina o nei mataupu faalelagi nai lo nisi lava mea. …

… Talu ai ona o le Atua o la tatou uo, tatou te lē fefefe ai lava. Atonu o le a faaauau pea ona tatou feagai ma le tele o tulaga e lē talafeagai. E ala i na tulaga, tatou te mafai ai ona faaali atu i agelu le sili atu ona tatou fiafia i mea a le Atua, nai lo mea a le lalolagi.⁸ [Tagai fautuaga 3 i le itulau 124.]

A tatou tumau i le faatuatua, o le a faamalolosia e le Alii i tatou ina ia manumalo i faaosoosoga ma onosaia tofotofoga.

O le toatele o outou atonu ua feagai ma tofotofoga ogaoga, ina ia atoatoa ai lo outou faatuatua, faateleina lo outou talitonuga ia te outou lava, o o outou malamalama i mana o le lagi o le a faatupulaia; ma e tupu lenei mea a o le’i o’o mai lo outou faaolataga. Afai e o’o mai se faafitauli … ; afai e tuuina mai se tofotofoga, ma faamalosia outou e talia; afai e o’o mai sauaga malolosi faifaipea ia te outou;—ona, o’o ai lea i lena itula, ia siitia outou ao ma olioli, aua ua faitaulia outou ua agavaa e puapuagatia faatasi ma Iesu, le Au Paia, ma perofeta paia; ma iloa ai, ua o’o mai le taimi o lo outou faaolataga.

Ua ou lagonaina, o’u uso e ma tuafafine, e apoapoa’i atu ia te outou ma le loto atoa. Ia outou fiafia pea—aua le loto vaivai; aua ua mautinoa lava, ua lata mai le aso o le a soloiesea ai o outou loimata, faamafanafanaina o outou loto, ma o le a outou aai i fua o a outou galuega. …

Ia faamaoni, ia amio mamā, ia faaaloalo, ia agamalū ma lotomaualalo, lototele ma tumau, galueaiina le aga maualalo, ia pei o le Alii; u’umau le upu moni e tusa pe o’o mai le afi po o le pelu, sauaga po o le oti.⁹

Mai le taimi tatou te mauaina ai le Talalelei, e o’o mai i le taimi nei, ua tuuina mai e le Alii ia i tatou, mai lea taimi i lea taimi, tofotofoga ma mafatiaga, pe a mafai ona tatou faaigoaina ai; ma o nisi taimi ua foliga mai ai faapea nei tofotofoga, ma faigata ai ona taliaina e aunoa ma le muimui ma le tomumu. Peitai, i taimi faapea, ua faamanuiaina ai tatou e le Alii ma ua lava lona Agaga ua tuuina mai ia i tatou e mafai ai ona tatou manumalo i faaosoosoga ma faafetaiaia faigata.¹⁰

O alii ma tamaitai taitasi o e auauna i le Alii, e tusa pe o le a le malosi o le faatuatua o i ai, e i ai lava o latou taimi o faigata; ae afai ua latou ola faamaoni, o le a susulu mai le malamalama i o latou luga ma maua le fesoasoaniga.¹¹

Na pau le mea ua manaomia mai ia i tatou, ina ia maua ai e i tatou le saogalemu atoatoa i soo se tulaga o faigata po o sauaga, o le faia o le finagalo o le Atua, ina ia faamaoni, faatuatua, ma ia tausia i tatou lava e tuutō atu i aoaoga faavae ua tatou maua; faia le mea sa’o o le tasi i le isi; aua le solia aia tatau a le tasi tagata; ola e ala i upu uma e tulei mai le fofoga o le Atua, ma o Lona Agaga Paia o le a lagolagoina ma fesoasoani ia i tatou i tulaga uma, ma o le a tatou o ese mai ai i le totonugalemu o na tulaga ma le matuā faamanuiaina lava i o tatou fale, i o tatou aiga, o a tatou lafumanu, i a tatou faatoaga—ma, o le a faamanuiaina tatou e le Atua i soo se auala. O le a Ia tuuina mai ia i tatou lea malamalama ma lea malamalama, lea poto ma lea poto, lea atamai ma lea atamai.

Tau ina ia faaopoopo e le Atua lana faamanuiaga i luga o lenei nuu. Tau ina ia tatou faamaoni ia i tatou lava, faatuatua i aoaoga faavae uma ua tatou mauaina, saili ina ia faamanuiaina olaga o isi, ma o tatou loto atoa, ma o le a liligi ifo e le Atua lona Agaga i o tatou luga, ma o le a tatou manumalo lava i le iuga.¹² [Tagai fautuaga 3 i le itulau 124.]

I le manatua ai o taimi o faigata, tatou te iloa ai o ō tatou tofotofoga na fesoasoani ia i tatou e faalatalata atili ai i le Atua.

Pe a tatou toe tomanatu i mea sa faia e le Alii mo i tatou i le tuanai, o ō tatou siosiomaga i le taimi nei, ma o tatou faamoemoega i le lumanai, o i tatou lava o se nuu faamanuiaina! Ou te mafaufau i nisi taimi faapea, o se tasi o uiga mamā sili e mafai ona mauaina e le Au Paia o Aso e Gata Ai, o le loto faafetai i lo tatou Tamā Faalelagi mo na mea ua Ia tuuina mai i o tatou luga, ma le ala ua Ia taitaiina ai tatou. Atonu o le savalia o lena ala sa lē avea o se mea sili ona manaia; ae ua tatou iloaina mulimuli ane e faapea, o na tulaga sa matuā lē manaia lava, sa tele ina faamaonia le sili o lo latou aogā mo i tatou.¹³

O tofotofoga taitasi e feagai ma se tagata, afai na te faatuatua i lena tofotofoga ma faamamaluina le Atua, ma lana tapuaiga ua ia filifilia, i le faaiuga o lena tofotofoga po o le mafatiaga, o lena tagata o le a sili atu ona latalata i le Atua, latalata e tusa ma le faateleina o le faatuatua, atamai, malamalama ma le mana, ma e moni lava, ua sili atu lona talitonu e valaau atu i le Alii mo na mea ua ia manao i ai. Ua ou iloaina nisi tagata, o e na atuatuvale i le manatu o le feagai ai ma ni tulaga ogaoga patino, o e ina ua mavae ona latou feagai ma le faaosoosoga, na faapea mai, na latou o atu i le Alii ma le loto talitonu sili atu, ma ole atu mo na faamanuiaga e pei ona sa latou manaomia. …

Ua ia i tatou mafuaaga uma e fiafia ai, ma tumu i le olioli ma le faamalieina, e aunoa ma le amanaiaina o faigata ua siomia ai i tatou. Ma, o le a le tele o lo tatou alualu i luma, o le a le tele o le malamalama ua tatou mauaina, ma, o le a le tele o le mafai ona tatou onosaia o mea i le taimi nei, nai lo le tasi, lua, po o le lima tausaga talu ai, ma ua mafai ea ona tatou lavatia i le taimi nei, nai lo nai tausaga ua tuanai atu? Ua faamalosia i tatou e le Alii, ma faateleina lo tatou tuputupu a’e. E faapei o le tamaitiiti, a o tuputupu a’e, sa ia lē iloaina pe na faapefea ona maua le malosi faasolosolo ma le tulaga na tupu a’e ai lona tino. Ua telē atu lona tino i le tausaga lenei nai lo le tausaga ua te’a. O le mea lea, e tusa ma lo tatou agai i luma faaleagaga. Ua tatou lagonaina le malosi sili atu i le asō, nai lo le tausaga talu ai.¹⁴

O osigataulaga ua outou faia, o faigata na outou lavatia ona tatali, ma le faaaunuua na outou mafatia ai o le a … galo, ma o le a outou olioli i le mauaina o le poto masani mai na tulaga. … O nisi mea e ao ona tatou a’oa’oina e ala i mea ua tatou mafatia ai, ma o le malamalama e mauaina i lena auala, e ui atonu e tiga le faagasologa, ae o le a aoga tele mo i tatou i le isi olaga. …

… Ua ou iloa o outou olaga e le’i faapea ua lelei atoatoa; e lē taumateina lo outou feagai ma le tele o tofotofoga, ma atonu sa outou feagai ma le tele o faigata; peitai, e ala i le faamaoni faifaipea, o le a le pine ona outou o ese mai faigata i le la susulu mamalu o le lalolagi selesitila.¹⁵ [Tagai fautuaga 4 o loo i lalo.]

Fautuaga mo Suesuega ma le Aoaoina Atu

Mafaufau i manatu nei, a o outou su’esu’eina le mataupu pe, a o outou sauni e a’oa’o atu. Mo nisi fesoasoaniga, tagai i itulau v–vii.

Mafaufau loloto i le tala o loo i itulau 115–8. Na faapefea e le toatele o le Au Paia i lenei tala ona fiafia, e ui i o latou puapuaga? O le a le mea e mafai ona tatou faia e uunaia ai tagata o loo feagai ma tofotofoga?
Su’esu’e a’oa’oga a Peresitene Snow e faatatau i le mafuaaga e ao ai ona tatou feagai ma tofotofoga (itulau 118–9). O le a lou manatu o le uiga o le “aapa atu i mea o le faavavau”? Aisea tou te manatu ai e toatele tagata o le a lē “aapa atu i mea o le faavavau” e aunoa ma tofotofoga?
O a auala e tatau ai ona tatou tali atu i tofotofoga ma faaosoosoga? (Mo nisi o faataitaiga, tagai itulau 120–2.) E faapefea ona fesoasoani mai le Alii ia i tatou i taimi o tofotofoga?
Faitau le vaega mulimuli i lenei mataupu. O a mea ua outou mauaina mai luitau na feagai ma outou?
Saili mo se faamatalaga se tasi pe lua mai totonu o lenei mataupu, o loo aumaia ai ia te oe le faamoemoe. O le a se mea e te fiafia ai i faamatalaga ua e filifilia? Mafaufau i auala atonu e te faasoaina atu ai nei upu moni i se tagata o le aiga, po o se uo o manaomia se faamalosiauga.

Mau Talafeagai: Teuteronome 4:29–31; Salamo 46:1; Ioane 16:33; Roma 8:35–39; 2 Korinito 4:17–18; Mosaea 23:21–22; 24:9–16; MF&F 58:2–4

Fesoasoaniga mo le Aoao Atu: Mafaufau e faafesootai nisi o sui auai a o le i o’o i le taimi o le vasega, ma fai atu ia i latou e sauni e faasoa mai ni mea na tutupu ia i latou e fesootai ma le mataupu. Mo se faataitaiga, a o le’i a’oa’o atu mai lenei mataupu, atonu e mafai ona fesoasoani le fai atu i nai tagata toaitiiti e sauni e tautalagia mea na latou a’oa’oina mai i o latou tofotofoga.

Ina ua tutuliesea le Au Paia o Aso e Gata Ai mai o latou fale i Navū, Ilinoi, e toatele na mauaina le olioli e ui lava i o latou puapuaga.

O se tasi o le Au Paia o Aso e Gata Ai na nofo i Mauga Peseka, na ia tusia lenei auivi i lana tusi o talaaga.

“I taimi o tofotofoga, e mafai ona tatou liliu atu i lo tatou Tama i le Lagi mo le mafanafana ma le malosi.”